រាជធានីភ្នំពេញ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែង និងម្នាក់ទៀតរងរបួសធ្ងន់នៅក្នុងហេតុការណ៍គ្រោះថ្នាក់ចរាចរណ៍មួយកើតឡើងលើកំណាត់ផ្លូវលេខ១៦៣ កែងផ្លូវលេខ៣៦០ ស្ថិតក្នុងសង្កាត់ទួលស្វាយព្រៃ១ ខណ្ឌចំការមន កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី២៧ មីនា ២០១១ ។
រថយន្តដែលបុកគ្នាខាងលើនេះម៉ាក LUXUS RX 330 ពាក់ស្លាកលេខ ភ្នំពេញ 2K-1978 ពណ៌ខ្មៅ បើកបរដោយជនមិនស្គាល់អត្តសញ្ញាណបានបុកជាមួយម៉ូតូជិះគ្នា២នាក់នៅចំណុចផ្លូវកែងខាងលើ បណ្តាលឱ្យអ្នកជិះម៉ូតូដួលបោកក្បាលស្លាប់ភ្លាមៗនៅនឹងកន្លែងម្នាក់ និងរងរបួសធ្ងន់ម្នាក់ ។ បុរសដែលស្លាប់ក្នុងហេតុការណ៍គ្រោះថ្នាក់ចរាចរនេះឈ្មោះហែម សារិន អាយុ២៨ឆ្នាំ ស្នាក់នៅសង្កាត់បឹងទំពុន ខណ្ឌមានជ័យ ។ រីឯអ្នករបួសឈ្មោះឈុន ឈាងលី ភេទប្រុស អាយុ៣០ឆ្នាំ ។
តាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ គេបានសង្កេតឃើញរថយន្តម៉ាក LEXUS ពណ៌ខ្មៅ មួយគ្រឿង បើកបរក្នុងទិសដៅពីកើតទៅលិចលើកំណាត់ផ្លូវលេខ៣៦០ លុះដល់ផ្លូវកែង ក៏បុកគ្នាជាមួយអ្នកជិះម៉ូតូទាំង២នាក់ ដែលធ្វើដំណើរលើកំណាត់ផ្លូវលេខ៣៦០ បណ្តាលឱ្យដួលបោកក្បាលស្លាប់ភ្លាម និងរបួសធ្ងន់ម្នាក់ ។ ចំណែកឯរថយន្តបានបើករត់គេចបាត់ស្រមោលភ្លាមៗ ។ តាមរយៈភិនភាគខាងលើគេសង្ឃឹមថា សមត្ថកិច្ច និងស្រាវជ្រាវស្វែងរករថយន្តបង្ក និងអ្នកបើកបរយកមកដោះស្រាយគ្នាតាមផ្លូវច្បាប់ជាមួយអ្នករងគ្រោះជាក់ជាពុំខានឡើយ ៕
ចែករំលែកព័តមាននេះ