ប្រទេសអីុតាលី ៖ ប៉ូលិសអីុតាលីកាលពីថ្ងៃទី២០មីនា បានជួយសង្គ្រោះដោយប្រផិតប្រផើយ សិស្សវិទ្យាល័យ៥១នាក់ដែលត្រូវចាប់ជាចំណាប់ខ្មាំងក្នុងរថយន្តបឺសមួយ នៅជិតក្រុងមីឡាន ដោយអ្នកបើកជាជនជាតិអីុតាលីមានដើមកំណើតសេណេហ្គាល់ម្នាក់ ដែលលើកពីវាសនារបស់ពួកអន្តោប្រវេសន៍អាហ្វ្រិកស្លាប់ក្នុងសមុទ្រមេឌីទែរ៉ាណេ ដុតរថយន្តដឹកសិស្សនោះ។
រដ្ឋអាជ្ញាក្រុងមីឡានលោកFRANCESCO GRECO ថ្លែងទៅកាន់សារព័ត៌មានថា នោះជាឆាកដ៏អស្ចារ្យមួយ ដែលប៉ូលិសអាចធ្វើឲ្យរថយន្តនោះឈប់បាន ហើយជម្លៀសសិស្សសាលាទាំងអស់ដែលជាប់ជាចំណាប់ខ្មាំងចេញបានអស់ដោយប្រផិតប្រផើយ។ លោក និយាយថានោះជាឆាកមើលទៅដូចក្នុងខ្សែភាពយន្តមួយដូច្នោះដែរ។ អ្នកបើករថយន្តនោះត្រូវចាប់ខ្លួន ក្រោមបទចោទប្រកាន់ពីការចាប់មនុស្សជាចំណាប់ខ្មាំង ចង់សម្លាប់មនុស្សយ៉ាងរង្គាលនិងបង្កអគ្គិភ័យ របៀបជាអំពើភេរវកម្ម។
អ្នកបើករថយន្តនោះឈ្មោះOUSSEYNOU SY អាយុ៤៧ឆ្នាំទទួលបានសញ្ជាតិអីុតាលីចាប់តាំងពីឆ្នាំ២០០៤មក ហើយរូបគេជាអ្នកបើករថយន្តដឹកសិស្សដែលពុំដឹងពីប្រវត្តិ់។ ជននោះធ្វើសកម្មភាពតាមតែគំនិតរបស់គេម្នាក់ឯង ដោយគ្មានទំនាក់ទំនងជាមួយលទ្ធិអ៊ិស្លាមនិយមរ៉ាឌីកាល់ឡើយ។ នេះជាវាយតម្លៃរបស់ប្រមុខប៉ូលិសប្រឆាំងភេរវកម្មក្រុងមីឡាន លោកALBERTO NOBOLI ក្នុងសន្និសីទសារព័ត៌មានមួយ។
លោកបន្តថាអំពើរបស់គេជាអំពើដែលបានគ្រោងទុកមុនចាប់តាំងពីច្រើនថ្ងៃមកហើយ។ រូបគេចង់ឲ្យពិភពលោកទាំងមូល និយាយពីរឿងគេ។ បុរសនោះបានបង្ហោះតាមYOUTUBE នូវវីដេអូមួយដើម្បីពន្យល់ពីសកម្មភាពរបស់គេនិងនិយាយថា អាហ្រិ្វកចូរនាំគ្នាក្រោកឈរឡើង។ គេមានចេតនានិយាយបែបនេះ ទៅកាន់បណ្ដាសាច់ញាតិគេរស់នៅCREMA ជិតក្រុងមីឡាន ព្រមទាំងនៅសេណេហ្គាល់ផងដែរ។
មានប្រពន្ធជាជនជាតិអីុតាលី តែលែងលះគ្នា បុរសនោះមានកូន២នាក់មានវ័យជំទង់អស់ហើយ។ យោងតាមមេធាវីរបស់គេថា ពេលសួរចម្លើយបុរសនោះនិយាយថា រូបគេធ្វើសកម្មភាពដ៏ត្រចះត្រចង់មួយ ដើម្បីទាក់ទាញការចាប់អារម្មណ៍ លើបណ្ដាផលវិបាកនៃនយោបាយអន្តោប្រវេសន៍។
សិស្ស៥១នាក់នៃអនុវិទ្យាល័យCREMA ជិះរថយន្តនោះ ធ្វើដំណើរក្នុងក្របខណ្ឌរបៀបជាកីឡា ទៅកាន់ទីតាំងកីឡាអត្តពលកម្មមួយដោយមានអ្នកជូនដំណើរ៣នាក់ ហើយពេលរថយន្តកំពុងតែរត់ អ្នកបើកស្រាប់តែដូរផ្លូវ ទៅកាន់ព្រលានយន្តបហោះLINATE។ ការចាប់ចំណាប់ខ្មាំងមានរយៈពេលជាងកន្លះម៉ោង។ ក្មេងៗដែលជាប់ជាចំណាប់ខ្មាំងក្នុងរថយន្តរៀបរាប់ថា ម្នាក់ៗនឹកថានឹងពុំអាចចេញពីរថយន្តដោយមានជីវិតឡើយ។ ក្មេងៗទាំងនោះរៀបរាប់ទៀតថា មានប៊ីដុងប្រេងសាំងនិងដែកកេះមួយ បុរសនោះបានប្រមូលទូរស័ព្ទដៃរបស់ពួកគេ ហើយប្រាប់ទៅពួកអ្នកអមដំណើរឲ្យចាប់ចងពួកគេជាមួយខ្សែភ្លើងមួយ។
អ្នកបើករថយន្តនោះនិយាយថា រូបគេធ្លាប់បាត់បង់កូន៣នាក់ក្នុងសមុទ្រ។ សិស្សដែលជាប់ជាចំណាប់រៀបរាប់ទៀតថា ជននោះគំរាមពួកយើងថាបើពួកយើងហ៊ានរើ នោះគេនឹងចាក់សាំងហើយដុត ហើយជននេះនិយាយមិនឈប់ថា មានមនុស្សជាជនជាតិអាហ្វ្រិកច្រើនណាស់ដែលបន្តស្លាប់ និងថានោះជាកំហុសរបស់រឧបនាយករដ្ឋមន្ត្រីអីុតាលី២នាក់ជាមនុស្សខ្លាំងក្នុងប្រទេស លោកDI MAIO និងលោកSALVINI។ សិស្សសាលាជាប់ជាចំណាប់ខ្មាំងបន្តថាបុរសនោះ បានចាក់ប្រេងសាំងហើយគេក៏បញ្ចេញកាំភ្លើងខ្លីមួយដើមនិងកាំបិតមួយ។ បន្ទាប់មកប៉ូលិសក៏បានលើកមកដល់ហើយជួយសង្គ្រោះពួកយើងទាំងប្រផិតប្រផើយបំផុត មុនរថយន្តឆេះ៕
ចែករំលែកព័តមាននេះ