ខេត្តមណ្ឌលគិរី ៖ សេចក្តីរាយការណ៍ពីស្រុកកោះញែកបានឲ្យដឹងថា ប្រជាពលរដ្ឋរស់នៅទីរួមស្រុកនេះ កំពុងប្រឈមនឹងការខ្វះខាតទឹកប្រើប្រាស់ប្រចាំថ្ងៃ ខណៈប្រភពទឹកដែលតែងផ្គត់ផ្គង់ដល់ប្រជុំជនផ្សារកោះញែក ត្រូវបានរីងស្ងួតជាបន្តបន្ទាប់។
លោក ប៉ោ ពួជ ម្ចាស់អាជីវកម្មទឹកស្អាតស្រុកកោះញែកបានឲ្យដឹងថា ក្នុងរយៈពេល១ខែទៀត បើនៅតែមិនមានភ្លៀងធ្លាក់ទេ ប្រជាពលរដ្ឋរស់នៅប្រជុំជនស្រុកកោះញែកនឹងអត់ទឹកប្រើប្រាស់ ។ លោកបន្តថា ចាប់តាំងពីចុងខែមករាមកប្រភពទឹកសំខាន់ៗដែលផ្គត់ផ្គង់សម្រាប់ផលិតទឹកស្អាតដល់អ្នកស្រុក ដូចជា អូរច្បារ នឹងទឹកដែលមានប្រភពក្នុងទំនប់សម័យប៉ុល ពត ត្រូវរីងបន្តិចម្តងៗរហូតបច្ចុប្បន្ននេះកាន់តែប្រឈមខ្លាំងបំផុត។
បើតាមការបញ្ជាក់របស់ម្ចាស់អាជីវកម្មទឹកស្អាតថា ក្រុមការងាររបស់លោកកំពុងញាប់ដៃញាប់ជើង តបណ្តាញប្រភពទឹកពីកន្លែងដទៃទៀត ទោះមានចម្ងាយឆ្ងាយពីស្ថានីយ៏ផលិតទឹកក៏ដោយ ដើម្បីបំពេញតម្រូវជាក់ស្តែង សម្រាប់ប្រជាពលរដ្ឋចំនួន១០៥០គ្រួសារ ដែលកំពុងទទួលសេវាទឹកស្អាតរបស់ខ្លួនស្របនឹងកំណើនច្រើនជាងឆ្នាំមុន។
លោកស៊ិន វណ្ណវុឌ្ឍ អភិបាលស្រុកកោះញែកបានថ្លែងថា គិតត្រឹមថ្ងៃទី២០ ខែមិនា នេះ នៅទូទាំងស្រុកកោះញែកនៅមិនទាន់មានករណីអត់ទឹកប្រើសោះនោះទេ។ប៉ុន្តែលោកអភិបាលបានទទួលស្គាល់ថា នៅតាមទីតាំងខ្លះ ពិតជាមានការខ្វះខាតដោយអន្លើៗមែន។ជាក់ស្តែងនៅប្រជុំជនស្រុក ដែលមានការផ្តត់ផ្គង់ពីក្រុមហ៊ុនទឹកស្អាត គឺមានការរអាក់រអួលដូចពេលខ្លះ យប់មានទឹក ពេលថ្ងៃដាច់ទឹក ហើយមានទឹកពេលថ្ងៃ អត់ពេលយប់ទៅវិញ។
ទោះយ៉ាងណាលោកអភិបាលស្រុក បាននឹងកំពុងធ្វើរបាយការណ៏ដាក់ទៅថ្នាក់ខេត្តដើម្បីស្នើរសុំជំនួយ ជុសជុលអណ្តូងទឹកចាស់ៗដើម្បីអាចប្រើប្រាស់ឡើងវិញ។
ប្រជាពលរដ្ឋរស់នៅស្រុកកោះញែកបានសំនូមពរដល់មន្ទីរធនធានទឹក នឹងឧតុនិយម ខេត្តមណ្ឌលគិរី ជួយជុសជុលទំនប់ទឹកដែលបន្សល់ទុកតាំងពីសម័យប៉ុល ពតក្នុងឃុំស្រែសង្គម ដែលរងការខូចខាតខ្នងទំនប់ប្រមាណ២០%ឡើងវិញ។
ជុំវិញបញ្ហាខាងលើនេះ លោក ខែម ភារម្យ ប្រធានមន្ទីរធនធានទឹក នឹងឧតុនិយម ខេត្តមណ្ឌលគិរី អ្នកយកព័ត៌មានមិនអាចសុំការបំភ្លឺបានទេនៅថ្ងៃទី២០ មិនា នេះ ។
កាលពីថ្មីៗនេះ អភិបាលខេត្តមណ្ឌលគិរី លោក ស្វាយ សំអ៊ាង បានសម្រេចផ្តល់អណ្តូងស្នប់ចំនួន២ដល់ប្រជាពលរដ្ឋចំនួន៤០គ្រួសារ រស់នៅភូមិជីមៀត ឃុំណងឃីណិក ស្រុកកោះញែក ដែលនៅដាច់ស្រយាលពីប្រភពទឹកស្អាត៕
ចែករំលែកព័តមាននេះ