សង្វេគណាស់! ដូនចាស់ម្នាក់ស្លា.ប់ក្នុងភ្នក់ភ្លើង និងចៅប្រុសរបួសទៀត
- កំពង់ចាម
ខេត្តកំពង់ចាម ៖ ពិតជាគួរឲ្យតត់ស្លុតណាស់ ដោយដូនចាស់ម្នាក់ឈ្មោះ សែម ប៉ុក អាយុ៦៧ឆ្នាំ នៅភូមិខ្ទួយទី៤ ឃុំអូរម្លូ ស្រុកស្ទឹងត្រង់…
ខេត្តកំពង់ចាម ៖ ពិតជាគួរឲ្យតត់ស្លុតណាស់ ដោយដូនចាស់ម្នាក់ឈ្មោះ សែម ប៉ុក
អាយុ៦៧ឆ្នាំ នៅភូមិខ្ទួយទី៤ ឃុំអូរម្លូ ស្រុកស្ទឹងត្រង់ បានស្លាប់ក្នុងភ្នក់ភ្លើង និងចៅប្រុសអាយុ១៧ឆ្នាំ បានរងរបួសរលាកជើងសងខាង ក្នុងគ្រោះអគ្គិភ័យកើតឡើង កាលពីវេលាម៉ោង៣និង១៦នាទីរសៀលថ្ងៃទី១៩ មីនា ២០១៩ ចៅប្រុសត្រូវបានគេបញ្ជូនទៅសង្គ្រោះនៅមណ្ឌលសុខភាពអូរម្លូផងដែរ ។
លោកវរសេនីយឯក ប៉ាក ជាតិ អធិការនគរបាលស្រុកស្ទឹងត្រង់ប្រាប់ឲ្យដឹងថា នូវពេលមុនកើតហេតុចៅប្រុសឈ្មោះ ផល សុធា ដែលមានផ្ទុកមេរោគអេដស៍បានសុំលុយពីជីដូនបង្កើតរបស់ខ្លួនចំនួន២ម៉ឺនរៀល សម្រាប់ជាសោហ៊ុយក្នុងការធ្វើដំណើរទៅកាន់រាជធានីភ្នំពេញ ដើម្បីទៅរស់នៅក្នុងមណ្ឌលដែលទីនោះមានការថែទាំដល់អ្នកដែលមានផ្ទុកមេរោគនេះ ។
លោកអធិការនគបាលស្រុកស្ទឹងត្រង់ប្រាប់បន្តថា ក្នុងពេលនោះក៏មានការប្រកែកគ្នាបន្តិចដោយជីដូនដែលជាកម្មករដាំដុះរបស់ក្រុមហ៊ុន ឡុង ស្រេង ចំការកៅស៊ូបឹងកេត មិនចង់ឲ្យចៅរបស់ខ្លួនទៅនោះទេ បន្ទាប់មកដូនចាស់រូបនោះបានខឹងសម្បារនឹងចៅប្រុស ហើយបានយកប្រេងសាំងក្នុងដបចំនួន២លីត្រមកចាក់លើខោអាវក្នុងផ្ទះតៀមសាងសង់ពីថ្មបេតុង ។ រួចបានយកដែកកេះមកគូស ដើម្បីបើកចង្ក្រានហ្គាសកំដៅសម្លគ្រានោះក៏ស្រាប់តែបណ្តាលឲ្យឆាបឆេះមកលើខ្លួនប្រាណ សន្ធោសន្ធៅ ហើយចៅប្រុសបានរងការរលាកជើងសងខាង និងបានលោតចេញមកក្រៅទាន់ ដោយគ្រាន់តែបណ្តាលឲ្យរងរបួសជើងសងខាង ហើយជីដូនវ័យ៦៧ឆ្នាំនោះ បានស្លាប់ក្នុងភ្នក់ភ្លើងគួរឲ្យអាណិតណាស់ ។
ក្រោយកើតហេតុកម្លាំងសមត្ថកិច្ចបានបង្កើតគណៈកម្មការ ដើម្បីពិនិត្យសពដូនចាស់រូបនោះ និងបានសន្និដ្ឋានថា សពពិតជាបានស្លាប់ដោយដោយរលាកភ្លើងមែន ។ សូមបញ្ជាក់ថា ឪពុកម្តាយរបស់ចៅប្រុសនោះបានស្លាប់អស់ហើយ ដោយសារតែកើតជំងឺអេដស៍ ហើយចៅប្រុសឈ្មោះសុធា បានឆ្លងមេរោគអេដស៍ពីឪពុកម្តាយរបស់គេ ដើម្បីការពន្យាជីវិតរស់ឲ្យបានរាងយូរ គឺចង់ទៅរស់នៅក្នុងមណ្ឌលមួយកន្លែងក្នុងរាជធានីភ្នំពេញ ខោអាវដែលបានរៀបចំដាក់ក្នុងបាឡូត្រូវបានឆេះអស់រលីង ។ចំណែក សពដូនចាស់ខាងលើត្រូវបានសាច់ញាតិរៀបចំធ្វើបុណ្យតាមប្រពៃណីផងដែរ ៕
ចែករំលែកព័តមាននេះ