ខេត្តកំពង់ឆ្នាំង ៖ ស្ថិតលើផ្លូវខ្វែងទិសមើលគ្នាមិនឃើញ បណ្តាលម៉ូតូបុកជាមួយរ៉ឺម៉កម៉ូតូស្លាប់បុរសម្នាក់របួសធ្ងន់៣នាក់ កើតឡើងកាលពីវេលាម៉ោង៤ និង១០នាទីរសៀលថ្ងៃទី២២ មីនា ក្នុងភូមិជំពារ ឃុំព្រៃគ្រី ស្រុកជលគិរី ។
មេបញ្ជាការកងរាជអាវុធហត្ថស្រុកជលគីរីឱ្យដឹងថា បុរសដែលស្លាប់ឈ្មោះស្រន ជ្រឿន អាយុ៥៥ឆ្នាំរស់នៅភូមិព្រៃគ្រីជើង ឃុំព្រៃគ្រី ស្រុកជលគីរី ។ ចំណែកអ្នករួមដំណើរ២នាក់ទៀតរងរបួសធ្ងន់ ម្នាក់ឈ្មោះ ម៉ែត ភូម អាយុ ៤៩ ឆ្នាំ ជាប្រពន្ឋ និងម្នាក់ទៀតឈ្មោះជ្រឿន ស្រីណាក់ ភេទស្រី អាយុ២៦ឆ្នាំត្រូវជាកូន ។ ប្រភពដដែលបន្តថា នៅមុនពេលកើតហេតុ ជនរងគ្រោះឈ្មោះ ស្រន ជ្រឿន បានជិះម៉ូតូម៉ាកHONDA C125 ពណ៌ខ្មៅ ពាក់ផ្លាកលេខ កំពង់ឆ្នាំង 1H .0289 ដឹកប្រពន្ឋនិងកូនស្រីពីក្រោយ ក្នុងដំណើរពីជើងទៅត្បូង ។
លុះជិះមកដល់ចំណុចកើតហេតុ បានបុកជាមួយរ៉ឺម៉កម៉ូតូដឹកទឹកកក១គ្រឿង បើកបរដោយឈ្មោះបឿន ថេត អាយុ២០ឆ្នាំ រស់នៅភូមិព្រៃគ្រីត្បូង ឃុំ ឃុំព្រៃគ្រី ក្នុងដំណើរពីកើតទៅលិច ក្នុងទិសខ្វែងគ្នា បណ្តាលឱ្យបុរសអ្នកបើកម៉ូតូស្លាប់នៅនឹងកន្លែង ចំណែកប្រពន្ធកូន និងអ្នកបើករ៉ឺម៉ក ម៉ូតូក៏រងរបួសធ្ងន់ទាំងអស់គ្នា ។
ក្រោយពេលកើតហេតុ ជនរងគ្រោះត្រូវបានដឹកទៅសង្គ្រោះនៅមណ្ឌលសុខភាព ស្រុកជលគីរី ចំណែក មធ្យោបាយធ្វើដំណើរត្រូវបានយកទៅរក្សាទុក នៅអធិការដ្ឋាននគរបាលដើម្បីរង់ចាំការដោះស្រាយតាមផ្លូវច្បាប់ ។ ដោយឡែកសពជនគ្រោះត្រូវបានយកទៅធ្វើបុណ្យតាមប្រពៃណី ។
សមត្ថកិច្ចកងរាជអាវុធហត្ថបានអោយដឹងថាៈ គ្រោះថ្នាក់ចរាចរណ៍ខាងលើ គឺបណ្តាលមកពីផ្លូវខ្វែងទិស ចំណុចកើតហេតុមានព្រៃបាំង មិនអាចមើលគ្នាឃើញ ចំណែកអ្នកបើកបរខ្វះការប្រុងប្រយ័ត្ន ដោយបើកក្នុងល្បឿនលឿន ពេលមកដល់ចំណុចផ្លូវខ្វែងទិស ៕
ចែករំលែកព័តមាននេះ