ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃទី ១៨កន្លងមកថា ក្រុមហ៊ុនឯកជនជាច្រើនក្នុងវិស័យថាមពលបៃតងពេញចិត្តនឹងគម្រោងអភិវឌ្ឍន៍ថាមពលជាតិថ្មីសម្រាប់ឆ្នាំ ២០១៨ ដល់ ២០៣៧។ គម្រោងនេះស្នើឲ្យមានការអនុញ្ញាតបន្តិចម្តងឲ្យវិនិយោគិនចូលរួមក្នុងគម្រោងផលិតអគ្គិសនីពីកាកសំណល់ ដាក់គោលដៅផលិតថាមពលឲ្យបាន ៥០០មេហ្កាវ៉ាត់ពីកាកសំណល់នៅឆ្នាំ២០៣៧។
មូលហេតុមួយដែលបង្កឲ្យមានងាកនេះគឺមកពីប្រទេសថៃចាប់ផ្តើមផ្តោតសំខាន់លើការគ្រប់គ្រងកាកសំណតល់ក្នុងប្រទេស។ នាយកដ្ឋានគ្រប់គ្រងកង្វក់បរិស្ថានបានព្យាករណ៍ថាកាកសំណល់រឹងមធ្យមក្នុងប្រទេសថៃនឹងកើនឡើងពី ៤០,៦៦២តោនក្នុងមួយថ្ងៃនៅឆ្នាំ ២០០៨ មកស្មើ ៤២,៩០០តោនក្នុងឆ្នាំ ២០២៣។ គម្រោងអភិវឌ្ឍន៍ថ្មីអនុញ្ញាតឲ្យភ្នាក់ងារជាប់ពាក់ព័ន្ធអនុវត្តគំរូអាជីវកម្ម និងបង្កើតជាលក្ខខណ្ឌសម្រាប់អនុញ្ញាតឲ្យវិនិយោគិនឯកជនចូលរួម។
អ្នកស្រី Naruphat Amornkosit ដែលជាអគ្គលេខាធិកានៃគណៈកម្មាធិការនិយ័តកម្មថាមពល(ERC) របស់ប្រទេសថៃបាននិយាយថាពួកគេនឹងមានការប្រកាសពីការផ្តល់ប័ណ្ណអនុញ្ញាតសម្រាប់គម្រោងផលិតអគ្គិសនីពីកាកសំណល់ក្នុងខែនេះ។
អ្នកស្រីបានបន្តថា “ERC នឹងពិចារណាលើគំរូអាជីវកម្ម និងសមត្ថភាពក្នុងការផ្តល់ប័ណ្ណអនុញ្ញាតពីរប្រភេទគឺក្រុមហ៊ុនផលិតថាមពលខ្នាតតូចដែលមានសមត្ថភាពផលិតប្រមាណរវាងពី១០ ទៅ៩៩មេហ្កាវ៉ាត់ និង ក្រុមហ៊ុនផលិតថាមពលខ្នាតតូចខ្លាំងដែលមានសមត្ថភាពផលិតក្រោម១០មេហ្កាវ៉ាត់”។
អ្នកស្រីបានបន្ថែមថា កិច្ចព្រមព្រៀងទិញថាមពលនឹងមានរយៈពេលពី២០ទៅ២៥ឆ្នាំ ហើយរដ្ឋាភិបាលមានគម្រោងទិញអគ្គិសនីដែលបង្កើតចេញពីប្រភពទាំងនេះផងដែរ ហើយអ្នកដែលទទួលបានការអនុញ្ញាតត្រូវតែគោរពតាមច្បាប់រួមគឺការអភិវឌ្ឍន៍ឲ្យបានលឿនក្នុងរយៈពេលដែលបានចែងទុកដើម្បីជៀសវាងការពន្យាពេល។
ចែករំលែកព័តមាននេះ