ប្រទេសចិន ៖ ការផ្ទុះឆេះយ៉ាងខ្លាំងមួយកើតមានកាលពីថ្ងៃទី២១ ខែមីនា ឆ្នាំ២០១៩ ក្នុងរោងចក្រគីមីមួយនាភាគខាងកើតចិន បណ្ដាលឲ្យមនុស្សស្លាប់យ៉ាងតិច៦នាក់ និងរបួសធ្ងន់៣០នាក់ ហើយគេមានការបារម្ភចំពោះការបំពុល។
តាមបណ្ដាញសង្គមចិន WEIBO សាលាក្រុង YANCHENG ខេត្តជាំងស៊ូ បានប្រកាសថា ការផ្ទុះឆេះកើតមាននាវេលាម៉ោង១៤និង៤៨នាទីម៉ោងក្នុងស្រុក ក្នុងសហគ្រាស TIANJIAYI CHEMICAL ក្រុង YANCHENG។ យោងតាមតុល្យការបណ្ដោះអាសន្នមួយចេញផ្សាយដោយសាលាក្រុងថា មនុស្សយ៉ាងតិច៦នាក់បានត្រូវស្លាប់ ហើយ៣០នាក់ទៀតរងរបួសធ្ងន់ ចំណែកមនុស្សច្រើននាក់ទៀតរបួសស្រាល។
នេះជាសញ្ញានៃការផ្ទុះខ្លាំងបំផុត ទោះមជ្ឈមណ្ឌលជាតិខាងការរញ្ជួយដីក៏រៀបរាប់ដែរថា នៅក្បែរកន្លែងកើតគ្រោះមហន្តរាយ មានការញ័ររញ្ជួយដីកម្លាំង២,២រីស្ទ័រពេលផ្ទុះ។
តាមបណ្ដាវីដេអូចេញផ្សាយតាមបណ្ដាសារព័ត៌មានចិន បង្ហាញពីដុំភ្លើងយ៉ាងធំជេះឡើងលើកម្ពស់ច្រើនសិបម៉ែត្រ ព្រមទាំងផ្សែងពណ៌ប្រផេះហុយពីលើទីតាំងឧស្សាហកម្មនោះ។ ទូរទស្សន៍រដ្ឋចិន CCTV បានផ្សាយបណ្ដារូបភាពនៃកញ្ចក់អគារនានា នៅជុំវិញត្រូវបែកដោយសារកម្លាំងផ្ទុះ ក្នុងទីក្រុងស្ថិតនៅចម្ងាយ២៦០គីឡូម៉ែត្រខាងជើងទីក្រុងសៀងហៃនោះ។
អ្នកពន្លត់ភ្លើ្លងប្រមាណជាជិត១០០០នាក់ នៅតែប្រមូលផ្ដុំគ្នា ទោះរាត្រីកាលមកដល់។ ទូរទស្សន៍រដ្ឋចិនCCTV រៀបរាប់ម្យ៉ាងទៀតពីការបញ្ចេញផ្សែងពុល។ តាម WEIBO សាលាក្រុងគូសបញ្ជាក់ថា ប្រតិបត្តិការជួយសង្គ្រោះនៅបន្ត។ មូលហេតុនៃគ្រោះថ្នាក់នោះជាកម្មវត្ថុនៃការស៊ើបអង្កេតមួយ។ ពួកអ្នកជួយសង្គ្រោះរៀបរាប់ពីសភាពការណ៍ស្មុគស្មាញនៅលើទីលានដោយគូសបញ្ជាក់ថា អាទិភាពពេលនេះផ្ដោតលើការជួយសង្គ្រោះមនុស្ស ដែលនៅជាប់ក្នុងទីតាំងរោងចក្រ។
គ្រោះមហន្តរាយនោះកើតមានបន្ទាប់ពីមានភ្លើងឆេះក្នុងរោងចក្រជីគីមីមួយ។ បណ្ដាកម្មករជាប់ក្នុងរោងចក្រក្រោយពេលមានការផ្ទុះនាំឲ្យបាក់អគារនានានៅជុំវិញ។ កម្មករមួយចំនួនដែលមានឈាមហូរជោគខ្លួន ត្រូវបានឃើញកំពុងតែរត់ចេញពីទីតាំងរោងចក្រ។
ការិយាល័យបរិស្ថានក្រុង YANCHENG គូសបញ្ជាក់ថា ខ្យល់ខ្លាំងពេលនេះអាចបោកផាត់ផ្សែងចេញ ប៉ុន្តែការព្រួយបារម្ភនៅតែមាន ចំពោះការបំពុល។ មនុស្សម្នារស់នៅជុំវិញទីតាំងរោងចក្រត្រូវជម្លៀសចេញ។
ការផ្ទុះឆេះតែងកើតមានញឹកញាប់នៅចិន ជាពិសេសក្នុងផ្នែកឧស្សាហកម្ម។ កាលពីខែវិច្ឆិកាកន្លងទៅ ការធ្លាយឧស្ម័នក្នុងរោងចក្រគីមីមួយ បណ្ដាលឲ្យមានការផ្ទុះសម្លាប់មនុស្ស២៣នាក់នៅក្រុង ZHANGJIAKOU ស្ថិតនៅចម្ងាយ២០០គីឡូម៉ែត្រភាគពាយ័ព្យក្រុងប៉េកាំង។ រួចនាខែកក្គដាការផ្ទុះមួយទៀតកើតមានក្នុងរោងចក្រគីមីមួយ បណ្ដាលឲ្យមនុស្សស្លាប់១៩នាក់និងរបួស១២នាក់ ក្នុងខេត្តស៊ីឈួន៕ ប្រភពវីដេអូ ៖ Real Footage
ចែករំលែកព័តមាននេះ