រាជធានីភ្នំពេញ ៖ រថយន្តស៊េរីទំនើបម៉ាកឡិចស៊ីសជាច្រើនគ្រឿងដែលឈ្មួញកំពុងដំឡើង និងកាត់តដោយខុសច្បាប់នៅក្នុងយានដ្ឋានគ្មានស្លាកយីហោមួយកន្លែង ត្រូវបានកម្លាំងគយនិងរដ្ឋាកររាជធានីភ្នំពេញធ្វើការស្រាវជ្រាវរហូតឈានដល់ការបង្ក្រាប និងបានដកហូតយកទៅរក្សាទុក ដើម្បីរង់ចាំចាត់ការតាមច្បាប់។
ទីតាំងដំឡើង និងកាត់តរថយន្តខុសច្បាប់ខាងលើស្ថិតនៅក្បែររោងចក្រផលិតចំណីសត្វមួយកន្លែង ស្ថិតនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ ហើយត្រូវបានកម្លាំងគយចុះបង្ក្របកាលពីថ្ងៃទី២៣ ខែមិនា ឆ្នាំ២០១៩ ។
តាមប្រភពព័ត៌មានបានឲ្យដឹងថា រថយន្តម៉ាកឡិចស៊ីសចំនួន១៥គ្រឿងដែលត្រូវដកហូតរួមមាន រថយន្តម៉ាកឡិចស៊ីស RX-330, រថយន្តម៉ាកឡិចស៊ីស RX-350 និងរថយន្តម៉ាកឡិចស៊ីស RX-440H (Hybrid) ផលិតពីឆ្នាំ២០០៤ ដល់ឆ្នាំ២០១១ ឆ្នាំផលិតចាប់ពីឆ្នាំ២០០៤ ដល់ឆ្នាំ២០១១ ដោយឈ្មួញបាននាំចូលសង្ស័យគេចពន្ធ ហើយបានយកមកដាក់នៅក្នុងយានដ្ឋានខាងលើដោយបានកាត់ត និងដំឡើងដោយគ្មានការអនុញ្ញាតដែលនាំឲ្យប៉ះពាល់ដល់អ្នកទិញយកទៅប្រើប្រាស់ ហើយសំខាន់ថែមទៀតនោះនាំឲ្យខាតបង់ប្រាក់ចំណូលពន្ធរបស់រដ្ឋថែមទាំងទៀតផង។
ក្នុងនោះរថយន្តដំឡើងរួចមានចំនួន៣គ្រឿង និងមាន១គ្រឿងបំពាក់ស្លាកលេខក្លែងក្លាយទៀតផង ចំណែករថយន្តចំនួន១២គ្រឿងទៀតកំពុងដំឡើង និងកាត់តមិនត្រឹមត្រូវតាមលក្ខណៈបច្ចេកទេសឡើយ។
ប្រភពដដែលបានបន្តថា គេមិនបានដឹងថាយានដ្ឋានល្មើសច្បាប់ខាងលើនេះចាប់ផ្ដើមដំណើរការនាំចូលរថយន្តគេចពន្ធយកមកដំឡើងនិងកាត់តរយៈពេលប៉ុន្មានឆ្នាំមកហើយទេ ប៉ុន្តែគេបានឃើញទីតាំងមួយនេះដំណើរការយូរឆ្នាំមកហើយ ។ ដូច្នេះមានអ្នកទិញប៉ះចំរថយន្តកាត់តនិងរថយន្តស៊េរីទំនើបៗមែន ប៉ុន្តែសុទ្ធតែរថយន្តរលួយៗមិនតិចគ្រឿងឡើយ ព្រោះនៅក្នុងយាដ្ឋានមួយនេះមានជាង និងឧបករណ៍សម្រាប់កែច្នៃ និងកាត់តរថយន្តសព្វគ្រប់ ។
អាស្រ័យហេតុនេះសូមបងប្អូនប្រជាពលរដ្ឋទាំងអស់គ្នាប្រុងប្រយ័ត្ន បើទិញរថយន្តជិះសូមពិនិត្យមើលឲ្យបានច្បាស់លាស់ ក្រែងប៉ះចំរថយន្តដែលនាំចេញពីយានដ្ឋានមួយនេះ។ ក្រោយពីទៅដល់ទីតាំងយានដ្ឋានខាងលើ កម្លាំងគយបានស្ទូចរថយន្តទាំងនោះយកទៅរក្សាទុកនៅក្នុងឃ្លាំង ដើម្បីបន្តធ្វើការស្រាវជ្រាវ៕
ចែករំលែកព័តមាននេះ