ខេត្តបាត់ដំបង ៖ ជនសង្ស័យចំនួន៤នាក់ ដែលពាក់ព័ន្ធនឹងការជួញដូរគ្រឿងញៀនត្រូវបានកម្លាំងអធិការក្រុង សហការជាមួយកម្លាំងការិយាល័យព្រហ្មទណ្ឌកំរិតស្រាល និងការិយាល័យប្រឆាំងគ្រឿងញៀន ឃាត់ខ្លួនបានជាបន្តបន្ទាប់ កាលពីថ្ងៃទី២២ មីនា ដែលស្ថិតនៅទីកន្លែងផ្សេងគ្នាក្នុងក្រុងបាត់ដំបង ហើយក្នុងចំណោមនោះក៏មានជាប់សាច់ញាតិមន្ត្រីការិយាល័យប្រឆាំងគ្រឿងញៀនម្នាក់ផងដែរ នេះបើតាមប្រភពព័ត៌មានពីសមត្ថកិច្ច។
យោងតាមរបាយការណ៍បឋមរបស់សមត្ថកិច្ចបានឲ្យដឹងថា ជនសង្ស័យទាំង៤នាក់នេះមាន ១,ឈ្មោះវណ្ណ រតនា ភេទប្រុសអាយុ ៣៨ឆ្នាំ នៅភូមិកម្មករ សង្កាត់ស្វាយប៉ោ ក្រុងបាត់ដំបង ២,ឈ្មោះស៊ូ ភក្ដី ស្រីអាយុ៣១ឆ្នាំ ៣,ឈ្មោះសុខ សឿន ប្រុសអាយុ១៧ឆ្នាំ នៅភូមិអូរតាគាំ២ សង្កាត់ទូលតាឯក ក្រុងបាត់ដំបង និង៤,ឈ្មោះខឿន សុខាន ហៅ ខាន់ ប្រុសអាយុ៤០ឆ្នាំ នៅភូមិសូភី១ សង្កាត់រតន: ក្រុងបាត់ដំបង ហើយជនម្នាក់នេះត្រូវគេសង្ស័យថា មានជាប់សាច់ញាតិនឹងមន្ត្រីការិយាល័យប្រឆាំងគ្រឿងញៀនម្នាក់ផងដែរ។
សមត្ថកិច្ចបានប្រាប់ថា ជនសង្ស័យទាំង៤នាក់នេះ ត្រូវកម្លាំងជំនាញបង្ក្រាបបានជាបន្តបន្ទាប់ចំនួន៣លើក នៅកន្លែងផ្សេងៗគ្នានៅក្នុងក្រុងបាត់ដំបង ដែលផ្ដើមចេញពីករណីតែមួយ។ ជាមួយនឹងការបង្ក្រាបក្រុមជួញដូរគ្រឿងញៀនទាំង៣លើក សមត្ថកិច្ចរឹបអូសបានវត្ថុតាងយ៉ាងច្រើនសន្ធឹកសន្ធាប់ផងដែរ។
បើតាមរបាយការណ៍បឋម វត្ថុតាងដែលដកហូតបានសរុបទាំង៣លើក បានឲ្យដឹងថា ថ្នាំញៀនប្រភេទម្ស៉ៅ ICE (ម៉ាទឹកកក) សរុបចំនួន១៤ថង់ ជញ្ជីងសម្រាប់ថ្លឹងថ្នាំញៀនចំនួន២គ្រឿង និងវត្ថុតាងពាក់ព័ន្ធមួយចំនួនទៀត។ ជនសង្ស័យទាំង៤នាក់ រួមទាំងវត្ថុតាងផង ត្រូវបានបញ្ជូនទៅកាន់ការិយាល័យជំនាញហើយ ដើម្បីសួរនាំ និងកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ