រាជធានីភ្នំពេញ៖ តារាចម្រៀងដែលល្បីតាមរយៈបទ«មេម៉ាយសប្បាយចិត្ត» នាងរ័ត្ន រចនា ត្រៀមនឹងចេញទៅសម្តែងនៅប្រទេសអូស្ត្រាលីរយៈពេល១ខែពេញ ។ ដំណើរចេញទៅច្រៀងរាំនៅប្រទេសអូស្ត្រាលីពីតារាចម្រៀងរ័ត្ន រចនា ហៅមេម៉ាយសប្បាយចិត្ត គឺជាការសម្រេចគម្រោងទីមួយ បន្ទាប់ពីផែនការដែលនាងចង់ចេញទៅច្រៀងនៅប្រទេស២ផ្សេងទៀតមានបារាំង និងអាមេរិក នៅមិនទាន់ទទួលបានជោគជ័យនៅឡើយ ។
យ៉ាងណាក្តីការចេញច្រៀងជាលើកទីបីនៅប្រទេសអូស្ត្រាលីនាពេលនេះ ត្រូវរ័ត្ន រចនា រំពឹងថា អាចទទួលការគាំទ្រច្រើនពីជនរួមជាតិខ្មែរនៅទីនោះ ដ្បិតបច្ចុប្បន្ននាងហាក់មានកេរ្តិ៍ឈ្មោះបោះសំឡេងគួរសម ក្រោយល្បីបទមេម៉ាយសប្បាយចិត្តនោះ ។
ថ្លែងប្រាប់កោះសន្តិភាពតាមសាអេឡិចត្រូនិកកាលពីពេល ថ្មីៗកន្លងមកតារាចម្រៀងនាងរ័ត្ន រចនា ឲ្យដឹងថា ក្រោយពីសម្ភាសជាប់និងធ្លាក់វីសារួចរាល់ហើយនោះ នាងនឹងចាកចេញពីប្រទេសកម្ពុជាទៅកាន់ទឹកដីអូស្ត្រាលីនៅថ្ងៃទី២៥ មីនា ខាងមុខនេះហើយ ។ ក្នុងបេសកកម្មច្រៀងរាំនៅទីនោះ គឺមានរយៈពេលមួយខែពេញ ដែលការសម្តែងនោះគឺជាការឆ្លើយតបតាមការអញ្ជើញពីសមាគមមួយក្នុងរដ្ឋមេលប៊ន ប្រទេសអូស្ត្រាលី ដើម្បីផ្តល់ភាពសប្បាយរីករាយ និងការរាំលេងសប្បាយសម្រាប់ជនរួមជាតិខ្មែរដែលរស់នៅទីនោះនាឱកាសបុណ្យចូលឆ្នាំខ្មែរ។
សម្រាប់ការចេញច្រៀងនៅប្រទេសអូស្ត្រាលីនាពេលនេះ នាងបានត្រៀមខ្លួនរួចជាស្រេចនូវបទចម្រៀងដែលជាចង្វាក់ប្រពៃណីជាតិរាំលេងកម្សាន្តសម្រាប់ខ្មែរយើងនៅទីនោះ។ បើតាមរ័ត្ន រចនា ការចេញទៅសម្តែងនៅប្រទេសអូស្ត្រាលីនាពេលនេះគឺជាលើកទី៣ហើយសម្រាប់រូបនាង ប៉ុន្តែនាងរំពឹងថា ការចេញទៅលើកនេះនឹងទទួលបានការគាំទ្រច្រើនជាងមុន ព្រោះកាលពីចេញទៅលើកមុនគឺខ្មែរនៅទីនោះមិនសូវស្គាល់នាងច្បាស់នៅឡើយទេ ។
បើទោះបីជាមិនទាន់មានឱកាសបានចេញសម្តែងនៅក្រៅប្រទេសច្រើនក៏ដោយ ប៉ុន្តែរ័ត្ន រចនា ត្រូវបានគេមើលឃើញថា បច្ចុប្បន្ននាងកំពុងតែមានទីផ្សារ និងកាក់កបខ្លាំងជាមួយនឹងការកើបប្រាក់ពីការច្រៀងនៅក្នុងស្រុក ។ ជារឿយៗគេបានឃើញវត្តមានរបស់នាងចូលរួមច្រៀងនៅតាមបណ្តាលោងការទាំងនៅរាជធានីភ្នំពេញ និងតាមបណ្តាលខេត្ត ផ្សេងៗស្ទើរមិនដាច់រយៈ ។ ជាពិសេស ថ្មីៗនេះនាងទើបតែបានចូលច្រៀងនៅក្នុងផលិតកម្មមួយ ៕
ចែករំលែកព័តមាននេះ