ខេត្តក្រចេះ ៖ ស្ត្រីមេម៉ាយវ័យ៤០ប្លាយម្នាក់ នាមអះអាងប្រាប់នគរបាលថា រូបគាត់រងគ្រោះនូវអំពើចាប់រំលោភសេពសន្ថវៈពីជនសង្ស័យមានវ័យ៤០ប្លាយដូចគ្នា និងបានមកប្តឹងនគរបាលមូលដ្ឋាន ឱ្យជួយអន្តរាគមន៍ចាប់ជនសង្ស័យតាមផ្លូវច្បាប់ បន្ទាប់ពីជនសង្ស័យនៅតែព្យាយាមចាប់រំលោភមកលើរូបគាត់រហូតបានសម្រេច៣ដង នៅពេលដែលគាត់ទៅឃ្វាលក្របីនៅក្រោយភូមិ ។
បើតាមពាក្យបណ្តឹងរបស់ស្ត្រីមេម៉ាយរងគ្រោះអាយុ៤៤ឆ្នាំរូបនេះ បានប្តឹងមកនគរបាលមូលដ្ឋានឃុំវឌ្ឍនៈស្រុកសំបូរថា គាត់បានរងគ្រោះពីការចាប់រំលោភ របស់ជនសង្ស័យបានសម្រេច២លើក ហើយក៏ទុកឱកាសដល់ជនសង្ស័យ ដោយបានប្រាប់ទៅជនសង្ស័យថា ឱ្យឈប់ធ្វើសកម្មភាពចាប់រំលោភគាត់តទៅទៀត គឺគាត់មិនប្តឹងប្តល់នោះទេ ។
លុះនៅថ្ងៃទី១៩ មីនា នេះ ជននេះនៅតែបន្តសកម្មភាពចាប់រំលោភគាត់បានសម្រេចជាលើកទី៣ម្តងទៀត នៅពេលគាត់បានទៅឃ្វាលក្របី ក្បែរផ្ទះចម្ការរបស់ជនសង្ស័យ ។ ដោយសារអត់ទ្រាំមិនបាន ទើបគាត់អត់ទ្រាំមិនបាន ទើបសម្រេចចិត្តមកដាក់ពាក្យបណ្តឹងមកនគរបាល។
បុរសដែលរងការចោទអំពើរំលោភសេពសន្ថវៈលើស្ត្រីមេម៉ាយវ័យចំណាស់រូបនេះ ឈ្មោះ ហាក់ រ៉ុន អាយុ៤៧ឆ្នាំ សព្វថ្ងៃស្នាក់នៅម្នាក់ឯងនៅផ្ទះចម្ការ នៅខាងក្រោយភូមិ ក្នុងឃុំវឌ្ឍនៈ ស្រុកសំបូរ ដែលជាទីកន្លែងរូបគេធ្វើសកម្មភាពចាប់រំលោភលើស្ត្រីរងគ្រោះ នៅពេលដែលស្ត្រីរងគ្រោះតែងតែយកក្របីទៅឃ្វាល និងឈ្លាតចូលសម្រាកលេងនៅផ្ទះរបស់ជនសង្ស័យក្នុងន័យអ្នកជិតខាង (ស្ត្រីរងគ្រោះជាស្ត្រីមេម៉ាយ និងស្នាក់នៅក្នុងភូមិ-ឃុំជាមួយគ្នា) ។
នគរបាលបានសម្រង់ពាក្យបណ្តឹងស្ត្រីរងគ្រោះឲ្យដឹងទៀតថា ជនសង្ស័យបានធ្វើសកម្មភាពចាប់រំលោភលើស្ត្រីរងគ្រោះបានសម្រេចចំនួន២ដង តាំងពីថ្ងៃទី១៧ មីនា ។ ហើយស្ត្រីរងគ្រោះក៏មិនប្តឹងប្តល់លើជនសង្ស័យនោះទេ ដោយគ្រាន់តែប្រាប់ជនសង្ស័យបញ្ឈប់ធ្វើសកម្មចាប់រំលោភគាត់បន្តទៀត ។ រាល់ធ្វើសកម្មភាពចាប់រំលោភ គឺតែងតែធ្វើឡើងនៅក្នុងផ្ទះចម្ការរបស់ជនសង្ស័យ នៅពេលដែលស្ត្រីរងគ្រោះបានយកក្របីទៅឃ្វាលនៅក្បែរ និងបានចូលសម្រាកលេង ។
ការចាប់រំលោភបានធ្វើឡើងជាលើកចុងក្រោយម្តងទៀត នៅថ្ងៃទី១៩ មីនា នៅពេលដែលស្ត្រីរងគ្រោះបានទៅឃ្វាលក្របីនៅទីនោះម្តងទៀត។ ក្រោយការធ្វើសកម្មភាពចាប់រំលោភបានសម្រេចជាលើកទី៣រួចមក ស្ត្រីរងគ្រោះក៏បានមកប្តឹងនគរបាល ហើយនគរបាលក៏ចាប់ខ្លួនជនសង្ស័យរូបនេះបានក្នុងថ្ងៃតែមួយភ្លាមៗ។
មានការសន្និដ្ឋានមួយទៀតថា សកម្មភាពរំលោភនេះ ជាការត្រូវរ៉ូវគ្នារបស់អ្នកទាំងពីរ ។ តែដោយសារខ្លាចមានការបែកធ្លាយ និងបង្កភាពអាម៉ាស់នៅក្នុងភូមិ ទើបស្ត្រីមេម៉ាយរងគ្រោះ បានមកដាក់ពាក្យបណ្តឹងមកនគរបាលតែម្តង ។
ចែករំលែកព័តមាននេះ