រាជធានីភ្នំពេញ៖ បុរសអ្នករត់ម៉ូតូកង់បីឥណ្ឌាម្នាក់បានស្លាប់នៅក្នុងវត្តគៀនឃ្លាំង បន្ទាប់ពីហូបបាយរូចដេកមួយសន្ទុះ លុះពេលភ្ញៀវទៅដាស់អោយក្រោកស្រាប់តែមិនស្រួលខ្លួន ហើយភ្ញៀវបាននាំគ្នាជួយធ្វើចលនា និងកោសខ្យល់ឱ្យ ស្រាប់តែជនរងគ្រោះដាច់ខ្យល់ស្លាប់តែម្តង។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង១និង៤០នាទីរសៀលថ្ងៃទី១៨ ខែមិនាឆ្នាំ ២០១៩ នៅចំណុចមាត់ទន្លេក្នុងវត្តគៀនឃ្លាំង ភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ។
ជនរងគ្រោះដែលស្លាប់ឈ្មោះ ភឿន សុភណ្ឌ ភេទប្រុស អាយុ៤២ឆ្នាំ មុខរបររត់ម៉ូតូកង់បីឥណ្ឌា ស្នាក់នៅចល័តក្នុងរាជធានីភ្នំពេញនិងមានស្រុកកំណើតនៅភូមិព្រែកខ្សាយខ ឃុំព្រែកខ្សាយខ ស្រុកពាមរ ខេត្តព្រៃវែង ។ ចំណែកម៉ូតូកង់បីឥណ្ឌារបស់ជនរងគ្រោះ ពណ៌ស ពាក់ស្លាកលេខ ព្រៃវែង ១O-៦៧៦៣ ។
តាមព័ត៌មានអោយដឹងថា នៅមុនពេលកើតហេតុ បន្ទាប់ពីហូបបាយរួច អ្នករត់ម៉ូតូកង់បីឥណ្ឌា ក៍បានធ្វើដំណើរទៅសំរាកនៅក្នុងរោងបុណ្យដែលគេមិនទាន់រុះរើក្នុងវត្តគៀនឃ្លាំង ។ ពេលកំពុងតែដេក ស្រាប់តែមានភ្ញៀវ២នាក់ប្តីប្រពន្ធបានទៅដាស់ឱ្យក្រោកឡើង ដើម្បីដឹកពួកគាត់ ។
តាមព័ត៌មានអោយដឹងទៀតថា លុះពេលភ្ញាក់ឡើង អ្នករត់កង់បីឥណ្ឌានោះមិនស្រួលខ្លួន ចេះតែថប់ៗដង្ហើម ហើយភ្ញៀវពីរនាក់ប្តីប្រពន្ធនាំគ្នាជួយធ្វើចលនា និងកោសខ្យល់អោយ ព្រមទាំងអោយផឹកតែក្រូចឆ្មាដែរ ស្រាប់តែជនរងគ្រោះបានដាច់ខ្យល់ស្លាប់បាត់តែម្តង។ បន្ទាប់ពីកើតហេតុ ប្រជាពលរដ្ឋក៍បានរាយការណ៍ទៅនគរបាលមូលដ្ឋាន ហើយហៅនគរបាលជំនាញបានចុះទៅពិនិត្យកន្លែងកើតហេតុ និងសពជនរងគ្រោះ ។
តាមប្រភពពីនគរបាលជំនាញបានអោយដឹងថា ជនរងគ្រោះបានស្លាប់ដោយសាតែគាំងបេះដូង ហើយសពជនរងគ្រោះត្រូវបាននគរបាលតម្កល់ទុកនៅក្នុងវត្តជាបណ្តោះអាសន្នដើម្បីស្រាវជ្រាវរកក្រុមគ្រួសារសាច់ញាតិមកទទួលយកទៅធ្វើបុណ្យតាមប្រពៃណី៕
ចែករំលែកព័តមាននេះ