រាជធានីភ្នំពេញ ៖ អ្នករស់នៅក្នុងរាជធានីភ្នំពេញ ដែលមានជីវភាពធូរធារបាននាំគ្នាទៅរកទិញម៉ាស៊ីនភ្លើងប្រើប្រាស់ និងទុកប្រកបអាជីវកម្មផ្ទាល់ខ្លួនផងដែរ ២-៣ថ្ងៃកន្លងមកនេះ បន្ទាប់ពីចរន្តភ្លើងតែងបានដាច់ជារៀងរាល់ថ្ងៃ ទន្ទឹមនោះ ធ្វើឱ្យអ្នករកស៊ីលក់ម៉ាស៊ីនភ្លើងដែលលក់មិនសូវដាច់ ហាក់កាប់កប ហើយមួយថ្ងៃៗគេឃើញកន្លែងលក់ម៉ាស៊ីនភ្លើង មានមនុស្សម្នាចោមរោមរកទិញយ៉ាងកុះករ ។
នៅព្រឹកថ្ងៃទី២២ មីនា ឆ្នាំ២០១៩នេះ កោះសន្តិភាពក៏បានចុះផ្ទាល់ដល់ហាងលក់ម៉ាស៊ីនភ្លើង នៅតាមបណ្តោយផ្លូវជាតិលេខ៥ ចាប់ពីគល់ស្ពានជ្រោយចង្វា រហូតដល់ទៅមុខប៉ុស្តិ៍នគរបាលរដ្ឋបាលទួលសង្កែ១ ក្នុងសង្កាត់ទួលសង្កែទី១ ដែលជាទីប្រជុំហាងលក់ម៉ាស៊ីនភ្លើងនៅផ្សារតូច ដោយសង្កេតឃើញថា ការលក់ម៉ាស៊ីនភ្លើង បានកាក់កបណាស់ដោយមានភ្ងៀវនាំគ្នាទៅទិញម៉ាស៊ីនភ្លើង គួរកត់សម្គាល់ជាហូរហែ ។
បុគ្គលិកហាងលក់ម៉ាស៊ីនភ្លើងយីហោតាំងណៃស៊ីម ដែលមានទីតាំងនៅខាងជើងគល់ស្ពានជ្រោយចង្វា ក្នុងសង្កាត់ស្រះចក បានឱ្យដឹងថា រយៈពេលប៉ុន្មានថ្ងៃនេះ បន្ទាប់ពីភ្លើងដាច់ជាបន្តបន្ទាប់ អ្នកភ្នំពេញក៏ដូចជា នៅតាមបណ្តាខេត្តជាច្រើនខុសពីសព្វដង បាននាំគ្នាមករកទិញម៉ាស៊ីនភ្លើង ដើម្បីទុកប្រើប្រាស់និងប្រកបមុខរបររបស់ខ្លួនលែងស្ងាត់ដូចមុនហើយ ។
បុគ្គលិករូបនោះ ក៏បានឱ្យដឹងទៀតថា ថ្ងៃធម្មតា ហាងលក់ម៉ាស៊ីនភ្លើងនេះ បានលក់ដាច់ប្រមាណ៣ទៅ៤គ្រឿងប៉ុណ្ណោះ តែប៉ុន្មានថ្ងៃនេះ លក់ដាច់ក្នុងមួយថ្ងៃប្រមាណពី៣០ទៅ៤០គ្រឿង និងថ្ងៃខ្លះលើសពីនេះ ។ នៅ៣ថ្ងៃមុន បន្ទាប់ពីភ្លើងដាច់បានមួយថ្ងៃ ម៉ាស៊ីនភ្លើង កម្លាំង៦គីឡូកន្លះ គ្រាន់តែនាំមកដល់ភ្លាម តែមួយព្រឹកដាច់អស់ចំនួន៣០គ្រឿង ។
មិនថាតែម៉ាស៊ីនភ្លើងតូចធំនោះទេ គីលក់ដាច់ទាំងអស់ ដែលអ្នកខ្លះ ប្រើជាលក្ខណៈគ្រួសារ ។ បើសមាជិកតិច ទិញអាតូច និងខ្លះទៀតទិញម៉ាស៊ីនធំដើម្បីប្រកបមុខរបររកស៊ីរបស់ខ្លួនជាហាងកាហ្វេអាជីវករខ្នាតតូចជាដើម ។ តាមព័ត៌មានឱ្យដឹងទៀតថា មិនតែហាងនេះទេ នៅមានក្រុមហ៊ុន និងហាងលក់ម៉ាស៊ីនភ្លើង ជាច្រើនទៀត នៅតាមផ្លូវជាតិលេខ៥ ផ្សារតូចក៏ដូចហាងលក់ម៉ាស៊ីនភ្លើងផ្សេងៗទៀតក៏លក់ដាច់ដូចគ្នាដែរដាច់ផុយ ។
តាមអ្នកទិញម៉ាស៊ីនភ្លើងម្នាក់បានប្រាប់ឱ្យដឹងថា រយៈពេលប្រមាណ៥ថ្ងៃមកហើយ ដែលភ្លើង នៅក្នុងរាជធានីភ្នំពេញដាច់ជារៀងរាល់ថ្ងៃ មិនមែនប៉ះពាល់តែការរស់នៅទេ តែបានប៉ះពាល់ដល់ការប្រកបមុខរបរ ។ គាត់ទទួលស្គាល់បញ្ហាខ្វះថាមពលអគ្គិសនីដែលប្រើពុំគ្រប់ ហើយខាងក្រុមហ៊ុនអគ្គិសនី ផ្តាច់កន្លែងនេះបើកកន្លែងនោះដូរគ្នាជារៀងរាល់ថ្ងៃ ។
បើកន្លែងណាមានសារសំខាន និងមានអ្នកធំរស់នៅច្រើនមិនសូវដាច់ប៉ុន្មាននោះទេ ។ ទន្ទឹមភ្លើងដាច់ប៉ុន្មានថ្ងៃនេះ គេក៏ឃើញនៅតាមស្តុបមួយចំនួនក៏បានកកស្ទះចរាចរណ៍ ហើយមន្ត្រីនគរបាលប្រចាំ ទៅតាមបណ្តាស្តុបនៅក្នុងរាជធានីភ្នំពេញ ក៏មានការមួហ្មង ដោយសារអត់បាយអត់ទឹក ក្នុងការសម្រួលចរាចរណ៍ផងដែរ ។ ក្រៅពីនោះ ទឹកប្រើប្រាស់ក៏បានដាច់ទៀត នៅតាមតំបន់ខ្លះគឺពិតជាវេទនា ព្រោះកំពុងតែអត់ទឹកប្រើផងស្រាប់តែដាច់ភ្លើង ដាច់ទឹក រួមផ្សំខែក្តៅផង តើនរណាមិនវេទនារឿងអត់ទឹកអត់ភ្លើងនោះ ។
មន្ត្រីរដ្ឋាភិបាលសូមឱ្យពលរដ្ឋអត់ធ្មត់ការកាត់ចរន្តអគ្គិសនីមន្ត្រីអ្នកនាំពាក្យរាជរដ្ឋាភិបាលនិងក្រសួងរ៉ែនិងថាមពលនៅរសៀលថ្ងៃទី២២ មីនា បានប្រកាសសូមឱ្យពលរដ្ឋមេត្តាអត់ធ្មត់ចំពោះបញ្ហាដាច់ភ្លើងក្នុងមួយរយៈពេលខ្លីនេះ ព្រោះមានការប្រើប្រាស់កើនឡើងខុសពីការគ្រោងទុកនិងការសម្រេចកាត់ចរន្តនេះ ធ្វើទាំងបង្ខំចិត្តនិងឈឺចាប់បំផុត ហើយការកាត់ធ្វើឡើងក្នុងពេលថ្ងៃយូរជាងពេលយប់ មិនមានការកាត់ផ្តាច់នៅថ្ងៃអាទិត្យនិងថ្ងៃបុណ្យទេ ។
លោក ទី ណារិន្ទ រដ្ឋលេខាធិការក្រសួងរ៉ែនិងថាមពលបានថ្លែងថា ការខ្វះខាតចរន្តភ្លើងបណ្តាលមកពីខ្វះខាតទឹក ។ លោកថា ការទិញភ្លើងពីប្រទេសតួកគី រយៈពេលជាង៦០ថ្ងៃទៀតទើបមកដល់កម្ពុជា ដឹកតាមកប៉ាល់ ហើយអ្នកជំនាញពីប្រទេសនេះចំនួនពីររូបនឹងមកសិក្សាពីបញ្ហាថា តើត្រូវដាក់ម៉ាស៊ីននេះនៅចំណុចណានិងតបណ្តាញយ៉ាងមេច ។
លោកបានបន្តថា នៅក្នុងឆ្នាំ២០១៨កន្លងមកនេះ កម្ពុជាប្រើប្រាស់ភ្លើងប្រមាណ៩៣០០លានគីឡូវ៉ាត់ម៉ោង ។ ការប្រើប្រាស់ជាមធ្យមក្នុងថ្ងៃប្រមាណ២៥,៥លានគីឡូវ៉ាត់ម៉ោង ហើយជាធម្មតាបទពិសោធន៍របស់យើងរយៈកន្លងមកនេះ ការប្រើកើនឡើងរហូតចុងឆ្នាំ២០១៩កើនពី២៥,៥លានគីឡូវ៉ាត់ម៉ោង ដល់២៧លានគីឡូវ៉ាត់ម៉ោង ឬ២៩លានគីឡូវ៉ាត់ម៉ោង។ សម្រាប់ក្នុងខែមករា កុម្ភៈនិងមីនា ឡើង ។ លោកបន្តថា ការឡើងគំហុកនេះបានធ្វើឲ្យយើងដឹងពីការប្រើប្រាស់ការត្រៀមចំណុចទី២ ដោយការបញ្ឆេះម៉ាស៊ីនដែលបានត្រៀមទុកទាំងអស់ ។
ម៉ាស៊ីនទាំងនោះប្រើប្រាស់ប្រេងនិងមានការចំណាយថ្លៃ តែចាំត្រូវប្រើបន្ទាន់ ។ មានទម្ងន់នៅក្នុងឆ្នាំ២០១៩នេះមានបញ្ហាអាកាសធាតុគ្មានភ្លៀងគ្រប់គ្រាន់និងចុងឆ្នាំ២០១៨នេះ ការប្រើប្រាស់ចរន្ត ព្រោះកម្តៅឡើង ។ ការនេះមិនអាចទៅធ្វើប្រភពអគ្គិសនីមួយទាំន់ពេលទេ ។លោកបានលើកឡើងថា ក្រសួងបានស្វែងរកវិធានការយ៉ាងណាកុំឲ្យមានការកាត់ភ្លើងចំពោះអ្នកប្រើប្រាស់ក្នុងប្រទេស ។
ជាពិសេសចំពោះអ្នកប្រើប្រាស់សហគ្រាស និងក្រុមហ៊ុនធំៗដោយបានពិនិត្យមើលលើការប្រើប្រាស់ពួកគាត់ដោយឲ្យបញ្ឆេះម៉ាស៊ីនផ្ទាល់ និងធ្វើឲ្យតំបន់នោះមិនដាច់ភ្លើង តែមានអ្នកប្រើប្រាស់ខ្លះមិនព្រមបញ្ឆេះម៉ាស៊ីនទេធ្វើឲ្យតំបន់នោះមានការកាត់ចរន្ត ដោយតម្រូវច្រើនពីអ្នកប្រើប្រាស់ធំៗ ។ លោកថា បញ្ហានាំចូលអគ្គិសនីប្រទេសថៃ ឡាវនិងវៀតណាម ដែលពីមុនទទួលពីគេតែប្រមាណ១២០ ឬ១៧០លានគីឡូវ៉ាត់ម៉ោង រហូតដល់២០០លានគីឡូវ៉ាត់ម៉ោង ។ ប៉ុន្តែពីឡាវប្រើបានតែខេត្តព្រះវិហារនិងខេត្តកំពង់ធំ ។
លោករដ្ឋលេខាធិការបានអះអាងថា៖«ជាធម្មតាយើងត្រូវការចំនួន៣១លានគីឡូវ៉ាត់ ម៉ោង ក្នុងនោះបានមកពីម៉ាស៊ីនមិនប្រើចរន្តទឹក ប្រើប្រេង ប្រើសូឡាជាដើមផលិតបានថាមពលប្រមាណ១៥,៣លានគីឡូវ៉ាត់ម៉ោង ទោះបីជាអត់ទឹកក៏ដើរបានដែរ» ។ លោកថា កាលពីមុននាំចូលចនរន្តបានតែ៦លានគីឡូវ៉ាត់ម៉ោង ក្នុងមួយថ្ងៃ ។ តែពេលនេះប្រទេសថៃនិងឡាវផ្តល់បានបន្ថែម យើងអាចនាំចូល៨,២លានគីឡូវ៉ាត់ម៉ោងក្នុងមួយថ្ងៃ ។
លោកបានលើកឡើងថា ដោយសារតែគ្មានទឹក ការផលិតអគ្គិសនីមានការថយចុះដូច្នេះការប្រើប្រាស់ត្រូវកាត់បន្ថយពី៧,៥លានគីឡូវ៉ាត់ម៉ោង មកត្រឹម៣,៥លានគីឡូវ៉ាត់ម៉ោងក្នុងមួយថ្ងៃ នៅទូទាំងប្រទេសវិញ ។ លោកថាតាមសេចក្តីត្រូវការសរុប៣១លានគីឡូវ៉ាត់ម៉ោងក្នុងមួយថ្ងៃ យើងមានតែ២៧លានគីឡូវ៉ាត់ម៉ោងនៅខ្វះ៤លានគីឡូវ៉ាត់ម៉ោងទៀតក្នុងមួយថ្ងៃ ។
លោកបានពន្យល់ថា មានតែប្រើប្រាស់វិធានការចុងក្រោយ គឺការកាត់ភ្លើងចាប់កាត់ពីម៉ោង៦យប់អ្នកប្រើប្រាស់៦០% ហើយការប្រើប្រាស់ពេលថ្ងៃមានប្រមាណ៣០%ទេ ។ ដូច្នេះកាត់ពេលថ្ងៃបានថាមពលតិចតែបានច្រើនម៉ោង និងកាត់ពេលយប់បានថាមពលច្រើនតែរយៈកាត់ខ្លីជាង ។ ដូចនេះអ្នកជំនាញសម្រេចកាត់ពេលថ្ងៃ(៦ម៉ោង) មិនប៉ះពាល់ច្រើនដូចពេលយប់ព្រោះពលរដ្ឋចេញពីផ្ទះច្រើនជាងពេលយប់ ។ សម្រាប់ថ្ងៃអាទិត្យនិងថ្ងៃបុណ្យមិនកាត់ទេ ហើយគិតពីពេលនេះរហូតដល់ចុងខែឧសភាមានរយៈពេល៦៩ថ្ងៃ និងដកចេញ២២ថ្ងៃបុណ្យនិងថ្ងៃអាទិត្យមិនកាត់ទេ ។
លោកបានអះអាងថា សម្រាប់ឆ្នាំ២០២០មិនមានការខ្វះខាតចរន្តភ្លើងទេ ព្រោះឆ្នាំ២០១៩នេះជាបទពិសោធន៍ ដោយយើងបានត្រៀមហើយ ។ ការខ្វះខាតនេះដោយមានការវិនិយោគច្រើនប្រើប្រាស់ច្រើន ។ តំបន់ដែលត្រូវការច្រើនមានភ្នំពេញ ខេត្តកណ្តាល កំពង់ស្ពឺ សៀមរាប ខេត្តព្រះសីហនុ ដែលមានការអភិវឌ្ឍន៍ច្រើនដូចនេះការប្រើប្រាស់មានការកើនឡើងយ៉ាងគំហុក ។ លោកថ្លែងថា មានជំរើសពីរដែលត្រូវសម្រេចនាពេលនេះកាត់ភ្លើងពេលយប់ឬពេលថ្ងៃ។ លោកថា« ដូចនេះយើងត្រូវសម្រេចកាត់ពេលថ្ងៃព្រោះប៉ះពាល់អ្នកប្រើប្រាស់ទូទៅតិចជាងពេលយប់ ។ នេះជាការសម្រេចចិត្តរបស់យើងទាំងឈឺចាប់ និងផ្អាកការទទួលស្នើសុំភ្ជាប់ចរន្តថ្មីពីអ្នកវិនិយោគធំៗសិនក្នុងរយៈពេលនេះ» ។
ចំណែកលោក ផៃ ស៊ីផាន វិញបានថ្លែងថាចំពោះផែនការខ្លីនិងផែនការវែងនោះ ក្រសួងរ៉ែនិងថាមពល សូមទិញអគ្គិសនីពីក្រុមហ៊ុនធំៗមកវិញដោយឲ្យតម្លៃច្រើនជាងរដ្ឋលក់ឲ្យក្រុមហ៊ុនទៀត ។ រដ្ឋាភិបាលបានដឹងពីការប្រឈមនេះដោយសារការផលិតថាមពលនេះពឹងលើទឹកភ្លៀងដែលធ្លាក់ពីលើមេឃ តែដោយការប្រែប្រួលអាកាសធាតុ ។ លោកថានេះមិនមែនជាវិបត្តិអគ្គិសនីទេ គ្រាន់តែជាការប្រឈមក្នុងរយៈពេលខ្លីប៉ុណ្ណោះ ។
លោកបានលើកឡើងថា «សូមឲ្យប្រជាពលរដ្ឋអធ្យាស្រ័យផង ព្រោះការខ្វះខាតនេះមានរយៈពេលខ្លីទេ» ។ លោកថាសូមអរគុណចំពោះការយោគយល់និងអធ្យាស្រ័យនិងការឆ្លើយតប ការខ្វះខាតថាមពលអគ្គិសនីក៏ដូចជាការរអាក់រអូល ។ បញ្ហាកើតឡើងពីការប្រែប្រួលអាកាសធាតុក្តៅខ្លាំងនិងបណ្តាលឲ្យខ្វះទឹកខុសប្រក្រតី រួមផ្សំនឹងការប្រើប្រាស់កើនឡើងយ៉ាងគំហុក ក្នុងវិស័យសំណង់ផងដែរដែលមានកំណើនរហូតដល់៧០០% ។
លោកបន្តថា ទោះបីយ៉ាងណានេះគឺជាការប្រឈមមួយរយៈពេលខ្លី សម្រាប់កម្ពុជា ហើយអាចអូសបន្លាយដល់ត្រឹមចុងខែឧសភា គឺមានរយៈពេល២ខែ ដែលមានកង្វះខាតថាមពលអគ្គិសនីចំនួន៤០០មេហ្គាវ៉ាត់ ស្មើនឹង១៣%នៃការផ្គត់ផ្គង់សម្រាប់ការប្រើប្រាស់ទូទៅ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ