ខេត្តត្បូងឃ្មុំ ៖ តាមសេចក្តីរាយការណ៍ព័ត៌មានបឋមបានឱ្យដឹងថា អគ្គីភ័យយ៉ាងសន្ធោសន្ធៅបានឆាបឆេះផ្ទះប្រជាពលរដ្ឋអស់ចំនួន៤ខ្នង បង្កការភ្ញាក់ផ្អើលដល់រថយន្តពន្លត់អគ្គីភ័យចំនួន៧គ្រឿងចេញទៅជួយអន្តរាគមន៏បាញ់ទឹកពន្លត់ផងដែរ ។
ហេតុការណ៍ខាងលើបង្កឱ្យមានការភ្ញាក់ផ្អើលកាលពីវេលាម៉ោង២និង៣០នាទីរសៀលថ្ងៃទី១៨ មីនា ២០១៩ ស្ថិតក្នុងភូមិស្វាយដំណាក់ ឃុំជំនិក ស្រុកក្រូចឆ្មារ ។
នគរបាលមូលដ្ឋានបានប្រាប់ឲ្យដឹងថា ពេលមានហេតុការណ៍អគ្គីភ័យឆាបឆេះផ្ទះខាងលើកើតឡើងភ្លាម ត្រូវបានលោកអធិការនគរបាលស្រុកបានរាយការណ៍បន្ទាន់មកកាន់លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត ដើម្បីចុះទៅជួយអន្តរាគមន៍នៅកន្លែងកើតហេតុ ក្នុងនោះមានរថយន្តពន្លត់អគ្គីភ័យរបស់ស្រុកក្រូចក្រូចឆ្មារ បានចេញទៅជួយបាញ់ទឹកពន្លត់ និងរថយន្តពន្លត់អគ្គីភ័យមកពីស្រុកឆ្លូង ខេត្តក្រចេះ, ក្រុងសួង ត្បូងឃ្មុំ តំបែរ និងមេមត់ ក៏បានប្រញាប់ប្រញាល់ចេញទៅជួយអន្តរាគមន៏បាញ់ទឹកពន្លត់ផងដែរ។
នគរបាលមូលដ្ឋានប្រាប់បន្តថា លំនៅឋានរងគ្រោះដោយសារអគ្គីភ័យឆាបឆេះខាងលើនោះរួមមាន ១- ឈ្មោះគួង ម៉ានី ភេទស្រី អាយុ២៣ឆ្នាំ ជាម្ចាស់ផ្ទះតៀមធ្វើអំពីឈើប្រក់ស័ង្កសីមានទំហំ៥ម៉ែតគុណនឹង១០ម៉ែត្រ ២- ឈ្មោះ បឿកអ៊ិន ភេទប្រុស អាយុ៤៨ឆ្នាំ ជាម្ចាស់ផ្ទះឈើប្រក់ក្បឿងមានទំហំ៥ម៉ែត្រគុណ១៤ម៉ែត្រ ៣- ឈ្មោះ ឌិម ភិន ភេទស្រី អាយុ៤៩ឆ្នាំ ជាម្ចាស់ផ្ទះឈើប្រក់ដែកមានទំហំ៥ម៉ែត្រគុណ៨ម៉ែត្រ និង៤- ឈ្មោះ លីង ស៊ីណាន ភេទប្រុស អាយុ៤៥ឆ្នាំ ជាម្ចាស់ផ្ទះឈើប្រក់ដែកមានទំហំ៦ម៉ែត្រគុណ៩ម៉ែត្រ ។ លំនៅឋានទាំង៤ខ្នងនេះត្រូវបានអគ្គិភ័យឆាបឆេះខូចខាតអស់ទាំងស្រុង ។
នគរបាលមូលដ្ឋានបានប្រាប់បន្តទៀតថា រហូតដល់វេលាម៉ោង៤និង៣០នាទីរសៀល សមត្ថកិច្ចនៅតែបន្តបាញ់ទឹកពន្លត់ដើម្បីកុំឲ្យភ្លើងឆាបឆេះរាលដាលទៅដល់ផ្ទះប្រជាពលរដ្ឋនៅជុំវិញតំបន់នោះ ហើយបានប្រើប្រាស់ទឹកអស់ជិត៣០រថយន្ត ។ ចំពោះមូលហេតុបណ្តាលឱ្យកើតមានអគ្គិភ័យឆាបឆេះផ្ទះខាងលើ ត្រូវបានគេដាក់ការសង្ស័យថាមកពីទុស្សេខ្សែភ្លើង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ