ការស្រាវជ្រាវកាន់តែ ច្រើនឡើងៗបានបង្ហាញឲ្យដឹងអំពីការទាក់ទងនៃការរលាករ៉ាំរ៉ៃក្នុងរាងកាយជាមួយនឹងជំងឺរ៉ាំរ៉ៃ រួមទាំងជំងឺគួរឲ្យព្រួយបារម្ភច្រើនទៀតដូចជា ជំងឺបេះដូង, ជំងឺទឹកនោមផ្អែម, ជំងឺមហារីក និងជំងឺអាល់ហ្សៃម័រ ឬជំងឺភ្លេចភ្លាំង ។
កត្តាហ្សែន, កង្វះការហាត់ប្រាណ, ភាពតានតឹងក្នុងអារម្មណ៍ ក៏ដូចជាការប៉ះពាល់ទៅនឹងជាតិពុល ផ្សេងៗសុទ្ធតែរួមចំណែកបង្កការរលាករ៉ាំរ៉ៃក្នុងរាងកាយ ។ ប៉ុន្តែកុំបារម្ភ ! ការជ្រើសរើសរបបអាហារបានត្រឹមត្រូវអាចការពារអ្នកពីបញ្ហាសុខភាពនេះ និងថែមទាំងជួយប៉ះប៉ូវការខូចខាតបណ្ដាលមកពីការរលាករ៉ាំរ៉ៃទៀតផង ។ ប្រភេទនៃអាហារដែលអ្នកគួរទទួលទាន ដើម្បីចៀសផុតពីបញ្ហាហើមរលាកក្នុងរាងកាយ៖
១.អាហារមានផ្ទុកសារធាតុប្រឆាំងអុកស៊ីតកម្ម ៖ សារធាតុប្រឆាំងអុកស៊ីតកម្ម គឺជាសារធាតុចិញ្ចឹមដែលជួយបន្សាប និងប្រយុទ្ធប្រឆាំងរ៉ាឌីកាល់សេរី ។ រ៉ាឌីកាល់សេរីម៉ូលេគុលដែលអាចធ្វើឱ្យខូចកោសិកា និងបង្កការរលាកក្នុងរាងកាយ ។ ផ្កាខាត់ណា, ស្ពៃក្ដោប និងម្ទេសប្លោកក្រហម ជាប្រភពដ៏ប្រសើរនៃវីតាមីន C ដែលជាសារធាតុប្រឆាំងអុកស៊ីតកម្មដ៏មានឥទ្ធិពល ។ ចំណែកឯការ៉ុត និងដំឡូងផ្អែម ផ្ដល់សារធាតុប្រឆាំងអុកស៊ីតកម្ម beta-carotene ខណៈដែលប៉េងប៉ោះមានផ្ទុកសម្បូរទៅដោយសារធាតុប្រឆាំងអុកស៊ីតកម្ម lycopene ហើយបន្លែស្លឹកបៃតងក៏ជាប្រភពដ៏ប្រសើរនៃសារធាតុប្រឆាំងអុកស៊ីតកម្មផងដែរ ។
២.អាហារមានផ្ទុក Polyphenols ៖ Polyphenols ជាសារធាតុប្រឆាំងអុកស៊ីតកម្មដ៏មានឥទ្ធិពលមួយ ។ ភាគច្រើនសារធាតុនេះមានផ្ទុកក្នុងផ្លែឈើ និងបន្លែដែលមានពណ៌ខៀវ, ស្វាយ និងក្រហម ។ ទោះជាយ៉ាងណា ប្រភពដ៏ប្រសើរបំផុតនៃសារធាតុ Polyphenols គឺផ្លែប៉ោម, ស្ពៃក្ដោបពណ៌ក្រហម ឬស្វាយ, ស្ត្របឺរី, ឈ័ររី, ទំពាំងបាយជូរស្វាយ និងក្រហម, ឆៃថាវក្រហម, ផ្កាខាត់ណាខៀវ និងតែ ។
៣. អាហារមានផ្ទុកសារធាតុ Quercetin ៖ Quercetin ជាសារធាតុប្រឆាំងអុកស៊ីតកម្មមានឥទ្ធិពលប្រឆាំងការរលាក ។ សារធាតុនេះភាគច្រើនមានផ្ទុកក្នុង ខ្ទឹមស, ខ្ទឹមបារាំង, ទំពាំងបាយជូរក្រហម និងផ្កាខាត់ណាខៀវ ។
៤. អាហារមានផ្ទុក Curcumin ៖ Curcumin ជាសមាសធាតុមួយមានផ្ទុកក្នុងរមៀត ។ វាជាសារធាតុប្រឆាំងការរលាកដ៏មានឥទ្ធិពលបំផុតមួយ ។
៥. អាស៊ីតខ្លាញ់អូមេហ្គា៣ ៖ អាស៊ីតខ្លាញ់អូមេហ្គា3 គឺជាជាតិខ្លាញ់ល្អដែលដើរតួនាទីយ៉ាងសំខាន់ក្នុងមុខងាររាងកាយជាច្រើន ។ អាស៊ីតខ្លាញ់អូមេហ្គា3 ត្រូវបានផ្សារភ្ជាប់ទៅនឹងគុណប្រយោជន៍ជាច្រើនដែលជួយលើកកម្ពស់សុខភាពល្អប្រសើរ រួមទាំងប្រយុទ្ធប្រឆាំងជាមួយជំងឺមហារីក និងការរលាក ។
ប្រភពដ៏ប្រសើរនៃអាស៊ីតខ្លាញ់អូមេហ្គា៣ រួមមាន គ្រាប់ធញ្ញជាតិ, ពន្លកផ្កាស្ពៃ, ស្ពៃក្រញាញ់, ត្រីសាលម៉ុន, ត្រីធូណា, ត្រីសាឌីន និងត្រី herring (ប្រភពពី៖ Health.com.kh) ៕
ចែករំលែកព័តមាននេះ