ខេត្តបន្ទាយមានជ័យ ៖ ដើម្បីសុវត្ថិភាពដល់ការរស់នៅប្រកបដោយសុវត្ថិភាព និងបញ្ចៀសពីការគ្រោះថ្នាក់ដោយសារមីន ឬគ្រាប់យុទ្ធភ័ណ្ឌមិនទាន់ផ្ទុះដែលកប់ក្នុងដីនាសម័យសង្គ្រាមនោះ កាលពីថ្ងៃទី២១ ខែមីនា ឆ្នាំ២០១៩ លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះត្រនេព្រះ ខេត្តបន្ទាយមានជ័យ បានប្រគលគ្រាប់យុទ្ធភ័ណ្ឌមិនទាន់ផ្ទុះចំនួន៩គ្រាប់ ជូនអង្គភាពស៊ីម៉ាក់យកទៅដុតកំទេចចោល ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា គ្រាប់យុទ្ធភ័ណ្ឌមិនទាន់ផ្ទុះទាំង៩គ្រាប់ គឺទទួលបានពីប្រជាពលរដ្ឋ ក៏ដូចជាអាជ្ញាធរភូមិ ក្នុងនោះរួមមានភូមិជប់, ភូមិស្រេះ និងភូមិកក់ ក្នុងឃុំជប់វ៉ារី ស្រុកព្រះនេត្រព្រះ ខេត្តបន្ទាយមមានជ័យ ដែលគ្រាប់យុទ្ធភ័ណ្ឌខ្លះបានមកពីប្រជាពលរដ្ឋជីកស្តារស្រះ និងគ្រាប់យុទ្ធភ័ណ្ឌខ្លះទៀតបានមកពីប្រជាពលរដ្ឋកាយបាតអូរយកដីមកធ្វើផ្ទះហើយក៏ប្រទះឃើញ រួចរាយការណ៍ប្រាប់សមត្ថកិច្ចនគរបាលមូលដ្ឋានឱ្យចុះមកយកទៅរក្សាទុក ។
លោកអធិការបានបញ្ចាក់ថា គ្រាប់យុទ្ធភ័ណ្ឌមិនទាន់ផ្ទុះទាំងនោះរួមមានគ្រាប់ដេកាចំនួន៥គ្រាប់, គ្រាប់ត្បាល់៣គ្រាប់ និងគ្រាប់បេចំនួន១គ្រាប់ ។ បច្ចុប្បន្នគ្រាប់យុទ្ធភ័ណ្ឌមិនទាន់ផ្ទុះទាំង៩គ្រាប់នោះត្រូវបានប្រគល់ជូនមន្ត្រីស៊ីម៉ាក់ប្រចាំខេត្តបន្ទាយមានជ័យយកទៅធ្វើការដុតកំទេចចោលផងដែរ៕
ចែករំលែកព័តមាននេះ