រាជធានីភ្នំពេញ៖ ក្នុងពេលភរិយារបស់កវីគង្គ ប៊ុនឈឿន បានមកដល់កម្ពុជាកាលពីថ្ងៃទី១៧ ខែមីនា ឆ្នាំ២០១៩ មហាជនចង់ដឹងពីវិធានការនៃការប្តឹងផលិតកម្មសាន់ដេ និងនាយចឺម ដែលកាឡៃបទចម្រៀងស្នាដៃនិពន្ធរបស់លោកគង្គ ប៊ុនឈឿន ។
កូនស្រីពៅរបស់លោកគង្គ ប៊ុនឈឿន អះអាងថា «តាមពិតមិនមែនសំខាន់ចំពោះនាយចឺម ទាំងស្រុងទេ អ្នកចមៀងទូទៅគឺច្រៀងតាមផលិតកម្មតម្រូវដែលអ្នកម្ដាយខ្ញុំមកដល់ស្រុកខ្មែរគឺជាគម្រោងទុកយូរមកហើយ គឺមកដើរកម្សាន្តលំហែកាយ ជួបជុំកូនចៅ និងស្នាក់នៅរយៈពេលយូរ បូកផ្សំនឹងមានរឿងនេះកើតឡើង ក៏បានតម្រូវឲ្យម៉ាក់មកដោះស្រាយបញ្ហាជាមួយនឹងរឿងកម្មសិទ្ធិបញ្ញានេះជាមួយផលិតកម្មសាន់ដេក៏ដូចជាផលិតកម្ម ផ្សេងៗដែលកន្លងមកតែងតែបានលួចយកស្នាដៃរបស់លោកប៉ាខ្ញុំ និងអ្នកនិពន្ធជំនាន់មុន ទុកជាគំរូកុំឱ្យចេះតែមានអ្នកលួចបន្លំយកស្នាដៃ មិនថាតែជាស្នាដៃរបស់លោកប៉ាខ្ញុំ ឬក៏ជាស្នាដៃអ្នកនិពន្ធក្នុងផលិតកម្ម ផ្សេងៗទៀតត្រូវបានទទួលនូវកម្មសិទ្ធិបញ្ញាយ៉ាងពិតប្រាកដ ។
ខាងក្រសួងគាត់មានវិធានការរបស់គាត់ហើយ ចំណែកក្រុមគ្រួសារខ្ញុំតាំងពីដើមទីមកក៏មិនដែលចង់មានបញ្ហាអីវែងឆ្ងាយ ឬការប្ដឹងប្តល់អីដែរទេ ពីព្រោះនេះមិនមែនជាលើកដំបូងទេគឺវាមានជាហូរហែកន្លងមករាប់សិបឆ្នាំទៅហើយ។ ពេលដែលលោកប៉ាខ្ញុំនៅមានជីវិតគឺគាត់តែងតែប្រៀនប្រដៅឲ្យពួកយើងចេះស្រឡាញ់រាប់អានគ្នាក្នុងនាមជាខ្មែរដូចគ្នា…គាត់បានដឹងរឿងនេះពីយូរណាស់មកហើយ ប៉ុន្តែគាត់មិនដែលចង់មានបញ្ហាអីទេ…ទោះបីជាគាត់ឈឺធ្ងន់រស់នៅស្រុកគេគេងពេទ្យ ហើយក៏គាត់នៅតែព្យាយាមសរសេរអត្ថបទប្រលោមលោក ផ្សេងៗដើម្បីបន្សល់ទុកនូវស្នាដៃដល់កូនខ្មែរជំនាន់ ក្រោយៗដែរ។
ពួកខ្ញុំមិននិយាយចំពោះតែបុគ្គលម្នាក់ទេ គឺខ្ញុំនិយាយចំពោះបុគ្គលទូទៅដែលតែងតែបានផលចំណេញពីញើសឈាមអ្នកដទៃ ។ លោកប៉ានាងខ្ញុំគាត់តែងនិយាយថាគាត់មានការសោកស្តាយដែលបានចាកចេញពីស្រុកកំណើតជាទីស្រឡាញ់របស់គាត់ រួមទាំងមិនដែលបានបង្ហាត់បង្រៀនដល់កូនខ្មែរជំនាន់ក្រោយឲ្យបានទទួលនូវចំណេះដឹងផ្ទាល់អំពីការនិពន្ធបទភ្លេង និងសរសេរសៀវភៅរបស់គាត់ ។ ដូច្នេះសូមកុំចេះតែចោទប្រកាន់ថាក្រុមគ្រួសារនាងខ្ញុំចូលចិត្តចង់ប្តឹងខ្មែរគ្នាឯងនោះ គ្រួសារខ្ញុំមិនមែនជាប្រភេទមនុស្សជាន់ពន្លិច ឬក៏មិនទុកឱកាសឲ្យនរណាម្នាក់ដែរ ។ ចំពោះបងប្អូនខ្លះដែលគាត់បានប្រើពាក្យមិនសមរម្យជាខ្លាំងចំពោះអ្នកម្ដាយវ័យជរារបស់ ខ្ញុំៗមិនចង់ប្រកាន់ទោសវែងឆ្ងាយទាំងតារាចម្រៀង ឬអ្នកគាំទ្រ អីនោះទេ ប៉ុន្តែសូមមេត្តាគិតពិចារណាឡើងវិញផង មុននឹងប្រើពាក្យអសុរោះទាំងនេះចំពោះគាត់។
ក្រុមគ្រួសារនាងខ្ញុំទាំងអស់សូមថ្លែងអំណរគុណយ៉ាងជ្រាលជ្រៅដល់បងប្អូនខ្មែរទូទៅនៅក្នុងពិភពលោកនេះដែលតែងតែបានគាំទ្រនូវស្នាដៃនិពន្ធរបស់លោកប៉ាខ្ញុំ រួមទាំងការលើកទឹកចិត្ត និងជំរុញឱ្យពួកខ្ញុំបានដើរទៅរកនូវភាពយុត្តិធម៌សម្រាប់ការថែរក្សាស្នាដៃរបស់លោកប៉ាខ្ញុំ ក៏ដូចជាលោកអ្នកនិពន្ធផ្សេងទៀតដែលត្រូវបានគេលួចបន្លំយកស្នាដៃយកមកកែច្នៃតាមរូបភាព ផ្សេងៗ។ ពួកខ្ញុំសុទ្ធតែជាអ្នកស្រឡាញ់ និងគាំទ្រសិល្បៈយើងខ្លាំងណាស់ ពិសេសគឺស្នាដៃកូនខ្មែរយើង»។
ដោយឡែកអ្នកស្រីតាក គឹមលន ភរិយារបស់លោកគង្គ ប៊ុនឈឿន បានអះអាងថា គោលបំណងដែលលោកស្រីចង់បានពេលនេះ គឺមិនមែនជាទឹកប្រាក់ ឬកម្រៃអ្វីពីបណ្តាផលិតកម្មដែលបានលួចចម្លងស្នាដៃស្វាមីនោះទេ ពោលគឺអ្នកស្រីគ្រាន់តែចង់បានតម្លៃរាល់កេរមរកតទាំងអស់ និងចេះថែរក្សាររាល់ស្នាដៃរបស់កវី ដើម្បីឱ្យដួងវិញ្ញាណក្ខន្ធរបស់កវីដែលចែកឋានទៅបានស្ងប់ស្រួល និងដើម្បីជាសេចក្តីថ្លៃថ្នូរសម្រាប់អ្នកនិពន្ធ ។
អ្នកស្រីតាក គឹមលន បញ្ជាក់ថា អ្នកស្រីនឹងពិភាក្សាជាមួយក្រសួងវប្បធម៌ និងវិចិត្រ សិល្បៈ ដើម្បីកោះហៅអ្នកដែលលួចចម្លងទាំងអស់ ដើម្បីចាត់ចែងតាមនីតិវិធីច្បាប់ ។
តារាចម្រៀងនាយចឺម រងការរិះគន់ខ្លាំង បន្ទាប់ពីបទចម្រៀងរបស់គេមានចំណងជើងថា «អូនជាអ្នកមានសមនឹងអ្នកមានដូចគ្នា» ដែលបានកាឡៃបទភ្លេងស្នាដៃរបស់កវីគង្គ ប៊ុនឈឿន គឺបទ«នឹកភូមិភ្នំ»។ បន្ទាប់ពីមានការរិះគន់ និងការព្រមានប្តឹងពីក្រុមគ្រួសារលោកគង្គ ប៊ុនឈឿន មក នាយ ចឺម មិនបានចេញមុខសុំទោសណាមួយនៅឡើយទេ ដោយសារសម្អាងថា ខ្លួនធ្វើអ្វីទៅតាមផលិតកម្មតម្រូវប៉ុណ្ណោះ ។
ទោះជាយ៉ាងណាក្តីអ្នកនិពន្ធបទចម្រៀងឲ្យនាយ ចឺម បានចេញមុខសុំទោសដល់ក្រុមគ្រួសាររបស់លោកគង្គ ប៊ុនឈឿន ជាសាធារណៈរួចហើយ។ ចំណែកផលិតកម្មសាន់ដេបានយល់ព្រមលុបបទចម្រៀងនេះចោលវិញតាមការទាមទារពីក្រុមគ្រួសាររបស់កវីស្ទឹងសង្កែនេះ ៕
ចែករំលែកព័តមាននេះ