រាជធានីភ្នំពេញ ៖ សម្តេចតេជោបានបញ្ជាក់ហើយថា «ផ្តាំទៅមេប៉េអឹមខេត្តក្រចេះផង បញ្ចុះបញ្ចូលកូនឱ្យមកតាមការកោះហៅរបស់ព្រះរាជអាជ្ញាខេត្តកំពង់ចាមមក ។ វាអត់ទាន់មានរឿងអីទេ ប៉ុន្តែបើស្រឡាញ់កូនពេក អ្នកនឹងអស់ស័ក្តិ ។…
រាជធានីភ្នំពេញ ៖ សម្តេចតេជោបានបញ្ជាក់ហើយថា «ផ្តាំទៅមេប៉េអឹមខេត្តក្រចេះផង បញ្ចុះបញ្ចូលកូនឱ្យមកតាមការកោះហៅរបស់ព្រះរាជអាជ្ញាខេត្តកំពង់ចាមមក ។ វាអត់ទាន់មានរឿងអីទេ ប៉ុន្តែបើស្រឡាញ់កូនពេក អ្នកនឹងអស់ស័ក្តិ ។ ខ្ញុំអត់ធ្វើអីទេ ខ្ញុំគ្រាន់តែដកស័ក្តិបណ្តេញចោលតែប៉ុណ្ណឹង» ។
សូមបញ្ជាក់ថា សម្តេចតេជោនាយករដ្ឋមន្ត្រី ហ៊ុន សែន បានព្រមានថា មេបញ្ជាការកងរាជអាវុធហត្ថខេត្តក្រចេះ លោកឧត្តមសេនីយ៍ត្រី សាន្ត ប៊ុនថាន នឹងប្រឈមមុខបាត់បង់តំណែង ប្រសិនបើមិននាំកូនប្រុសឈ្មោះ សាន្ត សុខុម ជាមន្ត្រីអាវុធហត្ថដែរនោះ ចូលខ្លួនតាមដីកាអយ្យការអមសាលាដំបូងខេត្តកំពង់ចាម ដោះស្រាយបញ្ហាជុំវិញការប្រើហិង្សាលើយុវជន២នាក់ ដែលតាមដីកាកំណត់គឺឱ្យចូលខ្លួននៅថ្ងៃទី២៦ ខែមីនា ។
ការព្រមានរបស់សម្តេចតេជោនេះ គឺធ្វើឡើងក្នុងពិធីចែកសញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិជាង១ពាន់នាក់ កាលពីព្រឹកថ្ងៃទី២៥ ខែមីនា ។ សម្តេចតេជោ ហ៊ុន សែន បានរំលឹកឱ្យមន្ត្រីអាវុធហត្ថរូបនេះ ចូលខ្លួនដោះស្រាយបញ្ហា បើមិនដូច្នោះទេ ឪពុករបស់គេដែលជាមេបញ្ជាការកងរាជអាវុធហត្ថខេត្តក្រចេះ ក៏ប្រឈមនឹងការអស់តួនាទី និងតំណែងផងដែរ ។
ទីបំផុតនោះ កាលពីរសៀលថ្ងៃទី២៥ មីនា លោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ក៏បាននាំកូនប្រុសរបស់លោកឈ្មោះ សាន្ត សុខុម ជាមន្ត្រីអាវុធហត្ថដែរ ដែលបានប្រើអំពើហិង្សានោះ ទៅប្រគល់ឲ្យបញ្ជាការដ្ឋានកងរាជអាវុធហត្ថខេត្តកំពង់ចាមហើយ ។ កូនប្រុសលោកឧត្តមសេនីយ៍ត្រី សាន្ត
ប៊ុនថាន គឺលោកវរសេនីយ៍ត្រី សាន្ត សុខុម ជាមន្ត្រីអាវុធហត្ថខេត្តក្រចេះ កាលពីថ្ងៃទី១៩ ខែមីនា កន្លង
ទៅ បានប្រើហិង្សាដោយដាល់និងឡើងជង្គង់ទៅលើយុវជន២នាក់ នៅកន្លែងលេងអុីនធើរណេតមួយកន្លែង ក្នុងខេត្តកំពង់ចាម ។ ក្រៅពីដាល់និងឡើងជង្គង់ជាហិង្សាទាំងកំរោលនេះ មន្ត្រីអាវុធហត្ថរូបនេះ
ថែមទាំងដកកាំភ្លើងភ្ជង់យុវជនទាំង២នាក់នោះថែមទៀតផង ។
រឿងរ៉ាវនេះបានផ្ទុះឡើង បន្ទាប់ពីមានការបង្ហោះវីដេអូឃ្លីបដែលថតបានតាមកាមេរា៉សុវត្ថិភាពនៅក្នុងហាងអុីនធើរណេតមួយកន្លែង នៅខេត្តកំពង់ចាម កាលពីថ្ងៃទី១៩ ខែមីនា កន្លងទៅដោយមន្ត្រីអាវុធហត្ថខេត្តក្រចេះម្នាក់ឈ្មោះ សាន្ត សុខុម បានប្រើហិង្សាវាយនិងដកកាំភ្លើងភ្ជង់យុវជន២នាក់ នៅក្នុងហាងអុីនធើរណេតមួយ ដែលធ្វើឱ្យមានប្រតិកម្មរិះគន់យ៉ាងខ្លាំង ។ ក្រោយពីមានអំពើហិង្សានេះ យុវជនរងគ្រោះទាំង២នាក់គឺឈ្មោះ វ៉ាន់ ចាន់អទិច្ចបញ្ញោ និងឈ្មោះ យ៉េ ចិន្តា ក៏បានដាក់ពាក្យបណ្តឹង ។
លោកឧត្តមសេនីយ៍ត្រី សាន្ត ប៊ុនថាន ជាឪពុកបានបញ្ជាក់ថា អំពើហិង្សានេះ ផ្តើមចេញពីកូនប្រុសរបស់លោកម្នាក់ទៀត ឈ្មោះ សាន្ត សុវិជ្ជា ដែលត្រូវជាប្អូនរបស់សាន្ត សុខុម ។ បើតាមលោកឧត្តមសេនីយ៍ត្រី សាន្ត ប៊ុនថាន រៀបរាប់ថា កូនប្រុសរបស់លោកឈ្មោះសាន្ត សុវិជ្ជា រួមជាមួយមិត្តភក្តិ បានលេងល្បែងចាញ់អស់លុយរហូតយកខ្សែក និងម៉ូតូទៅបញ្ចាំគ្មានសល់ ហើយលោកបានឲ្យកូនបងឈ្មោះ សាន្ត សុខុម ទៅតាមរកប្អូន និងសួរនាំនៅកន្លែងបញ្ចាំខ្សែក និងម៉ូតូ ដើម្បីលោះយកមកវិញ ។ ប៉ុន្តែពេលទៅដល់ហាងអុីនធើរណេត ខាងលើ ជួបមិត្តភក្តិរបស់ឈ្មោះ សាន្ត សុវិជ្ជា ក៏សួរនាំរកទីតាំងបញ្ចាំ ។ ដោយសារមិត្តភក្តិរបស់ប្អូនប្រុសខ្លួនមិនប្រាប់ និងមិននាំទៅកន្លែងបញ្ចាំ ក៏កើតមានជម្លោះរហូតវាយដំ និងដកកាំភ្លើងភ្ជង់តែម្តង ។
ពេលនេះ លោក សាន្ត សុខុម ដែលជាតួអង្គប្រើហិង្សាកំពុងរត់គេចខ្លួន ហើយមិនដឹងថា ចូលខ្លួននៅថ្ងៃនេះតាមដីកាឬក៏អត់ ?
ចែករំលែកព័តមាននេះ