ខេត្តកណ្តាល ៖ បុរសពោះម៉ាយកូន១ម្នាក់ ក្រោយពីប្រពន្ធមានជំងឺក្រិនថ្លើម(ទាចទឹក)ស្លាប់ចោលអស់រយៈពេល៣ឆ្នាំកន្លងមក មិនទាន់បានរកប្រពន្ធថ្មីម្នាក់គ្រាន់ជួយស្អំបេះដូងទៀតនៅឡើយទេ តែដោយសារពោះម៉ាយយូរជូរមាត់ ក៏បានលួចស្រឡាញ់នាងក្រមុំម្នាក់ត្រូវជាក្មួយបង្កើតរបស់ប្រពន្ធ(ក្មួយសាច់ថ្លៃ)ដែលរស់នៅផ្ទះជិតគ្នា ។ ប៉ុន្តែក្ដីស្រឡាញ់នេះ បុរសខាងលើបានលាក់ទុកតែនៅក្នុងចិត្តប៉ុណ្ណោះ និងគ្មានភាពក្លាហានដើម្បីសារភាពស្នេហ៍ប្រាប់នាងឡើយ ហើយក៏មិនហ៊ានចូលស្ដីដណ្ដឹងដែរ ។
ដោយសារការស្រឡាញ់កាន់តែជ្រាលជ្រៅទៅៗ ម្យ៉ាងពោះម៉ាយយូរផងស្រាប់តែសម្រេចចិត្តខុស ដោយឡើងទៅចាប់ក្មួយស្រីសាច់ថ្លៃរូបនោះ ដែលកំពុងដេកប៉ងរំលោភទាំងថ្ងៃ ប៉ុន្តែមិនបានសម្រេចឡើយដោយនាងដឹងខ្លួនទាន់ស្រែកឆោឡោឡើង បង្កឲ្យមានការភ្ញាក់ផ្អើលនិងប្ដឹងនគរបាលឲ្យចាប់ឃាត់ខ្លួន ។
ហេតុការណ៍នេះ កើតឡើងកាលពីវេលាម៉ោង១០និង២៥នាទីព្រឹកថ្ងៃទី២១ ខែមីនា នៅលើផ្ទះជនរងគ្រោះស្ថិតក្នុងឃុំពើក ស្រុកអង្គស្នួល ។ ឯបុរសពោះម៉ាយខាងលើឈ្មោះ អ៊ន សុធី អាយុ៤៣ឆ្នាំ ជាកម្មករសំណង់ ។ ចំណែកក្មួយសាច់ថ្លៃដែលស្ទើរតែក្លាយជាសាច់ប៉ាតេនោះ អាយុ៣១ឆ្នាំ នៅលីវ មិនទាន់មានគូស្រករនៅឡើយទេ នាងជាកម្មការិនីរោងចក្រកាត់ដេរ ។
នគរបាលបានឲ្យដឹងថា មុនពេលកើតហេតុ ក្រោយពីត្រឡប់មកពីធ្វើការវេនយប់វិញ នាងបានឡើងទៅដេកនៅលើផ្ទះតែម្នាក់ឯង ព្រោះតែធ្វើការអត់បានដេកពេញ១យប់មកហើយ។លុះដល់ម៉ោងជាង១០ព្រឹក បុរសរូបនេះបានឡើងទៅលើផ្ទះនោះ ហើយនៅពេលឃើញនាងកំពុងដេកលក់នៅក្នុងមុង ក៏បានធ្វើសកម្មភាពប៉ងរំលោភសេពសន្ថវៈ ។ ប៉ុន្តែពេលនោះ នាងដឹងខ្លួនទាន់ ក៏រើបម្រះនិងស្រែកឆោឡោឡើង បង្កឲ្យមានការភ្ញាក់ផ្អើលនិងរត់ចុះមកក្រោមផ្ទះ ។
ចំណែកជនសង្ស័យបានរត់ចុះតាមក្រោយ រួចគេចទៅផ្ទះបាត់ បន្ទាប់មកជនរងគ្រោះបានទៅរាយការណ៍និងដាក់ពាក្យបណ្តឹងនៅប៉ុស្តិ៍នគរបាលឃុំពើក ទៅចាប់ខ្លួនជនសង្ស័យនាំទៅកាន់អធិការដ្ឋាននគរបាលស្រុក ដើម្បីសាកសួរនិងចាត់ការតាមច្បាប់ ។ បុរសពោះម៉ាយរូបនេះសារភាពប្រាប់នគរបាលថា ខ្លួនពិតជាបានប៉ងរំលោភនាងប្រាកដមែន ព្រោះខ្លួនត្រូវប្រពន្ធស្លាប់ចោល៣ឆ្នាំមកហើយ មិនតែប៉ុណ្ណោះខ្លួនមិនទាន់បានយកប្រពន្ធថ្មីទៀតនៅឡើយ ៕
ចែករំលែកព័តមាននេះ