ខេត្តមណ្ឌលគិរី ៖ ជនជាតិដើមរស់នៅខេត្តមណ្ឌលគិរីបានបង្ហាញអារម្មណ៍សប្បាយចិត្តឡើងវិញ នៅថ្ងៃទី២១ មីនា នេះ ក្រោយពីទទួលបានព័ត៌មានថា រដ្ឋបាលខេត្តនិងក្រសួងពាក់ព័ន្ធ បាននិរាយករណ៍ដីគ្រឹះស្ថានមជ្ឈមណ្ឌលសិក្សាស្រាវជ្រាវរ៉ែ ថាមពល ប្រេងកាត និងដីមន្ទីរចំនួន៣ នៅបរិវេណដីភ្នំ
ដោះក្រមុំ ទោះបីការកំណត់ព្រំដីនៅមិនទាន់បញ្ចប់ កាលពីថ្ងៃទី១៩ មីនា ក៏ដោយ ។
លោកស្វាយ សំអ៊ាង អភិបាលខេត្តមណ្ឌលគិរីបានឲ្យដឹងថា បញ្ហានេះ ខេត្តបានគិតគូរអំពីវិធានការណ៍និងរកដំណោះស្រាយផលប៉ះពាល់នានាជាបន្តបន្ទាប់ ។ ហើយផ្អែកលើការពិនិត្យអំពីផលប៉ះពាល់ជាក់ស្តែងនិងផ្អែកតាមលិខិតនិងគោលការណ៍ណែនាំនានា ខ្ញុំបានធ្វើការសម្រេចចិត្តលុបចោលនូវឯកសារផ្តល់ដីមួយចំនួនដែលមានភាពមិនសមស្រប ដើម្បីដកហូតយកដីនោះរក្សាទុកជាដីមជ្ឈមណ្ឌលវប្បធម៌វិញ ចៀសវាងការបាត់បង់សម្បត្តិរដ្ឋ» ។
លោកអភិបាលខេត្តបន្តថា «ការងារនេះ ក្នុងនាមអាជ្ញាធរខេត្តមានគោលជំហរទទួលខុសត្រូវ ខិតខំការពារដោយម៉ឺងម៉ាត់ ក្នុងការដោះស្រាយតាមគោលការណ៍ឈរលើកត្តាច្បាប់ឲ្យបានត្រឹមត្រូវតាមស្ថានភាពជាក់ស្តែង»។ ទោះជាយ៉ាងណាលោកអភិបាលខេត្តមិនបានបញ្ជាក់ពីទំហំដី ដែលត្រូវដកហូតមកវិញមានចំនួនប៉ុន្មានឡើយ ហើយត្រូវបោះបង្គោលកំណត់់ព្រំដីនៅពេលណាដែរ។
សូមរំលឹកថា ជនជាតិដើមភាគតិចរស់នៅខេត្តមណ្ឌលគិរី សម្តែងការខកចិត្តក្រោយបរាជ័យក្នុងការចុះបោះបង្គោលកំណត់ព្រំដីភ្នំដោះក្រមុំ កាលពីព្រឹកថ្ងៃទី១៩ មីនា ក្រោយរដ្ឋបាលខេត្តប្រកាសរំសាយការជួបជុំ ក្រោមមូលហេតុស្ថាប័នជំនាញពាក់ព័ន្ធអវត្តមាន ត្រូវលើកទៅធ្វើនៅពេលក្រោយ ។
លោក សុក សេរ៉ា នាយករងរដ្ឋបាលសាលាខេត្តមណ្ឌលគិរីបានឲ្យដឹងថា ដោយថ្នាក់ដឹកនាំចង់បានសមភាពគណៈកម្មាធិការដីរដ្ឋថ្នាក់ខេត្តទាំងអស់ចូលរួម ដើម្បីឲ្យបានដឹងឮទាំងអស់គ្នា ។ ដោយសារថ្ងៃនេះគណៈកម្មាធិការមួយចំនួនជាប់រវល់មិនបានចូលរួម ដូច្នេះត្រូវលើកទៅធ្វើពេលក្រោយ។ហើយរដ្ឋបាលខេត្តនឹងផ្តល់ដំណឹងជូនពីរថ្ងៃមុន ដើម្បីរៀបចំកិច្ចការងារឲ្យបានរលូន៕
ចែករំលែកព័តមាននេះ