ខេត្តបាត់ដំបង ៖ ពិធីប្រកាសតែងតាំងផ្លាស់ប្តូរមុខងារនាយទាហានជាន់ខ្ពស់ ផ្ទេរភារកិច្ចមេបញ្ជាការយោធភូមិភាគទី៥ និងមេបញ្ជាការកងពលតូចថ្មើរជើងលេខ៥១ បានប្រព្រឹត្តទៅនៅទីបញ្ជាការយោធភូមិភាគទី៥ កាលពីវេលាព្រឹកថ្ងៃទី១៨ ខែមីនា ឆ្នាំ២០១៩ ក្រោមអធិបតីភាពលោកឧត្តមសេនីយ៍ឯក…
ខេត្តបាត់ដំបង ៖ ពិធីប្រកាសតែងតាំងផ្លាស់ប្តូរមុខងារនាយទាហានជាន់ខ្ពស់ ផ្ទេរភារកិច្ចមេបញ្ជាការយោធភូមិភាគទី៥ និងមេបញ្ជាការកងពលតូចថ្មើរជើងលេខ៥១ បានប្រព្រឹត្តទៅនៅទីបញ្ជាការយោធភូមិភាគទី៥ កាលពីវេលាព្រឹកថ្ងៃទី១៨ ខែមីនា ឆ្នាំ២០១៩ ក្រោមអធិបតីភាពលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ។
ក្នុងពិធីនោះដែរមានការចូលរួមពីលោកឧត្តមអគ្គមេបញ្ជាការរងនៃកងយោធពលខេមរភួមិន្ទ លោកឧត្តមអគ្គស្នងការរងនៃអគ្គស្នងការនគរបាលជាតិ ប្រតិភូក្រសួងការពារជាតិ ប្រតិភូអគ្គបញ្ជាការនិងប្រតិភូអមដំណើរកងទ័ពជើងគោក អគ្គកុងស៊ុលវៀតណាមប្រចាំខេត្តបាត់ដំបង អភិបាលនៃគណៈអភិបាលខេត្តទាំង៤(បន្ទាយមានជ័យ បាត់ដំបង ប៉ៃលិន និង ពោធិ៍សាត់) មេបញ្ជាការ មេបញ្ជាការរង នាយទាហានចំណុះយោធភូមិភាគទី៥ ស្នងការនគរបាលទាំង៤ខេត្ត មេបញ្ជាការកងរាជអាវុធហត្ថទាំង៤ខេត្ត សរុបចូលរួម២៧៦នាក់នៅសាលប្រជុំធំយោធភូមិភាគទី៥។
ថ្លែងក្នុងមតិស្វាគមន៍ និងរបាយការណ៍ លោកនាយឧត្តមសេនីយ៍ ប៊ុន សេង រដ្ឋលេខាធិការក្រសួងការពារជាតិ បានលើកឡើងថា ដោយមានការទុកចិត្តលើការដឹកនាំក្នុងអង្គភាពបន្ត និងបទពិសោធន៍កន្លងមក លោកមានសង្ឃឹមជឿជាក់ថា នាយទាហាន -ពលទាហានយោធភូមិភាគទី៥ទាំងអស់ពិសេសនាយទាហានវ័យក្មេងបន្តវេន នឹងបន្តអនុវត្តប្រពៃណីដ៏ល្អប្រពៃនេះមិនឲ្យបាត់បង់ចូលរួមរក្សានូវកិត្យានុភាពអង្គភាពបន្តទៀត ទៅថ្ងៃអនាគតទុកជាអង្គភាពគំរូឈានមុខក្នុងប្រវត្តិសាស្ត្រក្នុងប្រទេសកម្ពុជា។
បន្ទាប់មកលោកឧត្តមសេនីយ៍ត្រី ឈឹម លីន នាយការិយាល័យទី១កងទ័ពជើងគោកបានអាន អនុក្រឹត្យ និងប្រកាសស្ដីពីការតែងតាំងផ្លាស់ប្តូរមុខងារនាយទាហានជាន់ខ្ពស់រួមមាន ១-លោកឧត្តមសេនីយ៍ទោ ឯក សំអូន មេបញ្ជាការរងបញ្ជាការដ្ឋានកងទ័ពជើងគោក និងជាមេបញ្ជាការយោធភូមិភាគទី៥ ២-លោកឧត្តមសេនីយ៍ទោ សេង ធារិន មេបញ្ជាការរងនិងជានាយសេនាធិការយោធភូមិភាគទី៥៣-ឧត្តមសេនីយ៍ត្រី វ៉ែន សាយ មេបញ្ជាការកងពលតូលថ្មើរជើងលេខ៥១៤-លោកវរសេនីយ៍ឯក សឹង្ហ ទុំ មេបញ្ជាការរងនិងជានាយសេនាធិការកងពលតូចថ្មើរជើងលេខ៥១។
ពិធីប្រគល់ត្រាសិទ្ធិយោធភូមិភាគទី៥ រវាងលោកនាយឧត្តមសេនីយ៍ ប៊ុន សេង មេបញ្ជាការយោធភូមិភាគទី៥ ចាស់ ជាមួយនឹងលោកឧត្តមសេនីយ៍ទោ ឯក សំអូន មេបញ្ជាការយោធភូមិភាគទី៥ថ្មី។
បន្ទាប់មកលោកឧត្តមសេនីយ៍ទោ ឯក សំអូន មេបញ្ជាការយោធភួមិភាគទី៥ថ្មី បានប្តេជ្ញាចិត្តស្មោះត្រង់ជាតិ ការពាររដ្ឋធម្មនុញ្ញ ព្រះមហាក្សត្រ រាជរដ្ឋាភិបាលគោរពច្បាប់របស់រដ្ឋ បន្តគាំទ្រកម្មវិធីនយោបាយយុទ្ធសាស្ត្រចតុកោណរបស់រាជរដ្ឋាភិបាលចូលរូមសហការជាមូយអាជ្ញាធរដោយអនុវត្តផែនការការកែទម្រង់ស៊ីជម្រៅ ហើយអនុវត្តឲ្យបានដាច់ខាតអនុសាសន៍១០ចំណុចរបស់សម្តេចតេជោបានដាក់ទិសដៅកាលពីថ្ងៃទី២៤ខែមករា ឆ្នាំ២០១៩ ដើម្បីបង្កើនប្រសិទ្ធភាពដឹកនាំក្នុងយោធភូមិភាគទី៥ បន្តនិរន្តរភាពអនុវត្តផែនការកសាងពង្រឹងអង្គភាពរឹងមាំលើគ្រប់វិស័យ រួចបន្តពង្រឹងនិរន្តរភាពកាដឹកនាំអង្គភាពឈរលើស្មារតីសាមគ្គីឯកភាពរឹងមាំ។
មានមតិផ្តាំផ្ញើទៅកាន់អង្គពិធី លោកឧត្តមសេនីយ៍ឯក ហ៊ុន ម៉ាណែត បានលើកឡើងថា នេះជាការកែទម្រង់ក្នុងជួរកងយោធពលខេមរភូមិន្ទឈរលើការរក្សាចាស់និងពង្រីកក្មេងមានសមត្ថភាពបន្តវេនដោយការដាក់ចូលសោធននិវត្តន៍ធ្វើជាជំហានៗ ដោយមិនអាចរង់ចាំបុណ្យសក្តិ តំណែងការងារដែលមានធ្លាក់ចុះពីលើមេឃមកបានឡើយ ព្រោះអ្វីៗដែលទទួលបានមកនេះគឺជាស្នាដៃ ឆន្ទៈ សុខភាព បទពិសោធន៍ តាំងពីសម័យមានសង្គ្រាមមក មិនអាចដាក់ចូលសោធននិវត្តន៍ទាំងអស់ចំពោះនាយទាហានដល់អាយុនោះទេ ក្នុងនោះប្រមុខរាជរដ្ឋាភិបាលបានដោះស្រាយគោលនយោបាយដំឡើង១ស័ក្តិថែមមុនពេលចូលនិវត្តន៍ចេញពីជួរ ហើយការកែទម្រង់កងទ័ពទាមទារការចូលរួមចំណែកដោយអនុវត្តជាជំហានមិនអាចធ្វើតម្រឹមលឿនពេកនោះទេ។
លោកឧត្តមសេនីយ៍ឯកផ្តាំផ្ញើទៀតថា កត្តាសំខាន់គឺសាមគ្គីឯកភាពផ្ទៃក្នុងឈរលើការដឹកនាំប្រកបដោយវិជ្ជាជីវ: ម៉ឹងម៉ាត់ក្នុងការងារនិងប្រកបដោយភាតរភាព គុណភាពទទួលយកបានទាំងអស់គ្នា ។ ចុងក្រោយលោកឧត្តមសេនីយ៍ឯក ហ៊ុន ម៉ាណែត បានជួយឧបត្ថម្ភកម្មវិធីនូវថវិកាមួយចំនួនផងដែរ ៕
ចែករំលែកព័តមាននេះ