រាជធានីភ្នំពេញ ៖ ទោះបីជានៅក្នុងឆ្នាំ២០១០ ពិភពលោកបានជួបនូវវិបត្តិសេដ្ឋកិច្ច ពិតមែន ប៉ុន្តែសម្រាប់ព្រះរាជាណាចក្រកម្ពុជា ហាក់មិនមានការប៉ះពាល់អ្វីធំដុំ ដែលគួរឱ្យកត់សម្គាល់នោះទេ ។ ជាក់ស្តែងនៅរាជធានីភ្នំពេញ ការអភិវឌ្ឍន៍ទីក្រុង កាន់តែមានសន្ទុះឈានឡើង ជាពិសេសសំណង់អគារខ្ពស់ៗ ដែលមិនធ្លាប់មានពីមុនមក បាននិងកំពុងសាងសង់ឥតឈប់ឈររហូតដល់ពេលនេះ ។ អ្វីដែលជាការកត់សម្គាល់នោះក្នុងឆ្នាំ២០១០កន្លងមកនេះ ជនបរទេស ជាពិសេសភ្ញៀវទេសចរបានចូលមកប្រទេសកម្ពុជា គឺគ្រាន់តែចូលតាមច្រកព្រលានយន្តហោះអន្តរជាតិភ្នំពេញ មានចំនួន៥៧៨.៦៦៣នាក់ កើនលើសឆ្នាំកន្លងទៅ១,២៣ភាគរយ ។ ដោយមិនគិតពីភ្ញៀវទេសចរដែលចូលតាមច្រកទ្វារអន្តរជាតិផ្សេងៗឡើយ ។
ចំនួននៃការកើនឡើងទាំងនេះ អាចបញ្ជាក់ឱ្យឃើញកាន់តែច្បាស់ថា សម្រាប់រាជធានីភ្នំពេញក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន បានរៀបចំប្រទេសឱ្យកាន់តែមានការរីកចម្រើនឥតឈប់ឈរ និងមានស្ថិរភាព ពិសេសបញ្ហាសន្តិសុខ ធ្វើឱ្យបរទេសដែលគេធ្លាប់តែរិះគន់យើង ពេលនេះត្រឡប់មកជឿជាក់ និងមានការជឿទុកចិត្តជាខ្លាំង ។ ជាក់ស្តែងក្រុមអ្នកវិនិយោគជាដើម បានវេចលុយយ៉ាងសន្ធឹកសន្ធាប់យកមកចាយ និងដាក់ទុននៅស្រុកយើង ។ យោងតាមរបាយការណ៍របស់សាលារាជធានីភ្នំពេញ ដែលបានចែកជូនក្នុងសន្និបាតប្រចាំឆ្នាំកាលពីពេលថ្មីៗកន្លងមកនេះបានបង្ហាញថា ជនបរទេសចូលរាជធានីភ្នំពេញក្នុងរយៈពេលមួយឆ្នាំ២០១០ តាមច្រកព្រលានយន្តហោះអន្តរជាតិភ្នំពេញមានចំនួន៥៧៨.៦៦៣នាក់ កើន១,២៣% ក្នុងនោះភ្ញៀវទេសចរចំនួន៨២.៩០២នាក់ ៕
ចែករំលែកព័តមាននេះ