រាជធានីភ្នំពេញ ៖ បន្ទាប់ពីធ្វើតេស្តសាកល្បងសមត្ថភាពអស់រយៈពេលជាង ២ខែកន្លងមកនេះ ក្លិបបាល់ទាត់វិសាខា បានសម្រេចជ្រើសរើសយកកីឡាករបរទេសចំនួន៥រូបមកជួយពង្រឹងក្លិបនៅក្នុងការប្រកួតដណ្ដើមពានរង្វាន់មិត្តហ្វូនខេមបូឌានលីគរដូវកាលថ្មីឆ្នាំ២០១៩។ លោក ហុក សុចិត្រា អ្នកចាត់ការទូទៅរបស់ក្លិបបាល់ទាត់វិសាខា…
រាជធានីភ្នំពេញ ៖ បន្ទាប់ពីធ្វើតេស្តសាកល្បងសមត្ថភាពអស់រយៈពេលជាង ២ខែកន្លងមកនេះ ក្លិបបាល់ទាត់វិសាខា បានសម្រេចជ្រើសរើសយកកីឡាករបរទេសចំនួន៥រូបមកជួយពង្រឹងក្លិបនៅក្នុងការប្រកួតដណ្ដើមពានរង្វាន់មិត្តហ្វូនខេមបូឌានលីគរដូវកាលថ្មីឆ្នាំ២០១៩។
លោក ហុក សុចិត្រា អ្នកចាត់ការទូទៅរបស់ក្លិបបាល់ទាត់វិសាខា បានឱ្យដឹងថា សម្រាប់ វត្តមានកីឡាករបរទេសទាំង៥រូបនេះ សង្ឃឹមថានឹងជួយពង្រឹងសមត្ថភាពក្លិបឱ្យកាន់តែប្រសើរ ឡើងសម្រាប់រដូវកាលថ្មីឆ្នាំ២០១៩ ។
មុននឹងសម្រេចចិត្តទទួលយក កីឡាករបរទេសទាំង៥រូបនេះមិនត្រឹមតែយើងពិនិត្យមើលទៅ លើប្រវត្តិការងារប៉ុណ្ណោះទេថែមទាំងតម្រូវឱ្យ ពួកគេឆ្លងកាត់ការធ្វើតេស្តនៅលើទីលានជាក់ ស្ដែងអស់រយៈពេលជាច្រើនខែទៀតផង ។ កីឡាករបរទេសទាំង៥រូបដែលមានសញ្ជាតិផ្សេងៗគ្នា គឺកូរ៉េ ជប៉ុន អាល្លឺម៉ង់ ប៊ុលហ្គារី និងប្រេស៊ីល សុទ្ធតែមានបទពិសោធធ្លាប់លេងឱ្យក្លិបជាច្រើន។
កីឡាករPAK SONG CHOLសញ្ជាតិកូរ៉េខាងត្បូង ត្រូវបានក្លិបបាល់ទាត់វិសាខា បន្តកិច្ចសន្យាថ្មីបន្ទាប់ពីកីឡាករពាក់អាវលេខ៩រូបនេះ បានរួមចំណែកជួយក្លិបដណ្ដើមបានចំណាត់ថ្នាក់លេខ៣ក្នុងការប្រកួតលីគ កំពូលកម្ពុជា កាលពីរដូវកាលមុន ។
កីឡាករ IDEGUCHI MASAAKI ជនជាតិជប៉ុន ពាក់អាវលេខ២៨ មានតួនាទីជាខ្សែបម្រើបានចាប់អាជីពកីឡាករបាល់ទាត់តាំងពីនៅរៀនសាកលវិទ្យាល័យHannanក្នុងឆ្នាំ២០០៧-២០១០ ។ បន្ទាប់មកគេបានលេងឱ្យក្លិបជាច្រើនរួមមាន ក្លិបYokohama(ជប៉ុន) ឆ្នាំ២០១១ដល់២០១៤, ក្លិបMetre Gallery (ហុងកុង)ឆ្នាំ២០១៥ ហើយបានផ្ទេរមកក្លិបចាស់វិញនៅចុងឆ្នាំ២០១៥ មុនលេងឱ្យក្លិបHoang Anh Gia Lai(វៀតណាម) ឆ្នាំ២០១៧ និងចុងក្រោយលេងឱ្យក្លិប OSAKA(ជប៉ុន)ឆ្នាំ២០១៨។
កីឡាករSKRAPARAS EVNGELOSសញ្ជាតិអាល្លឺម៉ង់កាត់ក្រិក មានតួនាទីជាខ្សែបម្រើ ពាក់អាវលេខ៩៩ ។ កីឡាកររូបនេះចាប់ផ្ដើមលេងបាល់ទាត់នៅលើទឹកដីអាល្លឺម៉ង់ផ្ដើមចេញពីក្រុមយុវជននៃក្លិប Bayon 04 Leverkusen Youth តាំងពីឆ្នាំ២០០២ ហើយបានវិវត្តខ្លួនក្លាយជាកីឡាករអាជីព និងបានចូលរួមលេងឱ្យក្លិបអាល្លឺម៉ង់ជាច្រើន ចាប់តាំងពីឆ្នាំ២០០៨ដល់ឆ្នាំ២០១៥ រួមមានក្លិប Westfalia Herne,FC Krey,Tus Ennepetal និងក្លិបMslchowerជាដើម ។
បន្ទាប់មកកីឡាកររូបនេះត្រូវបានផ្ទេរទៅលេងឱ្យក្លិបជាច្រើនដូចជាក្លិបរបស់ក្រិក វៀតណាម រ៉ូម៉ានី និងអូស្ត្រាលី និងចុងឆ្នាំ២០១៨បានវិលទៅលេងឱ្យក្លិបSportul Snagovវិញ។
កីឡាករ NIKOLOV LUBEN GUEORGUIEVជនជាតិប៊ុលហ្គារី ពាក់អាវលេខ៩៧ ។ កីឡាកររូបនេះក៏ធ្លាប់ឆ្លងកាត់ការលេងឱ្យក្លិបជាច្រើនក្នុងតំបន់អាស៊ានដូចជាក្លិបSisaket FCរបស់ថៃពីឆ្នាំ ២០១៥ដល់២០១៦។ក្លិបPKNP FCនៃលីគកំពូលរបស់ម៉ាឡេស៊ីកាលពីឆ្នាំ២០១៨។
កីឡាករ Da CRUZ GUARDIANO ELIELជនជាតិប្រេស៊ីលពាក់អាវលេខ៣១មានតួនាទីជាខ្សែប្រយុទ្ធ ។ កីឡាកររូបនេះក៏មានប្រវត្តិមិនធម្មតានោះដែរ ដោយគេបានចាប់ផ្ដើមអាជីពបាល់ទាត់ជាមួយក្រុមយុវជនParana FCនៅឆ្នាំ២០០៧ តែមួយឆ្នាំក្រោយមកបានក្លាយជាកីឡាករកម្រិតអាជីព និងបានទៅលេងឱ្យក្លិបក្នុងប្រទេសកំណើតរួមមានក្លិបCanorter,Nacional,Rondonopolis,
Cristal FCនិងក្លិបUberabaជាដើម។
ចំណែកក្លិប ក្រៅប្រទេសវិញមានដូចជាក្លិបSportivo Luqueno(ប៉ារ៉ាហ្កាយ)ឆ្នាំ២០១០, ក្លិបParak Fa ម៉ាឡេស៊ី២០១៣-២០១៤, ក្លិបUiTMម៉ាឡេស៊ី២០១៧និង២០១៦, ក្លិបNakhon Parthom United៩(ថៃ)ចុងឆ្នាំ២០១៦និងចុងក្រោយលេងឱ្យក្លិបSporting CLUDE IDEAL(ព័រទុយហ្គាល់ឆ្នាំ២០១៧និង២០១៨។
តាមរយៈកីឡាករបរទេសទាំង៥រូបខាងលើនេះ ក្លិបបាល់ទាត់វិសាខារំពឹងថា ពួកគេនឹងក្លាយជាផ្នែកមួយយ៉ាងសំខាន់ក្នុងការពួត ដៃគ្នាជាមួយកីឡាករក្នុងស្រុក ធ្វើការប្រកួត ប្រជែងក្នុងក្របខ័ណ្ឌលីគកំពូលកម្ពុជារដូវកាលថ្មីនិងពានរង្វាន់ផ្សេងៗដើម្បីសម្រេចគោលដៅក្លិបនារដូវកាលថ្មីនេះ ៕
ចែករំលែកព័តមាននេះ