រាជធានីភ្នំពេញ ៖ ក្នុងរយៈពេលពីខែមករា និងកុម្ភៈនគរបាលចរាចរណ៍ផ្លូវគោក បានផាកពិន័យពីអ្នកមិនគោរពច្បាប់ចរាចរណ៍បានប្រាក់ចំនួនជិត៧០០លានរៀល ។ នេះបើតាមរយបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកដែលបានដាក់ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំខែមករា និងខែកុម្ភៈ នារសៀលថ្ងៃទី២០ ខែមីនា ឆ្នាំ២០១៩ នៅទីស្តីការក្រសួងសាធារណការ ដឹកជញ្ជូន ក្រោមអធិបតីភាពលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ។
របាយការណ៍អានដោយលោកនាយឧត្តមសេនីយ ហ៊ឹម យ៉ាន អគ្គស្នងការរងនគរបាលជាតិបានលើកឡើងថា ក្រោមកិច្ចសហប្រតិបត្តិការក្នុងខែមករា-កុម្ភៈ ឆ្នំ២០១៩ កងកម្លាំងនគរបាលចរាចរណ៍ផ្លូវគោកទូទាំងប្រទេសបានត្រួតពិនិត្យ និងមានវិធានការបានត្រួតពិនិត្យយានយន្តសរុបចំនួន២៦៤.៨៥៤គ្រឿង ក្នុងនោះម៉ូតូចំនួន៥៩ភាគរយ ។ បានរកឃើញយានយន្តល្មើសចំនួន៤៤.៩៣៩គ្រឿង ស្មើ១៧ភាគរយបានធ្វើការអប់រំចំនួន១៥.៤៧១គ្រឿងស្មើ៣៤ភាគរយ បានធ្វើការពិន័យចំនួន២៩.៤៦៨គ្រឿង ស្មើ៦៦ភាគរយ ។
លោកបានបញ្ជាក់ថា«អនុវត្តការបង់ប្រាក់ពិន័យតាមស្នាក់ការនគរបាលចរាចរណ៍ផ្លូវគោក ដែលបានកំណត់ទទួលបានប្រាក់ពិន័យចំនួន៦៩៨.០៨៥.០០០រៀល ។ លោកបន្តថា នៅក្នុងរយៈពេលខែមករា និងកុម្ភៈ គ្រោះថ្នាក់ចរាចរណ៍បានកើតឡើងចំនួន៦៩៣លើក បណ្តាលឲ្យស្លាប់ចំនួន៣១០នាក់ និងរបួសចំនួន១.០៧៧នាក់ ភាគច្រើន នៅរាជធានីភ្នំពេញចំនួន៥២នាក់ ខេត្តកណ្តាល២៧នាក់ និងខេត្តកំពង់ស្ពឺមានអ្នកស្លាប់២១នាក់ ។
ចំនួនជនរងគ្រោះជាមធ្យមក្នុងមួយថ្ងៃស្លាប់ចំនួន៥.៣នាក់ និងរបួសចំនួន១៨នាក់ ។ មូលហេតុការបើកបរលើសល្បឿនកំណត់៤០ភាគរយ មិនគោរពសិទ្ធិ២២ភាគរយ មិនប្រកាន់ស្តាំ១៥ភាគរយ វ៉ាជែង៩ភាគរយ បត់៦ភាគរយស្រវឹង៣ភាគរយ កត្តាយានយន្ត៣ភាគរយ និងងងុយ២ភាគរយ ។ លោកបន្ថែមទៀតថា ករណីគ្រោះថ្នាក់ចរាចរណ៍បើប្រៀបធៀបខែមករា-កុម្ភៈ ឆ្នាំ២០១៨ គ្រោះថ្នាក់ចរាចរណ៍កើនចំនួន១៣៦លើក ស្មើ២៤ភាគរយ ស្លាប់ថយចំនួន១៥នាក់ ស្មើ៥ភាគរយ និងរបួសកើនចំនួន២៧០នាក់ស្មើ៣៣ភាគរយ ។ លោកបន្តែមថា ក្នុងចំណោមអ្នកស្លាប់ចំនួន៣១០នាក់ ភាគច្រើនជាអ្នកជិះម៉ូតូមានចំនួន២៤១នាក់ ស្មើ៧៨ភាគរយ (ប្រភេទ១២៥សេសេចុះក្រោម )ក្នុងនោះមិនពាក់មួយសុវត្ថិភាពមានចំនួន១៨៨នាក់ ស្មើ៧៨ភាគរយ ។ ករណីគ្រោះថ្នាក់ត្រូវបានដោះស្រាយចប់មានចំនួន១០៨ករណី បញ្ជូនទៅតុលាការ១៩២ករណី មានបទល្មើសចំនួន៥៦នាក់ និងកំពុងអង្កេតចំនួន១២៨ករណី ។
សូមជម្រាបថា នៅក្នុងកិច្ចប្រជុំបូកសរុបលទ្ធផលការងារ អនុវត្តច្បាប់ចរាចរណ៍សម្រាប់ ខែមករា និង ខែកុម្ភៈនេះលោក ហ៊ឹម យ៉ាន ក៏បានអះអាងថា គ្រោះថ្នាក់ចរាចរណ៍មានភាពសាហាវជាងខែកន្លងមក ៕
ចែករំលែកព័តមាននេះ