ខេត្តកំពត ៖ លំហាត់សមយុទ្ធនាគមាសឆ្នាំ២០១៩ លើវិញ្ញាសាមួយចំនួនដូចជា ការប្រឆាំងភេរវកម្ម ការរំដោះចំណាប់ខ្មាំង ការសង្គ្រោះប្រជាពលរដ្ឋពីគ្រោះធម្មជាតិ បានបិទបញ្ចប់ហើយនៅថ្ងៃទី២៥ មីនា ក្រោមអធិបតីភាពសម្តេចពិជ័យសេនា…
ខេត្តកំពត ៖ លំហាត់សមយុទ្ធនាគមាសឆ្នាំ២០១៩ លើវិញ្ញាសាមួយចំនួនដូចជា ការប្រឆាំងភេរវកម្ម
ការរំដោះចំណាប់ខ្មាំង ការសង្គ្រោះប្រជាពលរដ្ឋពីគ្រោះធម្មជាតិ បានបិទបញ្ចប់ហើយនៅថ្ងៃទី២៥ មីនា ក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។
សម្តេច ពិជ័យសេនា ទៀ បាញ់ ថ្លែងថា សមយុទ្ធនាគមាសឆ្នាំ២០១៩នេះ ធំជាងឆ្នាំមុន ព្រោះការហ្វឹកហ្វឺនលើវិញ្ញាសាប្រមាណ២០ រវាងកងទ័ពកម្ពុជានិងកងទ័ពរំដោះប្រជាជនចិន ដែលបានប្រើប្រាស់អាវុធ រថក្រោះ ឧទ្ធម្ភាគចក្រ ការបាញ់គ្រាប់ពិតសំដៅទីតាំងកម្ទេចភេរវករ ដើម្បីរំដោះចំណាប់ខ្មាំង ។ ក្រុមកម្លាំងស៊ើបការណ៍ថ្មើរជើងនៃកងកម្លាំងនៃប្រទេសទាំងពីរ ចុះស្រាវជ្រាវរកគ្រឿងផ្ទុះ ដែលបង្កប់ដោយក្រុមភេរវករ និងការលោតឆត្ររបស់កងទ័ពឆត្រយោង ។
សូមជម្រាបថា ពិធីបើកសមយុទ្ធបាញ់គ្រាប់ពិត ត្រូវបានធ្វើឡើងកាលពីព្រឹកថ្ងៃទី១៣ ខែមីនា ក្រោមអធិបតីភាពលោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងលោកឧត្តមសេនីយ៍ទោ Feng Xiang នាយរងសេនាធិការកងទ័ពរំដោះប្រជាជនចិន ។ ចំពោះលំហាត់ហ្វឹកហ្វឺននេះ ភាគីកងទ័ពរំដោះប្រជាជនចិនចូលរួមចំនួន២៥២នាក់ និងភាគីកម្ពុជាចូលរួមចំនួន២.៥៤២នាក់ ក្នុងនោះមានកម្លាំងធ្វើលំហាត់ចំនួន៣៨២នាក់ កម្លាំងបម្រើការក្នុងលំហាត់ចំនួន៤៤៨នាក់ កម្លាំងចូលរួមក្នុងពិធីបើក-បិទចំនួន១.៦៨៥នាក់ ។ អាវុធយុទ្ធភ័ណ្ឌសំខាន់ៗដែលប្រើប្រាស់នៅក្នុងលំហាត់នាគមាសឆ្នាំនេះរួមមានដូចជា រថពាសដែក រថក្រោះ កាំភ្លើងធំ កាំភ្លើងត្បាល់ ឧទ្ធម្ភាគចក្រ អាវុធគាំទ្រពីលើអាកាសជាដើម ។
ក្នុងលំហាត់នាគមាសនេះ មានការហ្វឹកហាត់ក្នុងទីបញ្ជាការនិងទីលាន ដោយផ្តោតសំខាន់លើវិញ្ញាសាមួយចំនួនដូចជា ការប្រឆាំងភេរវកម្ម ការរំដោះចំណាប់ខ្មាំង ការសង្គ្រោះប្រជាពលរដ្ឋពីគ្រោះធម្មជាតិ ការបំពេញភារកិច្ចក្រោមឆត្រអង្គការសហប្រជាជាតិ និងវិស្វកម្មជាដើម ។ ថ្លែងប្រាប់អ្នកសារព័ត៌មានពេលបើកវគ្គលោកនាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកង
យោធពលខេមរភូមិន្ទ មានប្រសាសន៍ថា ការធ្វើលំហាត់សមយុទ្ធនាគមាសឆ្នាំ២០១៩ រវាងកងយោធពលខេមរភូមិន្ទជាមួយកងទ័ពរំដោះប្រជាជនចិន គឺនៅទីលានបាញ់គ្រាប់ពិត ហ៊ុន សែន ជុំគិរី ស្ថិតក្នុងស្រុកជុំគិរី ខេត្តកំពត ។
លោកនាយឧត្តមសេនីយ៍ ឥត សារ៉ាត់ បន្តថា លំហាត់សមយុទ្ធ«នាគមាសឆ្នាំ២០១៩» រវាងកម្ពុជានិងចិន ប្រព្រឹត្តទៅក្រោមរបៀបវារៈ«ប្រឆាំងភេរវកម្ម និងផ្នែកមនុស្សធម៌» ខណៈសមយុទ្ធនេះកំពុងប្រព្រឹត្តទៅនៅទីលានបាញ់គ្រាប់ពិត ហ៊ុន សែន ជុំគិរី ដែលមានទ្រង់ទ្រាយធំជាងបណ្តាឆ្នាំកន្លងទៅ ។
ទីតាំងលំហាត់ហ្វឹកហ្វឺននាគមាសឆ្នាំ២០១៩នេះ ត្រូវបានកងពលតូចលេខ៧០ធ្វើសកម្មភាពរៀបចំកសាងទីលាន អគារស្នាក់នៅ ប្រព័ន្ធផ្លូវចល័តនៃលំហាត់ និងហេដ្ឋារចនាសម្ព័ន្ធរូបវ័ន្តជាច្រើន ដែលបម្រើឱ្យសកម្មភាពលំហាត់នាគមាសកម្ពុជា-ចិន ឆ្នាំ២០១៩ នៅទីលានហ្វឹកហ្វឺនបាញ់គ្រាប់ពិតរបស់សាលាហ្វឹកហ្វឺនតេជោ សែន របស់កងពលតូចលេខ៧០ ស្ថិតក្នុងភូមិសាស្ត្រវាលចំបក់ ប្រជុំភ្នំព្រះ ភូមិអូរ ឃុំត្រពាំងរាំង ស្រុកជុំគិរី ខេត្តកំពត ។
ក្នុងសន្និសីទសារព័ត៌មានបិទបញ្ចប់ សម្តេច ពិជ័យសេនា ទៀ បាញ់ ថ្លែងថា លំហាត់នាគមាសឆ្នាំ២០១៩ មិនមានការគំរាមកំហែងអ្នកណាទាំងអស់ ផ្ទុយទៅវិញសមយុទ្ធនេះ គឺជាការបង្ហាញនូវការចូលរួមថែរក្សាសន្តិសុខក្នុងតំបន់ តាមរយៈការផ្លាស់ប្តូរបទពិសោធន៍គ្នាតែប៉ុណ្ណោះ ជាពិសេសបទពិសោធន៍ប្រយុទ្ធប្រឆាំងអំពើភេរវកម្ម ជួយសង្គ្រោះប្រជាពលរដ្ន ពេលមានគ្រោះមហន្តរាយធម្មជាតិជាដើម ។
សម្តេចពិជ័យសេនា បន្តថា លំហាត់ហ្វឹកហ្វឺននាគមាស ផ្តោតសំខាន់លើប្រធានបទកិច្ចការមនុស្សធម៌ និងការប្រឆាំងភេរវកម្ម ដែលជាឱកាសសម្រាប់កងទ័ពប្រទេសទាំង២ ត្រូវសិក្សារៀនសូត្រទៅវិញទៅមក ដើម្បីបង្កើនសមត្ថភាពវិជ្ជាជីវៈ សម្រាប់បំពេញភារកិច្ចការពារប្រទេសជាតិឲ្យកាន់តែមានប្រសិទ្ធភាព និងខ្លាំងក្លាថែមទៀត ។
សម្តេចពិជ័យសេនាលើកឡើងថា មិនតែប៉ុណ្ណោះលំហាត់នាគមាសឆ្នាំ២០១៩ គឺជាការចូលរួមចំណែកជំរុញទំនាក់ទំនងមិត្តភាពកម្ពុជា-ចិន ឱ្យកាន់តែរឹងមាំខ្លាំងក្លា ជាពិសេសកិច្ចសហប្រតិបត្តិការរវាងកងយោធពលខេមរភូមិន្ទ និងកងទ័ពរំដោះប្រជាជនចិនតែម្តង ។
គួររំឭកថា សមយុទ្ធនាគមាសឆ្នាំ២០១៩បានធ្វើឡើងរួមគ្នា រវាងកងយោធពលខេមរភូមិន្ទ និងកងទ័ពរំដោះប្រជាជនចិន ដែលមានរយៈពេល២៨ថ្ងៃ ចាប់ពីថ្ងៃទី២៨ ខែកុម្ភៈ ដល់ថ្ងៃទី២៧ ខែមីនា ឆ្នាំ២០១៩ ។ សមយុទ្ធនេះមានភាគីកងទ័ពរំដោះប្រជាជនចិនចូលរួមចំនួន២៥២នាក់ និងភាគីកម្ពុជាចូលរួមចំនួន២.៥៤២នាក់ ក្នុងនោះមានកម្លាំងធ្វើលំហាត់ចំនួន៣៨២នាក់ កម្លាំងបម្រើការក្នុងលំហាត់ចំនួន៤៤៨នាក់ កម្លាំងចូលរួមក្នុងពិធីបើក-បិទចំនួន១.៦៨៥នាក់ ។
លោក ចាំង ហាំឈីង មេបញ្ជាការរងកងទ័ពចិន បានលើកឡើងថា បច្ចុប្បន្ននេះទំនាក់ទំនងចិន-កម្ពុជា បានឈានដល់ចំណុចកំពូល និងល្អជាងពេលណាៗទាំងអស់ ដែលមិត្តភាពជាដែកថែបនេះ បានកើតឡើងក្នុងដំណាក់កាលដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោក ស៊ី ជីនពីង ប្រធានាធបិតីចិន ។
ប្រទេសកម្ពុជានិងប្រទេសចិន នឹងបន្តពង្រឹងពង្រីកទំនាក់ទំនងនិងកិច្ចសហប្រតិបត្តិការដ៏រឹងមាំនេះបន្ថែមទៀត ដើម្បីអភិវឌ្ឍកិច្ចសហប្រតិបត្តិការគ្រប់ជ្រុងជ្រោយ ។ កងទ័ពកម្ពុជា-ចិន បានធ្វើលំហាត់នាគមាស នៅប្រទេសកម្ពុជាចំនួន២លើករួចមកហើយ ដែលលើកទី១ នៅឆ្នាំ២០១៦ និងលើកទី២ នៅឆ្នាំ២០១៨ ។ ភាគីទាំងពីរបានឯកភាពបង្កើតឱ្យមានលំហាត់ហ្វឹកហ្វឺននេះរៀងរាល់១ឆ្នាំម្តង ដើម្បីពង្រឹងកិច្ចសហប្រតិបត្តិយោធា ។ លំហាត់នាគមាស ឆ្នាំ២០១៩ ត្រូវបានគេមើលឃើញថា មានលក្ខណៈទ្រង់ទ្រាយធំ ដោយមានកម្លាំងទ័ព និងសព្វាវុធចូលរួមច្រើនជាងមុនផងដែរ ៕
ចែករំលែកព័តមាននេះ