រាជធានីភ្នំពេញ ៖ ជនសង្ស័យជាជនជាតិខ្មែរ និងបរទេសជិត៤ពាន់នាក់ត្រូវបានឃាត់ខ្លួនពាក់ព័ន្ធ និងបទល្មើសគ្រឿងញៀន ហើយសមត្ថកិច្ចដកហូតគ្រឿងញៀនគ្រប់ប្រភេទចំនួនជិត៨០គីឡូក្រាម នេះបើយោងតាមរយៈរបាយការណ៍របស់គណៈកម្មការប្រយុទ្ធប្រឆាំងគ្រឿងញៀនបានអោយដឹង ។ របាយការណ៍ដដែលបានឲ្យដឹងទៀតថា ចាប់ពីថ្ងៃទី០១ ខែមករា ដល់ថ្ងៃទី១៨ ខែមីនា ឆ្នាំ២០១៩ សមត្ថកិច្ចកម្ពុជាបានបង្ក្រាបបទល្មើសគ្រឿងញៀនសរុបចំនួន១៧២៩ករណី ក្នុងនោះបានចាប់ខ្លួនមនុស្សចំនួន ៣៧៧៧នាក់ ស្រី៣១៦នាក់) ជនបរទេស១០៤នាក់ (ស្រី២៦នាក់)មាន៧សញ្ជាតិ ។
បទល្មើសគ្រឿងញៀនដែលបង្ក្រាបបានរួមមានអំពើជួញដូររក្សាទុកកែច្នៃចាត់ចែង និងដាំដុះ៩៩៩ករណី ឃាត់១៨៣៣នាក់ (ស្រី ១៧១នាក់)។ ជាការកត់សម្គាល់ការបង្ក្រាបបទល្មើសគ្រឿងញៀននៅត្រីមាសទី១ដើម ឆ្នាំ២០១៩នេះ គឺមានតែករណីបង្ក្រាបនៅមជ្ឈមណ្ឌលសំបុកគ្រឿងញៀនរ៉ុកប៉ុណ្ណោះដែលល្បីល្បាញជាងករណីណាៗទាំងអស់ ដោយសមត្ថកិច្ចបានឃាត់ខ្លួនមនុស្សប្រុសស្រីចំនួន៣១២នាក់ រឹបអូសសារធាតុញៀនជាង៥០គីឡូក្រាម ហើយមនុស្សចំនួន១៨នាក់ ត្រូវបានតុលាការសម្រេចឃុំខ្លួនក្នុងនោះរួមមានទាំងឧកញ៉ា គិត ធៀង ដែលជាម្ចាស់អាជីវកម្មរ៉ុកផងដែរ ។
លោកនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើការអំពាវនាវដល់ស្ថាប័នពាក់ព័ន្ធទាំងអស់ត្រូវរួមគ្នាស៊ើបអង្កេតស្វែងរកម្ចាស់ និងអ្នកពីក្រោយខ្នងនៃការនាំចូលនូវគ្រឿងញៀននេះបន្ថែមទៀតក្នុងគោលបំណងធ្វើយ៉ាងឲ្យករណីនេះមានការថយចុះ ដើម្បីសុវត្ថិភាពដល់បងប្អូនប្រជាពលរដ្ឋក៏ដូចជា សង្គមជាតិខ្មែរទាំងមូល ហើយមន្ត្រីពាក់ព័ន្ធទាំងអស់ត្រូវតែចាត់វិធានការឲ្យបានម៉ឺងម៉ាត់បំផុត ដើម្បីប្រទេសជាតិ ហើយត្រូវតែរួមសហការគ្នាឲ្យបានខ្លាំងក្លាបន្ថែមទៀត ក្នុងការបង្ក្រាប និងលុបបំបាត់ ៕
ចែករំលែកព័តមាននេះ