រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា មុននេះបន្តិច បង្គោលភ្លើងដែលតែងតែបង្កគ្រោះថ្នាក់នៅតាមកណ្តាលផ្លូវណតប្រ៊ីដ ពេលនេះត្រូវបានមន្ត្រីអគ្គិសនីចាប់ផ្តើមដក កាត់ និងទម្លាក់ខ្សែបណ្តើរៗហើយ កាលពីម៉ោងជាង៨ព្រឹកនេះ ថ្ងៃទី២៥ ខែមីនា ឆ្នាំ២០១៩ ស្ថិតក្នុងសង្កាត់អូរបែកក្អម ខណ្ឌសែនសុខ ។
បើតាមមន្ត្រីអគ្គិសនីបានឱ្យដឹងថា នៅក្នុងរយៈពេល៥ថ្ងៃនេះ បង្គោលភ្លើងចាប់ពីស្ពានអាកាសផ្សារដីហុយ រហូតដល់ស្តុបណតប្រ៊ីដនេះ តាមគោលកាល គឺត្រូវធ្វើការដកខ្សែ និងបង្គោលឱ្យអស់ គឺចាប់ពីថ្ងៃនេះរហូតដល់រយៈពេល៥ថ្ងៃខាងមុខ ។ ទោះបីយ៉ាងណា មន្ត្រីអគ្គិសនីបានអះអាងថា នឹងបន្តដកឱ្យអស់បង្គោលភ្លើងនៅកណ្តាលផ្លូវនឹងតែម្តង ។
គួរបញ្ជាក់ថា បង្គោលភ្លើងខាងលើនេះដើមឡើយគឺបំពាក់នៅតាមចិញ្ចឹើមផ្លូវទេ ក្រោយពេលមានការអភិវឌ្ឍន៍ផ្លូវ គឺស្ថាប័នផ្លូវធ្វើការពង្រីកផ្លូវទៅ ទើបបណ្តាលឱ្យបង្គោលភ្លើងនេះ គឺនៅកណ្តាលផ្លូវតែម្តង ហើយកន្លងមកគឺបង្កឱ្យមានគ្រោះថ្នាក់ជាយថាហេតុកើតឡើងជាបន្តបន្ទាប់ ។
ហើយរយៈពេលប្រមាណជាជិត១ឆ្នាំកន្លងមក ដោយសារតែប្រជាពលរដ្ឋមានប្រតិបត្តិកម្ម ក្រសួងសាធារណការ ក៏ដូចជាមន្ត្រីអគ្គិសនីគឺតម្រូវឱ្យដកបង្គោលភ្លើងចេញ ប៉ុន្តែកន្លងមកគ្រាន់តែដកខ្សែផ្នែកខាងក្រោមតែប៉ុណ្ណោះ រហូតដល់ថ្ងៃនេះ គឺដកខ្សែ និងបង្គោលភ្លើងឱ្យអស់តែម្តង។
ចែករំលែកព័តមាននេះ