ខេត្តស្ទឹងត្រែង ៖ អាណិតណាស់ កូនគេកូនយើងអាយុទើប១៨ខែ ត្រូវគេប្រទះឃើញស្លាប់នៅក្នុងចម្ការស្វាយចន្ទីត្រពាំងត្រយ៉ង ស្ថិតក្នុងភូមិអន្លង់ស្វាយ ឃុំអូររ៉ៃ ស្រុកថាឡាបរិវ៉ាត់ ជាចម្ការស្វាយចន្ទីរបស់អ្នកស្រី នួន…
ខេត្តស្ទឹងត្រែង ៖ អាណិតណាស់ កូនគេកូនយើងអាយុទើប១៨ខែ ត្រូវគេប្រទះឃើញស្លាប់នៅក្នុងចម្ការស្វាយចន្ទីត្រពាំងត្រយ៉ង ស្ថិតក្នុងភូមិអន្លង់ស្វាយ ឃុំអូររ៉ៃ ស្រុកថាឡាបរិវ៉ាត់ ជាចម្ការស្វាយចន្ទីរបស់អ្នកស្រី នួន ម៉ៅ ។ បើតាមសមត្ថកិច្ចនិយាយថា ក្មេងប្រុសនេះឈ្មោះ វណ្ណា ពេជ្ជរ៉ា អាយុ១៨ខែ ស្លាប់ដោយមូលហេតុអត់អាហារ ព្រោះតែវង្វេងឪពុកម្តាយ ។
សេចក្តីរាយការណ៍ឲ្យដឹងទៀតថា កាលពីវេលាម៉ោង៨ព្រឹកថ្ងៃទី១៦ មីនា មានប្តីប្រពន្ធមួយគូ បានទៅសុីឈ្នួលរើសផ្លែចន្ទីឲ្យគេ ដោយយកកូនប្រុសអាយុ១៨ខែទៅជាមួយផង ។ នៅពេលឪពុកម្តាយចេញដើររើសគ្រាប់ស្វាយចន្ទី បានទុកកូនតូចអាយុទើប១ឆ្នាំកន្លះនោះ ឲ្យនៅលេងក្នុងខ្ទមចាំចម្ការ ដែលពួកគាត់មិនបានទៅឆ្ងាយប៉ុន្មានពីកូនទេ គឺអាចប្រហែលពី៥០ទៅ៦០ម៉ែត្រប៉ុណ្ណោះ ហើយស្ត្រីជាម្តាយតែងតែត្រឡប់ទៅមើលកូន២ទៅ៣ដងដែរ ។
នាវេលាម៉ោងថ្ងៃត្រង់ ម្តាយបានត្រឡប់ទៅខ្ទមនោះវិញ ដើម្បីដាំបាយហូប ពេលនោះស្រាប់តែបាត់កូនពីខ្ទមចាំចម្ការ ទើបពួកគាត់រួមទាំងកម្មករជាច្រើននាក់ នាំគ្នាដើររកតែរកមិនឃើញ ។ លុះដល់វេលាម៉ោងប្រមាណ៨និង៣០នាទីព្រឹកថ្ងៃទី១៩ ខែមីនា ពោលគឺ៣ថ្ងៃក្រោយមក ទើបគេប្រទះឃើញកូនប្រុសនោះស្លាប់ទៅហើយនៅចំណុចត្រពាំងត្រយ៉ង ស្ថិតក្នុងភូមិអន្លង់ស្វាយ ឃុំអូររ៉ៃ ស្រុកថាឡាបរិវ៉ាត់ ក្នុងចម្ការចន្ទីរបស់អ្នកស្រី នួន ម៉ៅ ។
ក្រោយពីទទួលបានព័ត៌មាននេះ នគរបាលការិយាល័យជំនាញ សហការជាមួយនគរបាលស្រុក និងគ្រូពេទ្យ បានទៅពិនិត្យសពក្មេងប្រុស និងរកមិនឃើញមានស្លាកកស្នាមអ្វីនៅខ្លួនប្រាណគួរឲ្យសង្ស័យទេ ។ បើតាមការសន្និដ្ឋានជំហានដំបូងរបស់គ្រូពេទ្យតុលាការគឺលោក ហុង ហៃ បញ្ជាក់ថា ក្មេងប្រុសនេះស្លាប់ដោយសារការអត់អាហារ ព្រោះដើរចេញពីខ្ទមហើយវង្វេងឪពុកម្តាយរកមិនឃើញ ។
ទោះជាយ៉ាងណា ការសន្និដ្ឋាននេះគ្រាន់តែជាជំហានដំបូងរបស់សមត្ថកិច្ចប៉ុណ្ណោះ ប៉ុន្តែអ្វីៗ ស្ថិតនៅលើការស្រាវជ្រាវបន្ត ។ សពក្មេងប្រុសត្រូវបានសមត្តកិច្ចប្រគល់ជូនក្រុមគ្រួសារយកទៅរក្សាទុក រង់ចាំមន្ត្រីនៃនាយកដ្ឋានបច្ចេកទេសវិទ្យាសាស្ត្រធ្វើលើកោសល្យវិច័យម្ដងទៀត ។
ចែករំលែកព័តមាននេះ