ប្រទេសអេត្យូពី ៖ យន្តហោះធុនប៊ូអីុង737MAX8 ទាំង២គ្រឿងដែលធ្លាក់នាពេលថ្មីៗនេះ បណ្ដាលឲ្យមនុស្សស្លាប់ច្រើនរយនាក់នៅអេត្យូពីកាលពីថ្ងៃទី១០មីនា និងនៅឥណ្ឌូណេស៊ីកាលពីខែតុលា បង្ហាញថាមកពីបញ្ហាស្រដៀងគ្នាយ៉ាងច្បាស់។ នេះជាការវាយតម្លៃដោយយោងតាមការផ្ដល់ព័ត៌មានរបស់ប្រអប់ខ្មៅនៃយន្តហោះ និងសេចក្ដីប្រកាសកាលពីថ្ងៃទី១៧មីនា របស់ក្រុមហ៊ុនប៊ូអីុង។ បញ្ហាគឺមកពីប្រព័ន្ធធ្វើឲ្យយន្តហោះមានលំនឹង។
ក្នុងពិធីមួយឯព្រះវិហារគ្រឹស្តក្រុងអាឌីអាបេបា មនុស្សច្រើនរយនាក់នាថ្ងៃទី១៧មីនា បានមកគោរពវិញ្ញាណក្ខ័ន្ធ ជនរងគ្រោះជាជនជាតិអេត្យូពី ដោយសារការធ្លាក់យន្តហោះរបស់ប្រទេសនោះ បណ្ដាលឲ្យមនុស្សស្លាប់១៥៧នាក់។ មឈូសចំនួន១៧គ្របទង់ជាតិអេត្យូពី ត្រូវបានគេដឹកដង្ហែតាមដងវិថីនានានៃរដ្ឋធានី។
គ្រោះថ្នាក់នៃយន្តហោះរបស់ក្រុមហ៊ុនអាកាសចរណ៍ETHIOPIAN AIRLINES ជាគ្រោះថ្នាក់ទី២ចន្លោះពេលគ្នាមិនដល់៥ខែផង សម្រាប់ប៊ូអីុង737MAX8 បន្ទាប់ពីយន្តហោះធុននេះដែររបស់ក្រុមហ៊ុន LION AIRដែលធ្លាក់ក្នុងសមុទ្រនៃកោះជ្វា សម្លាប់មនុស្ស១៨៩នាក់។ យន្តហោះធុននោះពេលនេះត្រូវបានគេចតទុកលើដីផ្អាកលែងឲ្យហោះហើរក្នុងទូទាំងពិភពលោក។
រដ្ឋមន្ត្រីដឹកជញ្ជូនអេត្យូពី លោកDAGMAWIT MOGES ក្នុងសន្និសីទសារព័ត៌មានមួយថ្លែងថា ពេលសើុបអង្កេតលើប្រអប់ខ្មៅស្រង់ទិន្នន័យនៃការហោះហើរ លទ្ធផលមានលក្ខណៈស្រដៀងគ្នានៃគ្រោះរបស់យន្តហោះអេត្យូពីជើងហោះហើរ៣០២ និងយន្តហោះរបស់ក្រុមហ៊ុនLION AIR ជើងហោះហើរ៦១០។ គ្រោះថា្នក់នៃយន្តហោះទាំង២ត្រូវតែជាកម្មវត្ថុនៃការសិក្សាដោយស៊ីជម្រៅបំផុតមួយ។ ប្រអប់ខ្មៅទាំង២របស់យន្តហោះអេត្យូពីត្រូវបានបញ្ជូនទៅវិភាគនៅប្រទេសបារាំង ហើយរបាយការណ៍ដំបូងៗលើមូលហេតុនៃការធ្លាក់ នឹងចេញផ្សាយរយៈពេល៣០ថ្ងៃទៀត។
ការស៊ើបអង្កេតលើគ្រោះថ្នាក់យន្តហោះLION AIRបានសន្និដ្ឋានលើកិច្ចដំណើរការមិនល្អនៃប្រព័ន្ធធ្វើឲ្យយន្តហោះមានស្ថេរភាពពេលកំពុងហោះហើរ ហៅប្រព័ន្ធMCAS(MANOEUVERING CHARACTERISTICS AUGMENTATION SYSTEM)។ ប្រធានអគ្គនាយករបស់ប៊ូអីុងលោកDENNIS MUILENBURG ប្រកាសកាលពីថ្ងៃទី១៧មីនាថា ក្រុមហ៊ុនលោកជិតបញ្ចប់ហើយ ការកែតម្រូវប្រព័ន្ថMCASនៃយន្តហោះ737MAX៕
ចែករំលែកព័តមាននេះ