ប្រទេសម៉ូសំប៊ិក ៖ យោងតាមតុល្យការចុងក្រោយថា មនុស្សយ៉ាងតិច៣០០នាក់បានត្រូវស្លាប់ ដោយសារព្យុះស៊ីក្លូនឈ្មោះIDAI វាយប្រហារកាលពីសប្ដាហ៍មុន លើតំបន់អាហ្រិ្វកភាគខាងត្បូង ដែលនៅទីនោះពួកអ្នកជួយសង្គ្រោះកាលពីថ្ងៃទី១៩មីនា បន្តតាមរុករកនិងជួយមនុស្សច្រើនពាន់នាក់ ដែលជាប់លើដើមឈើនិងដំំបូលផ្ទះ។
កាលពីថ្ងៃទី១៩មីនា ប្រធានាធិបតីម៉ូសំប៊ិក លោកFILIPE NYUSI ដែលប្រកាសពីការកាន់ទុក្ខជាតិរយៈពេល៣ថ្ងៃអះអាងថា នៅម៉ូសំប៊ិក ជាប្រទេសរងការប៉ះពាល់ខ្លាំងបំផុតដោយទឹកជំនន់មកពីព្យុះ ចំនួនអ្នកស្លាប់បានឡើងដល់ជាង២០០នាក់។ មុននេះលោកថាចំនួនអ្នកស្លាប់ដោយសារព្យុះនោះអាចមានដល់១០០០នាក់។ ចំណែកនៅប្រទេសស៊ីមបាវ៉េជិតខាង អ្នកស្លាប់ឡើងដល់៩៨នាក់ ហើយមនុស្សជាង២០០នាក់បាត់ខ្លួន។ យោងតាមអ.ស.បថា មនុស្សដល់ទៅ២,៦លាននាក់រងការប៉ះពាល់ដោយសារគ្រោះមហន្តរាយនេះ។
រដ្ឋមន្ត្រីបរិស្ថានម៉ូសំប៊ិកលោកCELSON CORREIAនិយាយថា នៅភាគកណ្ដាលប្រទេសលោក ផ្ទៃដីក្នុងរង្វង់១០០គីឡូម៉ែត្រក្រឡាត្រូវទឹកជន់លិចទាំងស្រុង។ មនុស្សជិត៣៥០.០០០នាក់នៅជាប់ក្នុងបណ្ដាតំបន់ទឺកលិច។ អង្គការកម្មវិធីស្បៀងអាហារពិភពលោកPAM ដែលចាប់ផ្ដើមបញ្ជូនជំនួយ សម្រាប់មនុស្សជាងកន្លះលាននាក់និយាយថា សភាពការណ៍ពុំទាន់ប្រសើរនៅឡើយ ព្រោះភ្លៀងខ្លាំងនឹងធ្លាក់ទៀតនាប៉ុន្មានថ្ងៃខាងមុខ។
នៅម៉ូសំប៊ិកក៏ដូចជានៅស៊ីមបាវ៉េ ស្ពាននិងផ្លូវថ្នល់ជាច្រើនត្រូវបំផ្លាញដោយទឹកជំនន់ ដែលធ្វើឲ្យស្មុគស្មាញដល់ប្រតិបត្តិការជួយសង្គ្រោះនិងជម្លៀសមនុស្សចេញ។ តាមនាវាកៅស៊ូនិងឧទ្ធម្ភាគចក្រ ពួកអ្នកជួយសង្គ្រោះបន្តនាថ្ងៃទី១៩មីនា ជួយសង្គ្រោះមនុស្សដែលជាប់នៅលើចុងឈើឬនៅលើដំបូលផ្ទះ។ មនុស្សយ៉ាងតិច៨០នាក់ សុទ្ធតែជានារីនិងកុមារត្រូវបានជួយសង្គ្រោះនាថ្ងៃទី១៩មីនា ក្នុងតំបន់ប៊ូហ្ស៊ី ភាគខាងត្បូងទីក្រុងកំពង់ផែបេអីុរ៉ាដែលរងការបំផ្លាញស្ទើរតែ៩០%៕
ចែករំលែកព័តមាននេះ