ប្រទេសចិន-សហភាពអឺរ៉ុប ៖ ទីប្រឹក្សារដ្ឋនិងជារដ្ឋមន្ត្រីការបរទេសចិន លោកវ៉ាងយីថ្លែងកាលពីថ្ងៃទី១៨មីនាថា ចិននិងសហភាពអឺរ៉ុបសម្រេចបានការព្រមព្រៀងគ្នាលើ១០ចំណុចសំខាន់។ លោកវ៉ាងយីកាលពីថ្ងៃទី១៨មីនាស្ថិតនៅក្រុងព្រុចសែលបែលហ្ស៊ិក ដើម្បីចូលរួមក្នុងការចរចាយុទ្ធសាស្ត្រវគ្គទី៩កម្រិតខ្ពស់ចិន-សហភាពអឺរ៉ុប។
ក្នុងសន្និសីទសារព័ត៌មានរួមមួយជាមួយលោកស្រី FEDERICA MOGHERINI តំណាងជាន់ខ្ពស់សហភាពអឺរ៉ុប ទទួលបន្ទុកកិច្ចការបរទេសនិងនយោបាយសន្តិសុខ លោកវ៉ាងយីថ្លែងថា ទំនាក់ទំនងកិច្ចសហប្រតិបត្តិការនិងការប្រកួតប្រជែកគ្នារវាងចិននិងអឺរ៉ុប ជាចំណុចកណ្ដាលនៃការព្រួយបារម្ភក្នុងភាពជាដៃគូយុទ្ធសាស្ត្រសកលចិន-សហភាពអឺរ៉ុប។ ក្នុងពេលចរចាយុទ្ធសាស្ត្រ ភាគីទាំង២ទទួលស្គាល់ថា កិច្ចសហប្រតិបត្តិការរបស់ពួកគេ សំខាន់ជាងការប្រកួតប្រជែងគ្នានិងថា ភាគីទាំង២សម្រេចបានចំណុចត្រូវរ៉ូវគ្នាច្រើន ជាងការខ្វែងទំនាស់គ្នា។
នាឱកាសនោះលោកវ៉ាងយី បានអះអាងពីចំណុចត្រូវរ៉ូវគ្នា១០ចំណុចសំខាន់ រវាងភាគីទាំង២។ ចំណុចទាំងនោះមានជាពិសេស ចិននិងសហភាពអឺរ៉ុប គាំទ្រចំពោះលទ្ធិពហុនិយម ប្រឆាំងរាល់ការអនុវត្តបែបឯកតោភាគី។ ភាគីទាំង២គាំទ្រតួនាទីគ្របដណ្ដប់របស់អ.ស.ប ក្នុងបណ្ដាកិច្ចការអន្តរជាតិ ហើយការពារគំំនិតដែលថា បណ្ដាបទដ្ឋានជាសារវ័នទាំងឡាយទាក់ទិននឹងទំនាក់ទំនងអន្តរជាតិ ត្រូវតែផ្អែកលើធម្មនុញ្ញអ.ស.ប។ ភាគីទាំង២គាំទ្រសេដ្ឋកិច្ចពិភពលោកបើកចំហ ហើយប្រឆាំងនឹងលទ្ធិគាំពារនិយម។
ភាគីទាំង២គាំទ្រប្រព័ន្ធពាណិជ្ជកម្មពហុភាគី ហើយគាំទ្រដល់ការកែទម្រង់និងការពង្រឹងអង្គការពាណិជ្ជកម្មពិភពលោក។ ភាគីទាំង២គាំទ្រដំណោះស្រាយដោយសន្តិវិធីនៃវិបត្តិនិងជម្លោះតំបន់ តាមរយៈការចរចានិងការពិគ្រោះយោបល់គ្នា។ ចិននិងសហភាពអឺរ៉ុបគាំ ទ្រដល់ការពង្រឹងកិច្ចសហប្រតិបត្តិការអន្តរជាតិ ទប់ទល់ការប្រឈមធំៗរបស់ពិភពលោក ដូចជាការផ្លាស់ប្ដូរបរិយាកាសជាដើម។ ភាគីទាំង២គាំទ្រដល់ការតស៊ូប្រឆាំងភេរវកម្មក្រោមគ្រប់រូបភាព ហើយចង់ឲ្យចាត់បណ្ដាវិធានការជាសកលនានា ដើម្បីទប់ស្កាត់ការរីករាលដាលនៃលទ្ធិជ្រុលនិយម៕
ចែករំលែកព័តមាននេះ