ឪពុកម្តាយមានតួនាទីយ៉ាងសំខាន់ក្នុងការផ្តល់ចំណេះវិជ្ជាដល់កូនប្រុសស្រី កូនល្ងង់ ឬមានវិជ្ជាខ្ពង់ខ្ពស់ក៏អាស្រ័យលើម៉ែឪជាអ្នកកំណត់វាសនាឱ្យកូន ។ សូមលើកយករឿងរ៉ាវនៃអ្នកមានទ្រព្យរាប់សិបកោដិមកបង្ហាញដូចតទៅ៖
កាលនោះមានត្រកូលមហាសេដ្ឋីមួយមានទ្រព្យ៨០កោដិ តែគ្រួសារនេះមានកូនប្រុសតែម្នាក់គត់ឈ្មោះសេដ្ឋីបុត្រដែលជាកូនគាប់ចិត្តរបស់គាត់ក្រៃលែង។ នៅពេលកូននោះធំឡើងឪពុកម្តាយគិតថា ទ្រព្យសម្បត្តិរបស់យើងមានច្រើនណាស់ ទោះបីកូនអញដេកចាយមួយជីវិតក៏មិនអស់ដែរ បើដូច្នេះអញមិនបាច់ឲ្យកូនរៀនសូត្រអ្វីទេនាំតែលំបាកគិត អាណិតកូនឲ្យកូនដេកចាយទ្រព្យនេះទៅបានហើយ ។
សេដ្ឋីបុត្រនោះមិនបានរៀនសូត្រអ្វីទាំងអស់ គិតតែពីសប្បាយក្អាក់ក្អាយនឹងស្រីស្រាល្បែងពាលាអាវ៉ាសែសេពគប់បាបមិត្តរាល់ថ្ងៃ ។
ក្រោយមកលោកសេដ្ឋីនិងភរិយាជាឪពុកម្តាយបានលាចាកលោកទៅ នៅសល់តែសេដ្ឋីបុត្រនិងភរិយារបស់គាត់ ដែលមិនមានចំណេះដូចគ្នា គិតតែពីសប្បាយហ៊ឺហាជាមួយមិត្តភក្តិ មិនគិតរកស៊ីអ្វីទេ រហូតចាយទ្រព្យសម្បត្តិនោះអស់ពីផ្ទះ ធ្លាក់ខ្លួនដើរសុំទានគេ ។
ក្រោយមកសេដ្ឋីបុត្រនោះចូលដៃជើងជាមួយចោរទៅលួចគេ គេចាប់បានក៏យកគាត់ទៅប្រហារជីវិតដ៏អសោចិ៍ ។
សេចក្តីនេះបញ្ជាក់ឲ្យឃើញថា ឪពុកម្ដាយជាអ្នកធ្វើឲ្យកូនល្ងង់ខ្លៅ តែបែរជាគាត់យល់ថា អាណិតកូន មិនចង់ឲ្យកូនលំបាកទេ ទើបមិនឲ្យកូនរៀនសូត្រ នេះជាកំហុសធំ ។
ចែករំលែកព័តមាននេះ