ខេត្តប៉ៃលិន ៖ កម្លាំងជំនាញនៃអធិការដ្ឋាននគរបាលស្រុកសាលាក្រៅបានសហការជាមួយ និងកម្លាំងប៉ុស្តិ៍នគរបាលរដ្ឋបាលឃុំស្ទឹងត្រង់ ធ្វើការចុះបង្ក្រាបករណីរក្សាទុក និងជួញដូរនូវសារធាតុញៀនខុសច្បាប់មួយករណី ខណ:មនុស្សក្មេងចាស់នៅក្នុងភូមិតែងនាំគ្នាទិញពីពួកគេយកទៅប្រើប្រាស់យ៉ាងពពាក់ពពូន ។
ហេតុការណ៍នេះបានកើតឡើងកាលពីវេលាម៉ោង៨ និង៣០នាទីយប់ ថ្ងៃទី២១ ខែមីនា ឆ្នាំ២០១៩ ស្ថិតនៅចំណុចភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដោយធ្វើការឃាត់ខ្លួនជនសង្ស័យចំនួន០៤នាក់ជាបន្តបន្ទាប់ រួមជាមួយថ្នាំញៀនផងដែរ ។
ប្រភពព័ត៌មានពីនគរបាលបានឱ្យដឹងថាជនសង្ស័យទី០១- ឈ្មោះ យឿន អាត ភេទប្រុស អាយុ៣៤ឆ្នាំ មុខរបរកសិករ ទី០២-ឈ្មោះ ដុង សារិនណាក់ ភេទប្រុស អាយុ៣៥ឆ្នាំ មុខរបរមិនពិតប្រាកដ ទី០៣- ឈ្មោះ សៀវ រ៉ាឌី ភេទប្រុស អាយុ១៩ឆ្នាំ មុខរបរកម្មករ អ្នកទាំងបីមានទីលំនៅបច្ចុប្បន្នក្នុងភូមិច្រាំងបាក់ ឃុំឃ្លាំងមាស ស្រុកបវេល ខេត្តបាត់ដំបង និងទី០៤-ឈ្មោះ សាំង ឡាយហួត ភេទ ប្រុស អាយុ២៥ឆ្នាំ មុខរបរ កសិករ ទីលំនៅបច្ចុប្បន្ន នៅភូមិផ្ទះស្បូវ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពបន្តទៀតថា នគរបាលដកហូតនូវវត្ថុតាងបានមួយចំនួន រួមមាន៖ ទី០១-ម្សៅក្រាមពណ៌ស ដែលជាសារធាតុញៀនចំនួន០១ កញ្ចប់ធំ ទី០២-ម៉ូតូម៉ាកហុងដាឌ្រីម (Honda Dream C125) ពណ៌ខ្មៅ ស៊េរីឆ្នាំ២០១៣ ចំនួន១គ្រឿង និងម៉ូតូកែឆ្នៃចំនួន០១គ្រឿងផងដែរ ។
ពាក់ព័ន្ធនឹងបញ្ហានេះ បច្ចុប្បន្នជនសង្ស័យទាំងអស់ខាងលើ ត្រូវបានឃាត់ខ្លួននៅដើម្បីសួរនាំនៅក្នុងអធិការដ្ឋាននគរបាលស្រុកសាលាក្រៅ ដើម្បីរៀបចំកសាងសំណុំរឿងបញ្ជូនទៅតុលាការឱ្យចាត់ការតាមនិតិវិធី ៕
ចែករំលែកព័តមាននេះ