រាជធានីភ្នំពេញ ៖ លោក តឹក ប៊ុនវី អគ្គលេខាធិការខេមរៈសហព័ន្ធកីឡាកាយវប្បកម្ម និងលំហាត់ប្រាណ និងជាកីឡាករជម្រើសជាតិ បានប្រកាសលាលែងពីតំណែង និងទម្លាយរឿងអាស្រូវផ្ទៃក្នុងរបស់សហព័ន្ធ ដោយបានចោទប្រកាន់លោក រស្មី សុខមង្គល ប្រធានសហព័ន្ធថា ជាមនុស្សគិតតែពីប្រយោជន៍ផ្ទាល់ខ្លួន និងប្រើប្រាស់កីឡាករធ្វើជាមុខជំនួញ ដើម្បីផលចំណេញ។
ក្រោយទម្លាយរឿងអាស្រូវនៅក្នុងសហព័ន្ធ លោក តឹក ប៊ុនវី បានប្រកាសលាលែងពីតំណែងអគ្គលេខាធិការខេមរៈសហព័ន្ធកីឡាកាយវប្បកម្មនិងលំហាត់ប្រាណ ក្រោមហេតុផល មិនអាចបន្តធ្វើការងារជាមួយប្រធានសហព័ន្ធ ដែលគិតតែពីផលប្រយោជន៍ ។ នេះបើយោងតាមទំព័រហ្វេសប៊ុករបស់កីឡាករូបនេះដែលមានឈ្មោះថា Steven Amy នៅថ្ងៃទី២៣ ខែមីនា ឆ្នាំ២០១៩។
ទំព័រហ្វេសប៊ុកនេះបានរៀបរាប់ដូច្នេះថា៖«ខ្ញុំបាទ តឹក ប៊ុនវី ជាអគ្គលេខាធិការខេមរៈសហព័ន្ធកីឡាកាយវប្បកម្ម និងលំហាត់ប្រាណ និងជាកីឡាករជម្រើសជាតិម្នាក់ សុំប្រកាសលាលែងពីសហព័ន្ធចាប់ពីពេលនេះតទៅ មូល ហេតុមកពីប្រធានសហព័ន្ធគិតតែពីផល ប្រយោជន៍ផ្ទាល់ខ្លួន គិតតែពីផលចំណេញផ្ទាល់ខ្លួនរបស់គាត់»។
លោកបានចោទប្រកាន់លោក រស្មី សុខមង្គល ដែលជាប្រធានសហព័ន្ធថា ជាបុគ្គលគិតតែពីផលចំណេញផ្ទាល់ខ្លួន និងយកកីឡាករធ្វើជាមុខជំនួញ ។ លោកបានបន្ថែមថា លោក រស្មី សុខមង្គល មិនដែលយកថវិកាដែលកៀរគរបានពីក្រៅស្រុក និងក្នុងស្រុកមកដាក់ក្នុងសហព័ន្ធ ដើម្បីអភិវឌ្ឍន៍កីឡាកាយវប្បកម្មនេះឡើយ។
លោក តឹក ប៊ុនវី បានលើកពីសមិទ្ធផល និងស្នាដៃកាលពីពេលកន្លងមកថា លោកជាកីឡាករដំបូងគេដែលឈ្នះមេដាយមាសអាស៊ីអាគ្នេយ៍ និងមេដាយសំរឹទ្ធពិភពលោកនៅឆ្នាំ២០១៦ ។ កាលណោះ លោកបានបរិច្ចាគថវិកា២០ភាគរយពីថវិកាលើកទឹកចិត្តរបស់រាជរដ្ឋាភិបាលដល់សហព័ន្ធ ដើម្បីទុកឲ្យកីឡាករដូចគ្នាប្រើប្រាស់ពេលចេញទៅប្រកួតក្រៅប្រទេសម្តងៗ ។ កោះសន្តិភាពមិនអាចស្វែងរកការបំភ្លឺពីលោក រស្មី សុខមង្គល ជុំវិញការចោទប្រកាន់របស់លោកតឹក ប៊ុនវី នៅឡើយទេដោយសារទូរស័ព្ទចូលហើយគ្មានអ្នកលើក ៕
ចែករំលែកព័តមាននេះ