ខេត្តព្រះវិហារ ៖ រយៈពេលពីថ្ងៃ ចាប់ពីថ្ងៃទី២២ ដល់ថ្ងៃទី២៣ ខែមីនា ឆ្នាំ២០១៩នេះ គ្រោះធម្មជាតិខ្យល់កន្ត្រាក់ លាយឡំផ្គររន្ទះ និងភ្លៀងធ្លាក់បានវាយប្រហារទៅលើស្រុកចំនួន៥ក្នុងនោះរួមមានស្រុកជាំក្សាន្ត…
ខេត្តព្រះវិហារ ៖ រយៈពេលពីថ្ងៃ ចាប់ពីថ្ងៃទី២២ ដល់ថ្ងៃទី២៣ ខែមីនា ឆ្នាំ២០១៩នេះ គ្រោះធម្មជាតិខ្យល់កន្ត្រាក់ លាយឡំផ្គររន្ទះ និងភ្លៀងធ្លាក់បានវាយប្រហារទៅលើស្រុកចំនួន៥ក្នុងនោះរួមមានស្រុកជាំក្សាន្ត ស្រុកគូលែន ស្រុកឆែប ស្រុកជ័យសែន និងស្រុករវៀង នៅខេត្តព្រះវិហារ បណ្តាលឲ្យផ្ទះសម្បែងប្រជាពលរដ្ឋប្រមាណជាង៤០គ្រួសារ ប៉ើងរបើកដំបូល ទ្រេត បាក់បែក រងការខូចខាត ក្នុងនោះមានចំនួន១០ខ្នងផ្ទះ រងការខូចខាតធ្ងន់ធ្ងរ ។
ថ្លែងប្រាប់អ្នកសារព័ត៌មាននៅថ្ងៃទី២៤ ខែមីនា នេះ លោក អ៊ុន ចាន់ដា អភិបាលខេត្តព្រះវិហារ និងជាប្រធានគណៈកម្មការគ្រប់គ្រងគ្រោះមហន្តរាយថ្នាក់ខេត្ត មានប្រសាសន៍ថា ភ្ញៀង និងខ្យល់កន្ត្រាក់ បានធ្វើឲ្យផ្ទះសម្បែងប្រជាពលរដ្ឋ១០ខ្នង ក្នុងចំណោមផ្ទះរងការប៉ះពាល់៤៤ខ្នងផ្ទះ បានដួលរលំខូចខាតទាំង
ស្រុង បែកបាក់រាបដល់ដី ដោយឡែកផ្ទះចំនួន៣៤ខ្នងផ្សេងទៀត បានប៉ើង របើកដំបូល ខ្លះទ្រេត តែមិនមានឲ្យនរណាម្នាក់រងរបួសឡើយ ។
លោកបន្តថា ក្រោយពីមានហេតុការណ៍នេះភ្លាម អាជ្ញាធរបានចុះអន្តរាគមន៍ជួយភ្ញាមៗ ដល់ប្រជាពលរដ្ឋ ដើម្បីឲ្យពួកគាត់មានទីជម្រកស្នាក់នៅ និងគ្រឿងឧបភោគ បរិភោគ និងថវិកាមួយចំនួនបណ្តោះអាសន្នសិន ។
ជាមួយគ្នានេះដែរ លោកអភិបាលខេត្តក៏បានអំពាវនាវដល់ប្រជាពលរដ្ឋទាំងអស់នៅទូទាំងខេត្តព្រះវិហារ ត្រូវបង្កើនការប្រុងប្រយ័ត្នបន្ថែមទៀតចំពោះគ្រោះធម្មជាតិនេះ ព្រោះវាអាចកើតឡើងដោយមិនអាចដឹងមុនបាន ៕
ចែករំលែកព័តមាននេះ