ខេត្តកំពត ៖ កូនប្រសាប្រុសម្នាក់ទទួលរងរបួសធ្ងន់ធ្ងរ ដោយសារតែឪពុកក្មេកលបកាប់ពីក្រោយ៤កាំបិតផ្គាក់កាលពីវេលាម៉ោង៧យប់ថ្ងៃទី២៨ កុម្ភៈ នៅក្នុងផ្ទះរបស់ខ្លួន ។ កូនប្រសារងគ្រោះឈ្មោះស៊ុន សំ ហៅល័ក អាយុ២៤ឆ្នាំ រីឯឪពុកក្មេកចិត្តសាហាវប៉ងធ្វើឃាតកូនប្រសាមិនបានសម្រេចឈ្មោះឃី ឆន អាយុ៥០ឆ្នាំ រស់នៅភូមិព្រៃកឹក ឃុំប្រាសាទភ្នំខ្យង ស្រុកកំពង់ត្រាច ។
តាមសេចក្តីរាយការណ៍ជាបឋមបានឱ្យដឹងថា ឈ្មោះឃី ឆន ជាឪពុកក្មេកពេលត្រឡប់មកពីចូលរួមពិធីមង្គលការគេវិញ ទំនងជាស្រវឹងជោកផង ហើយមិនដឹងជាទាស់ចិត្តរឿងអ្វី ក៏លបទៅកាប់កូនប្រសាប្រុសដែលកំពុងតែអង្គុយដាំទឹកឱ្យកូនផឹក ។ ពេលដែលឪពុកក្មេកប្រមឹកកាប់ត្រូវនោះ កូនប្រសាបានព្យាយាមស្រែកឱ្យគេជួយ ទើបមានកូនប្រសាប្រុសម្នាក់ទៀតបានរត់ទៅជួយដែរ ឯឃី ឆន ជាឪពុកក្មេក ក៏រត់គេចខ្លួនបាត់ស្រមោលទាំងយប់តែម្តង ។ ចំណែកបុរសជាកូនប្រសាត្រូវក្រុមគ្រួសារដឹកតាមរ៉ឺម៉កទៅកាន់មន្ទីរពេទ្យស្រុកកំពង់ត្រាចដើម្បីសង្គ្រោះ ។ តាមសម្តីស្ត្រីជាម្តាយក្មេកបាននិយាយថា ប្តីរបស់គាត់មិនដែលទាស់សម្តីគ្នាជាមួយកូនប្រសាម្តងណាទេ ប៉ុន្តែនៅពេលមុនកើតហេតុ ប្តីរបស់គាត់បានត្រឡប់មកពីហូបការគេវិញ ហើយមិនដឹងថា មានរឿងអ្វីនោះទេស្រាប់តែកាប់កូនប្រសាបែបនេះ ។
លោកលឹម ហុកសេង មេបញ្ជាការកងរាជអាវុធហត្ថស្រុកកំពង់ត្រាចមានប្រសាសន៍ថា ករណីដែលឪពុកក្មេកកាប់កូនប្រសានេះ មិនទាន់ដឹងពីមូលហេតុជម្លោះនៅឡើយទេ ប៉ុន្តែឪពុកក្មេករូបនោះត្រូវគេនិយាយថា ដោយសារផឹកគ្រឿងស្រវឹងច្រើន ហើយឥឡូវសមត្ថកិច្ចកំពុងតែតាមស្វែងរកជនដៃដល់ដើម្បីចាត់ការតាមច្បាប់ ៕
ចែករំលែកព័តមាននេះ