ខេត្តស្វាយរៀង ៖ សមត្ថកិច្ចចម្រុះចុះបង្ក្រាប និងឃាត់រថយន្តដឹកជ្រូក០៣គ្រឿងសង្ស័យនាំជ្រូកឆ្លងដែនពីវៀតណាមប្រគល់ឲ្យមន្ត្រីជំនាញការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តដើម្បីចាត់ការតាមនីតិវិធីច្បាប់ ។ ករណីចាប់ឃាត់រថយន្តដឹកជ្រូកនេះកើតឡើងកាលពីវេលាម៉ោង៣និង៤០នាទីរសៀល ថ្ងៃទី២២ មីនា នៅចំណុចក្លោងទ្វាវត្តត្រពាំងធំ ស្ថិតនៅភូមិត្រពាំងធំ ឃុំអង្គប្រស្រែ ស្រុករមាសហែក ។
រថយន្តទី១ម៉ាកហ៊ីយិនដាយ ពាក់ផ្លាកលេខ ភ្នំពេញ 3C-2460 មានជ្រូក៣៥ក្បាល, ទី២រថយន្តម៉ាក TOYOTA HiLux ពាក់ផ្លាកលេខ កំពង់ចាម 2C-2207 មានជ្រូក៧ក្បាល រួចបញ្ជូនទៅមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀងដើម្បីពិនិត្យ ចំណែកទី៣ចាប់ឃាត់រថយន្តមួយគ្រឿងម៉ាក FUSO ពាក់ផ្លាកលេខ ស្វាយរៀង 3A-0906 របស់ក្រុមហ៊ុន ស៊ីភីCP មានជ្រូកចំនួន១០៤ក្បាលសង្ស័យថាជ្រូកវៀតណាមបានចាប់បញ្ជូនទៅមន្ទីរកសិកម្មខេត្តដែរហើយបានធ្វើការបូមឈាមយកទៅពិនិត្យនៅមន្ទីរពិសោធន៍រាជធានីភ្នំពេញដើម្បីធ្វើតេស្តឈាម ។
បើតាមមន្ត្រីនគបាលមូលដ្ឋានឃុំអង្គប្រស្រែបានឲ្យដឹងថា ដោយមានក្រុមឈ្មួញខិលខូចបាននាំជ្រូកពីប្រទសវៀតណាមឆ្លងដែនចូលមកតាមរដ្ឋបាលឃុំអង្គប្រស្រែ ស្រុករមាសហែក ដឹកតាមម៉ូតូរួចមកសាងដាក់ម៉ូតូរ៉ឺម៉ក និងរថយន្តក្នុងមួយយប់ៗមានរ៉ឺម៉កចាប់ពី៣០គ្រឿងទៅ៣៥គ្រឿងក្នុង១គ្រឿង១០ក្បាលបើកូនជ្រូក៣០ក្បាល និងរថយន្តចំនួន៦ទៅ៧គ្រឿងក្នុង១គ្រឿង៣៥ក្បាលទៅ៤០ក្បាលដាក់សាងនៅចំណុចខាងកើតវត្តត្រពាំងធំ និងកែងវត្តត្រពាំងព្រីងគឺចាប់ពី៣០០ក្បាលទៅ៤០០ក្បាល(មានជ្រូកតូចសម្រាប់ខ្វៃ និងជ្រូកធំ) ហើយចាប់ផ្តើមនាំជ្រូកវៀតណាមចូលមកតាមរដ្ឋបាលឃុំអង្គប្រស្រែនេះរយៈពេល៤ថ្ងៃមកហើយចាប់ពីថ្ងៃទី១៩ មីនាមក ។
រីឯបុរស់ម្នាក់បានឲ្យដឹងថា ខ្លួននិងមនុស្សផ្សេងទៀតជាអ្នកស៊ីឈ្នួលដឹកជ្រូកឲ្យឈ្មួញពីព្រំដែនវៀតណាមមកដល់រថយន្តគឺមួយក្បាលតម្លៃ១ម៉ឺនរៀល ។
ទាក់ទិនករណីឃាត់រថយន្តដឹកជ្រូកត្រួតពិនិត្យនេះលោក ហ៊ុន សារ៉េតថន មន្ត្រីចល័តការិយាល័យផលិតកម្ម និងបសុព្យាបាលមន្ទីរកសិកម្មខេត្តមានប្រសាសន៍ ការចាប់ឃាត់រថយន្តដឹកជ្រូកនេះដោយមានការសង្ស័យថា នាំជ្រូកពីប្រទេសវៀតណាមចូលមកកម្ពុជាក្នុងរដ្ឋបាលខេត្តស្វាយរៀងដែលជ្រូកវៀតណាមមានផ្ទុះជម្ងឺប៉េសអាហ្វ្រិកធ្ងន់ធ្ងរ ៕
ចែករំលែកព័តមាននេះ