រាជធានីភ្នំពេញ ៖ អ្នកសិក្សាស្រាវជ្រាវនៃធនាគារជាតិនៃកម្ពុជា បានបង្ហាញថាការប្រើប្រាស់ប្រាក់ដុល្លារនៅកម្ពុជា មានច្រើនជាងគេ គឺនៅក្រុងភ្នំពេញនិងខេត្តសៀមរាបរាប់ទាំងការទទួលប្រាក់ចំណូលនិងការចំណាយរបស់ប្រជាពលរដ្ឋបើប្រៀបធៀបទៅតំបន់ផ្សេងទៀតនៅកម្ពុជាតាមរយៈការអង្កេតធ្វើឡើងនៅឆ្នាំ២០១៤ដល់២០១៧ ។ លោក សម វិចិត្រ…
រាជធានីភ្នំពេញ ៖ អ្នកសិក្សាស្រាវជ្រាវនៃធនាគារជាតិនៃកម្ពុជា បានបង្ហាញថាការប្រើប្រាស់ប្រាក់ដុល្លារនៅកម្ពុជា មានច្រើនជាងគេ គឺនៅក្រុងភ្នំពេញនិងខេត្តសៀមរាបរាប់ទាំងការទទួលប្រាក់ចំណូលនិងការចំណាយរបស់ប្រជាពលរដ្ឋបើប្រៀបធៀបទៅតំបន់ផ្សេងទៀតនៅកម្ពុជាតាមរយៈការអង្កេតធ្វើឡើងនៅឆ្នាំ២០១៤ដល់២០១៧ ។
លោក សម វិចិត្រ (Sam Vichet) អ្នកស្រាវជ្រាវនៃធនាគារជាតិនៃកម្ពុជាបានលើកឡើងក្នុងសិក្ខាសាលាស្តីពី «លទ្ធផលអង្កេតបឋមនៃគម្រោងអង្កេតដំណាក់កាលទី២»ការលើកកម្ពស់ការប្រើប្រាស់ប្រាក់រៀលនៅកម្ពុជាកាលពីថ្ងៃទី ១៩មីនា នៅសណ្ឋាគារភ្នំពេញថា ការអង្កេតបានធ្វើឡើងនៅឆ្នាំ២០១៤ យើងប្រមូលព័ត៌មានទាំងប្រាក់ចំណូល ប្រាក់កម្ចី នៅតាមតំបន់នីមួយៗ ឃើញថាឥរិយាបទនៃអ្នកប្រើប្រាស់ខុសគ្នានៃការប្រើប្រាស់ប្រាក់លុយដុល្លារ។ពិសេសអ្នករស់នៅក្រុងភ្នំពេញគេប្រើប្រាស់លុយដុល្លារច្រើនជាងអ្នកនៅតាមជនបទ។ចំណែកការស្រាវជ្រាវលើកទី២យើងធ្វើនៅឆ្នាំ២០១៧ នៅភ្នំពេញជាតំបន់ដែលគ្របដណ្តប់នូវការប្រើប្រាស់ប្រាក់ដុល្លារច្រើន ហើយបន្ទាប់មកមានខេត្ត សៀមរាប»។
លោកលើកឡើងថា «ទាក់ទងនិងការចំណាយប្រាក់ដុល្លាវិញ យើងសង្កេតឃើញថា ចំពោះប្រតិបត្តិការធំៗដូចជាការចំណាយទៅលើការជួលផ្ទះនិងទិញសម្ភារៈសំខាន់ៗគឺមានការចំណាយជាប្រាក់ដុល្លារច្រើន តួយ៉ាងនៅភ្នំពេញចំណាយប្រាក់ដុល្លារខ្ពស់ជាងគេ ។ តែសម្រាប់ប្រតិបតិ្តការតូចតាចមានការទិញជាលុយរៀល»។
លោកសម វិចិត្រ បញ្ជាក់ថា «គោលបំណងនៃការធ្វើអង្កេតកន្លងមក ដើម្បីពិនិត្យមើលទៅលើអាកប្បកិរិយារបស់ប្រជាពលរដ្ឋពីឆ្នាំ២០១៤ដល់២០១៧។ នៅឆ្នាំ២០១៧ ប្រាក់ចំណូល និងការចំណាយរបស់ប្រជាពលរដ្ឋយើងមាន៤៥ដឺក្រេ ខ្ពស់ជាងអ្វីដែលយើងមើលឃើញនៅឆ្នាំ២០១៤ ហើយយើងមើលឃើញថាប្រជាពលរដ្ឋមានការយល់ដឹងអំពីនៅពេលគេយកលុយដុល្លារទៅដូរមានការបាត់បង់មួយចំនួនទាក់ទងការប្តូរប្រាក់ដែរ»។
លោកស្រី នាវ ចន្ទថាណា ទេសាភិបាលរង ធនាគារជាតិនៃកម្ពុជាមានប្រសាសន៍ថា លទ្ធផលនៃការអង្កេតនេះ មានសារៈប្រយោជន៍សម្រាប់លើកកម្ពស់ស្ថានភាពនៃការប្រើប្រាស់លុយដុល្លារនៅកម្ពុជា ហើយលទ្ធផលនេះមានសារសំខាន់សម្រាប់អ្នកធ្វើគោលនយោបាយ, អ្នកស្រាវជ្រាវ ស្ថាបនរបស់រាជរដ្ឋាភិបាលដែលពាក់ព័ន្ធ, សហព័ន្ធអាជីវកម្ម និងអង្គការក្រៅរដ្ឋាភិបាលជាដើម។
លោកស្រីលើកឡើងបន្តទៀតថា លទ្ធផលដែលបានរកឃើញពីការស្រាវជ្រាវ មានលក្ខណៈស៊ីសង្វាក់គ្នា ឧទាហរណ៍ការប្រើ ប្រាស់លុយយ៉ាងច្រើនត្រូវបានអង្កេតឃើញនៅភ្នំពេញ និងសៀមរាប ត្រូវបានបង្ហាញថា មានការប្រើប្រាស់លុយដុល្លារអាមេរិកច្រើន។
បើតាមលោកស្រីទេសាភិបាលរង ធនាគារ ជាតិនៃកម្ពុជា បានឲ្យដឹងថា «ទោះបីជាការប្រើប្រាស់លុយដុល្លារមានចំនួនខ្ពស់ យើងគួរកត់សម្គាល់ថាការប្រើប្រាស់លុយរៀលក៏មានការកើនឡើងស្របគ្នាដែរ ទាក់ទងនិងប្រតិបត្តិការអាជីវកម្មហើយខ្ញុំជឿជាក់ថាការប្រឹងប្រែងរួមគ្នារបស់យើងដើម្បីធ្វើឱ្យបានសម្រេចនូវគោលដៅរួមរបស់យើង ឱ្យការប្រើប្រាស់លុយរៀលទទួលបានជោគជ័យត្រូវមានការចូលរួមទាំងអស់គ្នាទូទាំងប្រទេស»។
លោក Hidenobu Okuda សាស្ត្រាចារ្យនៃសាកលវិទ្យាល័យ Hitosubashi មានប្រសាសន៍ថា៖«ដើម្បីបង្កើតគោលនយោបាយដ៏ល្អមួយដើម្បីគាំទ្រដល់ការពង្រីកដល់ការប្រើប្រាស់ប្រាក់រៀលនោះ យើងត្រូវតែរំលឹកឬបង្ហាញឱ្យឃើញនូវអត្ថប្រយោជន៍ការប្រើប្រាស់ប្រាក់រៀល ,ត្រូវពង្រឹងការប្រើប្រាស់ប្រាក់រៀល,ពង្រឹងបណ្តាញនៃការប្រើប្រាស់ប្រាក់រៀលនេះ ហើយស្ថាប័នហិរញ្ញវត្ថុ ត្រូវផ្តោតយកចិត្តទុកដាក់ទៅលើប្រាក់រៀលនេះ។ ស្ថាប័នហិរញ្ញវត្ថុទាំងនេះត្រូវមានការលើកទឹកចិត្តឱ្យមានការពង្រីកនូវប្រតិបត្តិការអាជីវកម្មរបស់ខ្លួនដោយផ្អែកទៅលើលុយរៀល»៕
ចែករំលែកព័តមាននេះ