ប្រទេសវេណេស៊ុយអេឡា ៖ ដៃស្ដាំរបស់មេដឹកនាំប្រឆាំងវេណេស៊ុយអេឡា លោកJUAN GUAIDO ប្រធានាធិបតីស្ដីទីប្រកាសដោយខ្លួនឯង បានត្រូវចាប់ខ្លួនកាលពីថ្ងៃទី២១មីនា ហើយទទួលការចោទប្រកាន់ពីបទភេរវកម្ម ក្នុងការឆ្មក់ចាប់មួយនាពេលយប់ក្នុងគេហដ្ឋានរបស់គេ ដែលការចាប់ខ្លួនជននេះនាំឲ្យមានការថ្កោលទោសនៅឯបរទេស។
សមាជិកសភាលោកROBERTO MARRERO អាយុ៤៩ឆ្នាំប្រមុខខុន្ទកាល័យរបស់លោកJUAN GUAIDO ត្រូវចាប់ខ្លួននៅផ្ទះរបស់លោកនាវេលាម៉ោង២រំលងអាធ្រាត្រម៉ោងក្នុងស្រុកថ្ងៃទី២១មីនា ដោយពួកភ្នាក់ងារសើុបការណ៍។ រដ្ឋមន្ត្រីមហាផ្ទៃលោកNESTOR REVEROL ចោទប្រកាន់ជននោះថា ជាអ្នកទទួលខុសត្រូវដោយផ្ទាល់លើការបង្កើតបណ្ដាក្រុមឧក្រិដ្ឋ ដែលរៀបចំផែនការវាយប្រហារក្នុងប្រទេស។ លោកអះអាងថាអាវុធធ្វើសង្គ្រាមជាច្រើនដើមព្រមទាំងប្រាក់ជារូបិយប័ណ្ណត្រូវបានរឹបអូស ក្នុងពេលឆ្មក់ចាប់នោះ។
សម្រាប់លោកGUAIDOដែលទទួលស្គាល់ដោយប្រទេសប្រមាណជាជាង៥០ ក្នុងនោះមានសហរដ្ឋអាមេរិក ដែលគំរាមធ្វើអន្តរាគមន៍យោធាលើវេណេស៊ុយអេឡានិយាយថា ការចាប់ខ្លួនដៃស្ដាំរបស់លោកនោះ គឺជាល្បិចកលមួយសំដៅសម្លុតបំភ័យ។ ពួកគេចាប់ខ្លួននាយកខុន្ទកាល័យរបស់លោកដោយចោទថា មានកាំភ្លើង២ដើមនិងគ្រាប់បែកដៃមួយគ្រាប់ ដែលគេលួចយកទៅដាក់ក្នុងផ្ទះ។
ការចាប់ខ្លួនលោកMARREROត្រូវបានថ្កោលទោសដោយរដ្ឋមន្ត្រីការបរទេសអាមេរិក លោកMIKE POMPEO អនុប្រធានាធិបតីអាមេរិកលោកMIKE PENCE ព្រមទាំងលោកJOHN BOLTON ទីប្រឹក្សាសន្តិសុខជាតិអាមេរិក។ លោកMIKE PENCEនិយាយថា យើងនឹងមិនអត់ឱនឡើយដល់ការចាប់ឃុំឃាំងឬការសម្លុតបំភ័យ។ ចំណែកអ.ស.បវិញបានស្នើឲ្យរារាំងរាល់ការបង្កើនភាពតានតឹង។
អ្នកនាំពាក្យម្នាក់របស់អ.ស.បនិយាយថា យើងលើកជាថ្មីពីការអំពាវនាវរបស់យើង ឲ្យគ្រប់ភាគីវេណេស៊ុយអេឡា ចាត់បណ្ដាវិធានការបន្ទាន់នានា ដើម្បីសម្រាលភាពតានតឹង៕
ចែករំលែកព័តមាននេះ