របបលីប៊ីរបស់លោកមូអាម៉ា កាដាហ្វី កាលពីថ្ងៃទី៩ មីនា បានធ្វើការវាយលុកខាងយោធា និងការទូតដ៏ធំមួយប្រឆាំងពួកបះបោរដែលគំរាមកំហែងដល់ការកាន់អំណាចរបស់លោក។ នៅលើទីលានកងកម្លាំងរបស់លោកកាដាហ្វី ហាក់ដូចជាពង្រីកទឹកដីកាន់កាប់វិញ តែប្រឈមមុខនឹងពួកឧទ្ទាមនៅរណសិរ្សខាងកើតប្រទេស។
ពួកឧទ្ទាមត្រួតត្រាតំបន់ភាគខាងកើតដែលសំបូរប្រេងកាត ព្រមទាំងមូលដ្ឋានមួយចំនួននៅភាគខាងលិចប្រទេស ខណៈដែលទីក្រុងទ្រីប៉ូលី និងតំបន់ជុំវិញទីក្រុងនេះនៅតែស្ថិតក្នុងកណ្តាប់ដៃពួកស្និទ្ធលោកកាដាហ្វី។ BBC រាយការណ៍ថា អ្នកកាសែតរបស់ខ្លួន៣នាក់ត្រូវចាប់ខ្លួន ហើយរងការវាយដំដោយកងកម្លាំងស្មោះត្រង់នឹងលោកកាដាហ្វី ខណៈពួកគេធ្វើដំណើរទៅកាន់ទីក្រុង ZAOUIAH។
លោកកាដាហ្វីសន្យាផ្តល់ប្រាក់៤០០.០០០ដុល្លារចំពោះការចាប់ខ្លួនអតីតរដ្ឋមន្ត្រីក្រសួងយុត្តិធម៌ ខណៈដែលកងកម្លាំងរបស់លោកបន្តការវាយលុកដណើ្តមកាន់កាប់ភាគខាងកើតប្រទេសវិញ។ លោកកាដាហ្វីដែលចោទប្រកាន់លោកខាងលិច និងអាល់កៃដាថា ជាអ្នកទទួលខុសត្រូវចំពោះការបះបោរនៅប្រទេសលោកនឹងបញ្ជូនបេសកជនទាំងឡាយទៅកាន់អេហ្ស៊ីប និងអឺរ៉ុប។
ការប៉ះទង្គិចគ្នានានាបានបន្តនៅជិតទីក្រុងប្រេង RAS LANOUF ភាគខាងកើតប្រទេសដែលនៅទីនោះមានការវាយឆ្មក់តាមអាកាស និងការបាញ់ផ្លោងយ៉ាងខ្លាំងរបស់កងកំលាំងលោកកាដាហ្វីសំដៅភាគខាងលិចក្រុងកំពង់ផែនោះ។ អគ្គីភ័យយ៉ាងសាហាវមួយកើតមានជុំវិញរោងចក្រចំរាញ់ប្រេងកាតដោយមានពពកផ្សែងខ្មៅហុយឡើងលើ។ ប្រឈមមុខចំពោះការវាយប្រហារទាំងនេះពួកបះបោរបានតបតវិញតាមរយៈការបាញ់គ្រាប់រុ៉ក្កែត៤០គ្រាប់ និងមីសីុលការពារអាកាស២គ្រាប់។ នៅភាគខាងលិចក្រុងទ្រីប៉ូលីពួកប្រឆាំងត្រួតត្រាទីក្រុង ZENTEN ដែលជាប់ការហ៊ុមព័ទ្ធជានិច្ច។ កងកម្លាំងលោកកាដាហ្វីក៏ធ្វើការវាយលុកលើទីក្រុង ZAWIYAH ជាទីតាំងមួយរបស់ពួកបះបោរស្ថិតនៅជិតក្រុងទ្រីប៉ូលីជាងគេដែរ ។
ពួកបះបោរបានធ្វើការអំពាវនាវរកជំនួយអន្តរជាតិដោយស្នើបង្កើតតំបន់ហាមមិនឱ្យមានការហោះហើរដើម្បីរាំងខ្ទប់សកម្មភាពវាយប្រហាររបស់កងកម្លាំងអាកាសលោកកាដាហ្វី។ ចំណែករដ្ឋាភិបាលរបស់លោកកាដាហ្វីបានបញ្ជូនបណ្តាបេសកជនទៅកាន់អឺរ៉ុបមុនកិច្ចប្រជុំកំពូលរបស់សហភាពអឺរ៉ុបដែលនឹងផ្តោតជាពិសេសលើបញ្ហាលីប៊ីនៅក្រុងព្រុចសែល។ ឧត្តមសេនីយ៍លីប៊ីមួយរូបក៏នឹងកាន់សារមួយរបស់លោកកាដាហ្វីទៅកាន់ទីក្រុងគែរ ជាកន្លែងបើកធ្វើកិច្ចប្រជុំមួយរបស់សម្ព័ន្ធអារ៉ាប់នាថ្ងៃទី១២ មីនាខាងមុខនេះដែរ ៕
ចែករំលែកព័តមាននេះ