ខេត្តក្រចេះ ៖ ភ្លៀងកក់ខែមួយមេធំលាយឡំជាមួយនឹងសន្ធឹកខ្យល់ផ្គរន្ទះដែលបានកើត ឡើងកាលពីព្រលប់ថ្ងៃទី២៣ មីនា បានបង្កឡើងជាមហន្តរាយធ្ងន់ធ្ងរ ក្នុងនោះបង្កឲ្យមានផ្ទះ របស់ពលរដ្ឋរាប់សិបខ្នងផ្ទះនៅស្រុកសំបូរ ត្រូវខូចខាត ព្រមទាំងបង្កឲ្យបុរស២នាក់នៅស្រុកស្នួលបានស្លាប់ដោយសាររន្ទះបាញ់។…
ខេត្តក្រចេះ ៖ ភ្លៀងកក់ខែមួយមេធំលាយឡំជាមួយនឹងសន្ធឹកខ្យល់ផ្គរន្ទះដែលបានកើត ឡើងកាលពីព្រលប់ថ្ងៃទី២៣ មីនា បានបង្កឡើងជាមហន្តរាយធ្ងន់ធ្ងរ ក្នុងនោះបង្កឲ្យមានផ្ទះ របស់ពលរដ្ឋរាប់សិបខ្នងផ្ទះនៅស្រុកសំបូរ ត្រូវខូចខាត ព្រមទាំងបង្កឲ្យបុរស២នាក់នៅស្រុកស្នួលបានស្លាប់ដោយសាររន្ទះបាញ់។ នេះជាមហន្តរាយគ្រោះធម្មជាតិនាដើមរដូវប្រាំងដែលអាជ្ញាធរខេត្តនិយាយថា បានបង្កជាមហន្តរាយធ្ងន់ធ្ងរដែលកើតមាននៅតាមស្រុកចំនួន២ គឺស្រុកស្នួល និងស្រុកសំបូរ។
បើតាមសេចក្តីរាយការណ៍ឲ្យដឹងថា ផ្ទះឈើតូចធំរបស់ពលរដ្ឋនៅតាមឃុំចំនួន២ឃុំ គឺឃុំរលួស និងឃុំក្បាលដំរី ស្រុកសំបូរ មានចំនួន៣៣ផ្ទះ ត្រូវរងការខូចខាតដោយសារអំណាចខ្យល់កន្ត្រាក់ដែលវាយបោកបក់ខ្លាំង ក្នុងនោះមាន២៦ផ្ទះរងគ្រោះស្រាល ក្រៅពីនោះ គឺត្រូវបាក់រលំប៉ើងដំបូល និងខ្លះត្រូវដួលបាក់ទ្រេតរាបដល់ដី។
សេចក្តីរាយការណ៍ឲ្យដឹងទៀតថា ក្រៅពីបានបង្កឲ្យមានការខូចខាតដល់លំនៅ ដ្ឋានរបស់អ្នកស្រុកសំបូរ អំណាចបាតុភូតគ្រោះធម្មជាតិផ្គរន្ទះបានបាញ់សម្លាប់បុរសពីរនាក់នៅស្រុកស្នួល បណ្តាលឲ្យស្លាប់បាត់បង់ជីវិតក្នុងអំឡុងពេលបន្តបន្ទាប់គ្នានៅថ្ងៃដដែល។
បុរសរងគ្រោះម្នាក់ឈ្មោះ ទ្រី ភ័ក្ក្រ អាយុ២៦ឆ្នាំ រស់នៅភូមិក្រញូងសែនជ័យ ស្រុកស្នួល ត្រូវរន្ទះបាញ់ឲ្យស្លាប់បាត់បង់ជីវិតនៅពេលជនរងគ្រោះកំពុងតែស្នាក់នៅក្នុងផ្ទះចំការពេលមេឃកំពុងភ្លៀងខ្លាំង និងជនរងគ្រោះម្នាក់ទៀតឈ្មោះជ្រីន កូមីន អាយុ១៦ឆ្នាំ រស់នៅឃុំស្នួល ស្រុកស្នួល ក៏ជួបហេតុការណ៍រន្ទះបាញ់បណ្តាលឲ្យស្លាប់នៅពេលដែលជនរងគ្រោះកំពុងតែឈរហូបទឹកនៅខាងក្រោមផ្ទះក្រោយទទួលទានបានល្ងាចរួច។
មានការកត់សម្គាល់ឃើញថា ជារៀងរាល់ឆ្នាំបាតុភូតគ្រោះធម្មជាតិ គឺតែងតែបង្កឲ្យមានគ្រោះមហន្តរាយធ្ងន់ធ្ងរដល់ពលរដ្ឋគួរឲ្យព្រួយបារម្ភដូចជាករណីខ្យល់កន្ត្រាក់ និងគ្រោះរន្ទះបាញ់។ ស្រុកចំនួន៥ និងក្រុង១ នៅក្នុងខេត្តក្រចេះ គឺត្រូវទទួលរងគ្រោះធម្មជាតិដូចៗគ្នា ជារៀលរាល់ឆ្នាំ ដោយគ្រាន់តែខ្លះត្រូវប៉ះពាល់ធ្ងន់ធ្ងរ ឬក៏តិចតួចតែប៉ុណ្ណោះ៕
ចែករំលែកព័តមាននេះ