រាជធានីភ្នំពេញ ៖ គណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជាបានបំពេញទស្សនៈកិច្ចជាផ្លូវការ ដើម្បីស្វែងរកមិត្តភាព និងកិច្ចសហប្រតិបត្តិការពង្រឹងពង្រីកទំនាក់ទំនងរវាងសភាកម្ពុជា និងសភាវៀតណាម ។ តបតាមការអញ្ជើញរបស់លោកស្រី តុងធិហ្វុង (Tong…
រាជធានីភ្នំពេញ ៖ គណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជាបានបំពេញទស្សនៈកិច្ចជាផ្លូវការ ដើម្បីស្វែងរកមិត្តភាព និងកិច្ចសហប្រតិបត្តិការពង្រឹងពង្រីកទំនាក់ទំនងរវាងសភាកម្ពុជា និងសភាវៀតណាម ។ តបតាមការអញ្ជើញរបស់លោកស្រី តុងធិហ្វុង (Tong Thi Phong) អនុប្រធានរដ្ឋសភានៃសាធារណរដ្ឋសង្គមនិយមវៀតណាម លោកស្រី ឃួន សុដារី អនុប្រធានទី២នៃរដ្ឋសភា កាលពីល្ងាចថ្ងៃទី២១ ខែមីនា បានដឹកនាំគណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជាទៅបំពេញទស្សនកិច្ចជាផ្លូវការ និងមិត្តភាពនៅទីក្រុង ហាណូយនៃសាធារណរដ្ឋសង្គមនិយមវៀតណាមចាប់ពីថ្ងៃទី២១ដល់ថ្ងៃទី២៥ ខែមីនា ឆ្នាំ ២០១៩ ។
ដំណើរទស្សនកិច្ចជាផ្លូវការ និងមិត្តភាពនេះធ្វើឡើងក្នុងគោលបំណងពង្រឹងពង្រីកចំណងមិត្តភាពសាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ពិសេសរវាងរដ្ឋសភា ប្រទេសទាំងពីរឱ្យកាន់តែរឹងមាំថែមទៀត ។ នៅក្នុងកំឡុងដំណើរទស្សនកិច្ចនេះគណៈប្រតិភូ ជាន់ខ្ពស់រដ្ឋសភានៃព្រះរាជាណាចក្រកម្ពុជានឹងចូលជួបសម្តែងការគួរសមជាមួយថ្នាក់ដឹកនាំសំខាន់ៗនៃសាធារណរដ្ឋសង្គមនិយមវៀតណាម និងមានជំនួបទ្វេភាគីរវាងរដ្ឋសភាប្រទេសទាំងពីរ ។
សេចក្តីជូនដំណឹងរបស់អគ្គលេខាធិការដ្ឋានរដ្ឋសភាបានឱ្យដឹងថា គណៈប្រតិភូរដ្ឋសភាកម្ពុជាគ្រោងជួបសម្តែងការគួរសមជាមួយលោកស្រីង្វៀន ធិគិមងិន (Nguyen Thi Kim Ngan) ប្រធានរដ្ឋសភានៃសាធារណរដ្ឋសង្គមនិយមវៀតណាម និងថ្នាក់ដឹកនាំសំខាន់ៗផ្សេងទៀត នៃសាធារណរដ្ឋសង្គមនិយមវៀតណាម ។ ជួបពិភាក្សាទ្វេភាគីជាមួយលោកស្រី តុងធិហ្វុង (Tong Thi Phong) អនុប្រធានរដ្ឋសភានៃសាធារណរដ្ឋសង្គមនិយមវៀតណាម ។
ជំនួបពិភាក្សាទ្វេភាគីរវាងលោកឈាង វុន ប្រធានគណៈកម្មការកិច្ចការបរទេសសហប្រតិបត្តិការអន្តរជាតិឃោសនាការ និងព័ត៌មាននៃរដ្ឋសភាកម្ពុជា និងលោកង្វៀន វ៉ាន់ ហ្គូ (Nguyen Van Giau) ប្រធានគណៈកម្មាធិការកិច្ចការបរទេសនៃរដ្ឋសភាវៀតណាម ។ ជំនួបពិភាក្សា ទ្វេភាគីរវាងលោកឡេង ប៉េងឡុង អគ្គលេខាធិការរដ្ឋសភាកម្ពុជា និងលោកង្វៀនហាញ់ហ្វុក អគ្គលេខាធិការ និងជាប្រធានខុទ្ទកាល័យរដ្ឋសភាវៀតណាម ។
ក្រៅពីនេះគណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជាក៏នឹងអញ្ជើញទៅទស្សនា តំបន់កសិឧស្សាហកម្មមួយនៅទីក្រុងហាណូយ ឬខេត្តជិតខាង និងទស្សនាតំបន់ប្រវត្តិសាស្ត្រ នៅខេត្តនិញប៊ិញ (Ninh Binh) ផងដែរ ៕
ចែករំលែកព័តមាននេះ