រដ្ឋធានីវ៉ាស៊ីនតោន៖ មន្ត្រីរដ្ឋាភិបាលថ្នាក់ខ្ពស់ម្នាក់បានប្រាប់ដល់សារព័ត៌មាន AFP កាលពីថ្ងៃអង្គារ៍កន្លងមកថា អ្នកតំណាងពាណិជ្ជកម្មអាមេរិកគឺលោក Robert Lighthizer និងរដ្ឋមន្ត្រីរតនាគារ Steven Mnuchin…
រដ្ឋធានីវ៉ាស៊ីនតោន៖ មន្ត្រីរដ្ឋាភិបាលថ្នាក់ខ្ពស់ម្នាក់បានប្រាប់ដល់សារព័ត៌មាន AFP កាលពីថ្ងៃអង្គារ៍កន្លងមកថា អ្នកតំណាងពាណិជ្ជកម្មអាមេរិកគឺលោក Robert Lighthizer និងរដ្ឋមន្ត្រីរតនាគារ Steven Mnuchin នឹងត្រលប់ទៅកាន់ប្រទេសចិនវិញនៅសប្តាហ៍ក្រោយ ខណៈដែលសហរដ្ឋអាមេរិក និងប្រទេសចិនឈានចូលដំណាក់កាលមួយទៀតក្នុងការដោះស្រាយសង្គ្រាមពាណិជ្ជកម្ម ។ វាជាមុខសញ្ញាបង្ហាញពីដំណើរការទៅមុខនៃការចរចាបន្ទាប់ពីបានបន្តអស់រយៈពេលជាច្រើនសប្តាហ៍មកហើយ ។
សារព័ត៌មាន The Wall Street Journal បានរាយការណ៍កាលពីថ្ងៃអង្គារ៍ មកដែរថា បន្ទាប់ពីការចរចាក្នុងប្រទេសចិន បេសកជនពាណិជ្ជកម្មរបស់ប្រទេសចិនគឺលោក Liu He នឹងត្រលប់ទៅសហរដ្ឋអាមេរិកនៅសប្តាហ៍បន្ទាប់។
លោកប្រធានាធិបតី ដូណាល់ ត្រាំ (Donald Trump) បានប្រាប់ដល់សារព័ត៌មានកាលពីថ្ងៃអង្គារ៍ដែរថាការចរចាបានដំណើរការយ៉ាងរលូន ប៉ុន្តែលោកក៏បាននិយាយកាលពីសប្តាហ៍មុនដែរថាលោកមិនប្រញាប់ក្នុងការសម្រេចកិច្ចព្រមព្រៀងទេ។
កាលពីថ្ងៃសុក្រ កន្លងមកនេះ សភាជាតិរបស់ប្រទេសចិនបានអនុម័តច្បាប់វិនិយោគបរទេសដើម្បីបង្កើនការការពារកម្មសិទ្ធិបញ្ញា ប៉ុន្តែអាជីវកម្មបរទេសបាននិយាយថាពួកគេមិនទទួលបានពេលគ្រប់គ្រាន់ក្នុងការផ្តល់យោបល់ឡើយ។
ច្បាប់ថ្មីនេះនឹងលុបបំបាត់រាល់លក្ខខណ្ឌសម្រាប់សហគ្រាសបរទេសក្នុងការផ្ទេរបច្ចេកវិទ្យាទៅឲ្យក្រុមហ៊ុនចិន និងការពារពួកគេពីការលូកដៃចូលពីរដ្ឋាភិបាលផងដែរ។
មន្ត្រីតំណាងសហរដ្ឋអាមេរិកកំពុងតែទាមទារការផ្លាស់ប្តូរជាច្រើននៃគោលនយោបាយឧស្សាហកម្មរបស់ប្រទេសចិនដែលរួមមានបញ្ឈប់ការលូកដៃចូលទីផ្សារដោយរដ្ឋាភិបាល ការផ្តល់ឧបត្ថម្ភធន និងការចោទប្រកាន់ពីបទលួចបច្ចេកវិទ្យាអាមេរិកជាដើម។
ប្រទេសចិនបានយល់ព្រមបង្កើនការទិញផលិតផលអាមេរិកដូចជាថាមពល និងសណ្តែកសៀង ប៉ុន្តែអ្នកវិភាគបាននិយាយថាពួកគេនឹងស្ទាក់ស្ទើរក្នុងការសម្របតាមតម្រូវការរបស់អាមេរិកព្រោះវាអាចប៉ះពាល់ដល់អំណាចរបស់គណបក្សក្នុងប្រទេស ៕
ចែករំលែកព័តមាននេះ