ពួកអ្នកស្រាវជ្រាវអាមេរិកបានលើកឡើងកាលពីពេលថ្មីៗនេះថា ឱសថប្រឆាំងមហារីកមួយប្រភេទដែលត្រូវបានគេអនុម័តយកទៅប្រើប្រាស់លើមនុស្សរួចស្រេចហើយនោះ មានប្រសិទ្ធភាពក្នុងការព្យាបាលជំងឺទឹកនោមផ្អែម ។ ការពិសោធរបស់ក្រុមអ្នកស្រាវជ្រាវមកពីសាកលវិទ្យាល័យ Stanford University ទៅលើសត្វកណ្តុរបានបង្ហាញថា ឱសថមានឈ្មោះ Eylea ឬ Zaltrap ដែលផ្សំពីសមាសធាតុគីមីតែមួយដូចគ្នាគឺ Aflibercept មានប្រសិទ្ធភាពរាំងខ្ទប់ផ្លូវមូលេគុលមួយប្រភេទដែលពាក់ព័ន្ធនឹងការវិវឌ្ឍទៅជាជំងឺទឹកនោមផ្អែម ។
សាស្ត្រាចារ្យ Calvin Kuoសមាជិកក្រុមស្រាវជ្រាវបានថ្លែងថា ៖«ពួកយើងភ្ញាក់ផ្អើលខ្លាំងណាស់ដែលបានរកឃើញថា ឱសថនេះដែលបច្ចុប្បន្នត្រូវបានប្រើសម្រាប់ព្យាបាលអ្នកជំងឺមហារីកពោះវៀនធំនិងគល់ពោះវៀនធំបង្ហាញពីប្រសិទ្ធភាពរបស់វាលើជំងឺទឹកនោមផ្អែម ។ បើទោះនេះជាការពិសោធលើសត្វកណ្តុរ ប៉ុន្តែចំពោះមនុស្សក៏មិនខុសគ្នាប៉ុន្មានដែរ »។
លោកសាស្ត្រាចារ្យបានបន្តថា ៖«មានការងារច្រើនទៀតក្នុងការបកស្រាយការសិក្សាលើសត្វកណ្តុរទៅជាការសិក្សាលើមនុស្ស តែវាជារឿងចាប់អារម្មណ៍មួយដែលត្រូវស្វែងយល់ចំពោះឱសថ Aflibercept លើប្រសិទ្ធភាពព្យាបាលជំងឺទឹកនោមផ្អែម »៕
ចែករំលែកព័តមាននេះ