ខេត្តស្ទឹងត្រែង ៖ សេចក្តីរាយការណ៍បានឲ្យដឹងថា កាលពីរសៀលថ្ងៃទី២០ មីនា គណៈកម្មការមួយ ដែលបង្កើតឡើងដោយមានការចូលរួមពីនាយកដ្ឋានបច្ចេកទេសវិទ្យាសាស្ត្រ គ្រូពេទ្យជំនាញពិនិត្យសាកសព កម្លាំងនគរបាលស្រុកថាឡាបវិវ៉ាត់ និងអង្គភាពការពារកុមារ(CPU) បានចុះទៅស្រាវជ្រាវពិនិត្យ និងធ្វើកោសល្យវិច្ច័យលើសពកុមាររងគ្រោះឈ្មោះ វណ្ណា ពេជ្ជរ៉ា អាយុ១៨ខែ ឡើងវិញ ករណីកុមារានោះស្លាប់នៅក្នុងចំការស្វាយចន្ទី ដែលជំហានដំបូងឪពុកម្តាយកុមាររងគ្រោះបានអះអាងប្រាប់សមត្ថកិច្ចថា កូនរបស់ពួកគាត់ស្លាប់ដោយសារអត់បាយអត់ទឹក ខណៈវង្វេងដើរចេញពីខ្ទមចាំចំការ ។
សេចក្តីរាយការណ៍បានបន្តថា ជាលទ្ធផល គណៈកម្មការស៊ើបអង្កេតមិនទាន់រកឃើញតម្រុយណាមួយពាក់ព័ន្ធទៅនឹងអំពើឃាតកម្មនោះនៅឡើយទេ ។ ជាងនេះទៅទៀត គណៈកម្មការ បាននិងកំពុងនៅរង់ចាំមើលលទ្ធផល (DNA) ការវិភាគនិមិត្តសញ្ញាលើសាកសពកុមាររងគ្រោះនោះ ទើបបានបញ្ជាក់ជាផ្លូវការថាស្លាប់ដោយសារមូលហេតុអ្វីឱ្យពិតប្រាកដ ។
គួររំលឹកថា ៖ កាលពីវេលាម៉ោង៨និង៣០នាទីព្រឹកថ្ងៃទី១៩ មីនា គេបានប្រទះឃើញសពកុមារាអាយុ១៨ខែម្នាក់ដេកស្លាប់នៅក្នុងចំការស្វាយចន្ទីត្រពាំងត្រយ៉ង ស្ថិតនៅភូមិអន្លង់ស្វាយ ឃុំអូរ៉ៃ ស្រុកថាឡាបរិវ៉ាត់ ខេត្តស្ទឹងត្រែង ជាចំការស្វាយចន្ទីរបស់អ្នកស្រី នួន ម៉ៅ ហើយបើតាមការបញ្ជាក់ពីសមត្តកិច្ចថា ក្មេងប្រុសរងគ្រោះនោះស្លាប់ដោយមូលហេតុអត់អាហារ ព្រោះតែវង្វេងឪពុកម្តាយ ។
កុមារារងគ្រោះឈ្មោះ វណ្ណា ពេជ្ជរ៉ា អាយុ១៨ខែ ។
តាមប្រភពព័ត៌មានបានឱ្យដឹងថា កាលពីវេលាម៉ោង៨ព្រឹកថ្ងៃទី១៦ ខែមីនា ឆ្នាំ២០១៩ មាន ប្តីប្រពន្ធ២នាក់បានចេញទៅស៊ីឈ្នួលរើសផ្លែចន្ទីឲ្យគេ ដោយបានយកកូនប្រុសអាយុ១៨ខែទៅជាមួយផងដែរ ។
ប្រភពព័ត៌មានបានបន្តថា នៅពេលឪពុកម្តាយចេញដើររើសគ្រប់ស្វាយចន្ទី បានទុកកូនតូចអាយុ១ឆ្នាំកន្លះនោះឲ្យនៅលេងក្នុងខ្ទមចាំចំការ ដែលពួកគាត់មិនបានទៅឆ្ងាយប៉ុន្មានពីកូននោះទេ គឺអាចប្រហែលពី៥០ទៅ៦០ម៉ែត្រប៉ុណ្ណោះ ហើយស្ត្រីជាម្តាយតែងតែត្រឡប់ទៅមើលកូន២ទៅ៣ដងផងដែរ ។
ប្រភពព័ត៌មានបានបន្តទៀតថា នាវេលាថ្ងៃត្រង់ថ្ងៃដដែល ម្តាយបានត្រឡប់ទៅខ្ទមនោះវិញ ដើម្បីរកដាំបាយដាំទឹកហូបទាំងអស់គ្នា ពេលនោះស្រាប់តែបាត់កូនពីខ្ទមចាំចំការ ទើបពួកគាត់រួមទាំងកម្មករជាច្រើននាក់ បានដើររកតែរកមិនឃើញ ។ លុះដល់វេលាម៉ោង៨និង៣០នាទីព្រឹកថ្ងៃទី១៩ មីនា ពោលគឺ៣ថ្ងៃក្រោយមក ទើបគេប្រទះឃើញសាកសពកូនប្រុសនោះស្លាប់នៅចំណុចត្រពាំងត្រយ៉ង ស្ថិតនៅភូមិអន្លង់ស្វាយ ឃុំអូរ៉ៃ ស្រុកថាឡាបរិវ៉ាត់ ក្នុងចំការចន្ទី របស់អ្នកស្រី នួន ម៉ៅ នោះ ។
ក្រោយពីទទួលបានព័ត៌មានខាងលើនេះ កម្លាំងសមត្ថកិច្នគរបាលការិយាល័យជំនាញ សហការជាមួយកម្លាំងអធិការស្រុក និងគ្រូពេទ្យបានចុះទៅពិនិត្យសាកសពកុមារារងគ្រោះខាងលើនោះ ដោយរកមិនឃើញមានស្នាកស្នាមអ្វីនៅលើដងខ្លួនកុមារារងគ្រោះនោះទេ ។ បើតាមការសន្និដ្ឋានជាជំហ៊ានដំបូងរបស់គ្រូពេទ្យតុលាការគឺលោក ហុង ហៃ បានបញ្ជាក់ថា កុមារារងគ្រោះពិតជាស្លាប់ដោយសារការអត់អាហារ អត់បាយអត់ទឹកពិតប្រាកដមែន ព្រោះតែដើរចេញពីខ្ទម ហើយវង្វេងឪពុកម្តាយរកមិនឃើញ ។
តែទោះបីជាយ៉ាងណាការសន្និដ្ឋាននោះគ្រាន់តែជាជំហានដំបូងរបស់សមត្ថកិច្ច ប៉ុន្តែអ្វីៗស្ថិតនៅលើការស្រាវជ្រាវជាបន្ត ។ សពក្មេងប្រុសរងគ្រោះត្រូវបានសមត្តកិច្ចប្រគល់ជូនក្រុមគ្រួសារយកទៅរក្សាទុក ដើម្បីរង់ចាំមន្ត្រីជំនាញនៃនាយកដ្ឋានបច្ចេកទេស វិទ្យាសាស្ត្រមកធ្វើកោសល្យវិច្ច័យម្ដងទៀត ៕
ចែករំលែកព័តមាននេះ