រាជធានីភ្នំពេញ ៖ សម្តេចពិជ័យសេនាទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ កាលពីថ្ងៃទី២១ ខែមីនា ឆ្នាំ២០១៩នេះ បានអញ្ជើញបំពាក់មេដាយការងារជូនដល់កងកម្លាំងមួកខៀវកម្ពុជាចំនួន១៨៤នាក់…
រាជធានីភ្នំពេញ ៖ សម្តេចពិជ័យសេនាទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ កាលពីថ្ងៃទី២១ ខែមីនា ឆ្នាំ២០១៩នេះ បានអញ្ជើញបំពាក់មេដាយការងារជូនដល់កងកម្លាំងមួកខៀវកម្ពុជាចំនួន១៨៤នាក់ បានបញ្ចប់បេសកកម្មក្រោមឆ័ត្រនៃអង្គការសហប្រជាជាតិនៅសាធារណៈរដ្ឋលីបង់ដែលបានបញ្ចប់បេសកកម្មកាលពីចុងខែមករា ឆ្នាំ២០១៩កន្លងទៅ ។
ពិធីនេះបានធ្វើឡើងនៅទីស្តីការគណៈរដ្ឋមន្ត្រីដោយមានលោកស្រី Paulin Tamesis តំណាងUN ប្រចាំប្រទេសកម្ពុជាចូលរួមផងដែរ ។ ក្នុងពិធីបំពាក់មេដាយការងារជូនកងកម្លាំងរក្សាសន្តិភាពរបស់កម្ពុជានៅថ្ងៃទី២១ ខែមីនា នេះនៅទីស្តីការគណៈរដ្ឋមន្ត្រីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានថ្លែងថា «ការដែលរដ្ឋាភិបាលបំពាក់មេដាយដល់កងកម្លាំងមួកខៀវនេះដោយសារពួកគេមានស្នាដៃដ៏ធំធេងនៅលើឆាកអន្តរជាតិ លើផ្នែកវិស្វកម្ម និងបោសសម្អាតមីន ក្នុងក្របខ័ណ្ឌ របស់អង្គការសហប្រជាជាតិ» ។
សម្តេចពិជ័យទៀបាញ់បានថ្លែងថា ក្នុងរយៈពេលជាង១២ឆ្នាំកន្លងទៅនេះកងកម្លាំងកម្ពុជា ដែលធ្លាប់ពាក់ស្លាកសញ្ញារបស់ អ.ស .ប នៅលើឯកសណ្ឋានបានក្លាយជាគ្រួសារមួយរបស់ អ.ស.ប និងជាបងប្អូនលើសកលលោក ។ ក្នុងពេលបំពេញបេសកកម្មម្តងៗកងកម្លាំងកម្ពុជាតែងតែបានចែករំលែកនូវជំនាញ និងបទពិសោធន៍ល្អៗជាមួយបណ្តាប្រទេសដែលរងគ្រោះដោយសារជម្លោះ និងអស្ថេរភាព ដើម្បីជួយរំលែកទុក្ខ និងសង្គ្រោះអាយុជីវិតដ៏ច្រើនផងដែរ។
លោកស្រីPaulin Tamesis អ្នកសម្របសម្រួលអង្គការសហប្រជាជាតិប្រចាំកម្ពុជាមានប្រសាសន៍ថា ប្រតិបត្តិការសន្តិភាពរបស់អង្គការសហប្រជាជាតិនៅតាមកន្លែងជាច្រើនកងរក្សាសន្តិភាពត្រូវធ្វើការចល័តនៅកន្លែងដែលប្រឈមនឹងហានិភ័យជួបនឹងជម្លោះហិង្សា និងជម្លោះប្រដាប់អាវុធ ហើយពេលខ្លះកងរក្សាសន្តិភាពត្រូវប្រឈមនឹងហានិភ័យផ្ទាល់ខ្លួនក៏ដោយក៏កម្លាំងរក្សាសន្តិភាព ជួយសហគមន៍ឱ្យមានភាពនឹងនរផ្តល់ការការពារដល់ជនស៊ីវិល លើកកម្ពស់ច្បាប់នីតិរដ្ឋ និងជំរុញសិទ្ធិមនុស្ស ដើម្បីបុព្វហេតុក្នុងការបង្កើតសន្តិភាព និងសកម្មភាពផ្នែកមនុស្សធម៌ ។
លោកស្រី លើកឡើងទៀតថា ការតាំងចិត្តរបស់កងកម្លាំងមួកខៀវកម្ពុជាក្នុងការការពារ និងជួយដល់ប្រជាជនដែលមានតម្រូវការ និងរងដោយជម្លោះផ្ទៃក្នុងប្រទេស ។ ទ័ពមួកខៀវត្រូវផ្តល់ការការពារដល់ជនភៀសខ្លួនរាប់លានអ្នក និងគាំទ្រដល់ការសង្គ្រោះអាយុជីវិតតាមរយៈការផ្តល់ជំនួយមនុស្សធម៌ដែលកម្ពុជាបានធ្វើក្នុងបេសកកម្មដូចជា ការងារកសាងផ្លូវ ស្ពាន និងបោសសម្អាតមីននេះហើយ ។
លោកនាយឧត្តមសេនីយ សែម សុវណ្ណនី អនុប្រធានគណៈកម្មាធិការជាតិគ្រប់គ្រងកងកម្លាំងរក្សាសន្តិភាព និងជាអគ្គនាយកមជ្ឈមណ្ឌលជាតិរក្សាសន្តិភាពមានប្រសាន៍ថា« កងកម្លាំងវិស្វកម្មពហុជំនាញ១៨៤នាក់ ក្នុងបេសកកម្មអង្គការសហប្រជាជាតិនៅប្រទេសលីបង់ គឺបានធ្វើមាតុភូមិនិវត្តន៍កាលពីចុងខែមករា ឆ្នាំ២០១៩កន្លងទៅ ហើយកម្លាំងនេះបានបំពេញការងាររយៈពេល១ឆ្នាំលើផ្នែកវិស្វកម្ម និងការងារបោសសម្អាតមីន» ។ លោកបានបញ្ជាក់ថា បេសកកម្មនៅសាធារណរដ្ឋលីបង់ជាឆ្នាំទី០៩ ដែលបានចូលរួមអនុវត្តបំពេញភារកិច្ចប្រកបដោយផ្លែផ្កាទទួលបានជោគជ័យដ៏ត្រចះត្រចង់ ។
កងទ័ពនេះឈរជើងនៅភាគខាងកើតក្នុងក្រុងម៉ាចាយ័ន (MARJAYOUN) នៃសាធារណរដ្ឋលីបង់ ដោយបានចូលរួមបំពេញភារកិច្ចបោសសំអាតមីនបម្រើឲ្យការសាងសង់ និងជួសជុលបង្គោលព្រំដែនសន្តិភាព (Blue Barrel) សាងសង់មន្ទីរពេទ្យ សាងសង់សំណង់ប៉ុស្តិ៍ ថ្នល់ របាំងការពារគ្រាប់ និងសំណង់ផ្សេងៗទៀត ជូនដល់កងទ័ពមួកខៀវ មកពីបណ្តាប្រទេសមួយចំនួន ប្រចាំនៅតំបន់បេសកកម្ម ស្ថិតនៅតាមព្រំដែន រវាងប្រទេស លីបង់ ស៊ីរី និងអ៊ីស្រាអ៊ែល ។
សូមបញ្ជាក់ថា មកទល់នឹងពេលនេះកម្ពុជាបានបញ្ជូនកម្លាំងសរុបចំនួន៥៩៦៩នាក់ ក្នុងនោះ មាននារីចំនួន២៩០នាក់ទៅកាន់បេសកកម្មចំនួន១០ក្នុងប្រទេសចំនួន៨នៅទ្វីបអាហ្វ្រិក និងមជ្ឈឹមបូព៌ាលើជំនាញបោសសំអាតមីន វិស្វកម្មសំណង់ផ្តេក-បញ្ឈរ តម្រួតសណ្តាប់ធ្នាប់ មន្ទីរពេទ្យកំរិត២ វិស្វកម្មព្រលានយន្តហោះ និងកម្ទេចគ្រាប់មិនទាន់ផ្ទុះ ៕
ចែករំលែកព័តមាននេះ