ការប្រកួតប្រជែងរ៉ូបូតអូឡាំព្យាដពិភពលោក សម្រាប់ជុំប្រកួតនៅក្នុងប្រទេសកម្ពុជានឹងប្រព្រឹត្តទៅនៅថ្ងៃសៅរ៍ ទី០៨ ខែមិថុនា ឆ្នាំ២០១៩។ ប្រធានបទសម្រាប់ឆ្នាំនេះគឺ «ទីក្រុងវៃឆ្លាត» (Smart Cities) ដោយមានការប្រកួតប្រជែងលើវិញ្ញាសាទូទៅ (Regular) ជាមួយនឹង LEGO Mindstorm Robots និងវិញ្ញាសាបើកទូលាយថ្មី (New Open) ដែលមានការដាក់ឱ្យប្រកួតរ៉ូបូតគ្រប់ប្រភេទ។ ចំពោះទាំងវិញ្ញាសាទូទៅ និងបើកទូលាយ គឺចែកចេញជាពីរកម្រិត ៖ កុមារ (១៣-១៥ឆ្នាំ) និងយុវជន (១៦-១៩ឆ្នាំ)។
អង្គការពិព័រណ៌វិទ្យាសាស្ត្រកម្ពុជា គឺជាអង្គការក្រៅរដ្ឋាភិបាលក្នុងស្រុក ក្រោមការគាំទ្ររបស់ក្រសួងអប់រំ យុវជន និងកីឡា មានបេសកកម្មក្នុងការបណ្ដុះការចូលចិត្តការសិក្សាមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យាសម្រាប់សិស្សានុសិស្សកម្ពុជា ដើម្បីកសាងអនាគតកម្ពុជាដ៏ភ្លឺស្វាង។
នៅជុំវិញពិភពលោក មុនវិជ្ជាស្ទែមត្រូវបានគេទទួលស្គាល់ថាជាការរួមចំណែកដ៏សំខាន់ដល់ការអភិវឌ្ឍសេដ្ឋកិច្ច និងជាគន្លឹះដោះស្រាយបញ្ហាប្រឈមដូចជាការអភិវឌ្ឍវិស័យសុខាភិបាល និងការអភិវឌ្ឍប្រកបដោយនិរន្តរភាព។ ជាអាទិ៍ ការសិក្សាអំពីរ៉ូបូតគឺជាមធ្យោបាយមួយគួរឱ្យចាប់អារម្មណ៍ក្នុងការបណ្ដុះឱ្យយុវជនចូលចិត្តមុខវិជ្ជាទាំងនេះ។
បណ្ឌិត Una McCarthy-Fakhry នាយិកា អង្គការពិព័រណ៌វិទ្យាសាស្ត្រកម្ពុជា ថ្លែងថា ៖ «ការរីករាយជាមួយនឹងរ៉ូបូត គឺជាវិធីល្អក្នុងការច្របាច់បញ្ចូលគ្នានូវជំនាញដែលចាំបាច់ពីគ្រប់ផ្នែកនៃការអប់រំស្ទែម និងជាមធ្យោបាយមួយដ៏រីករាយ ជាមួយនឹងសកម្មភាពការងារក្រុមរួមគ្នា និងមានលក្ខណៈអប់រំ»។
កាលពីឆ្នាំ២០១៨ កន្លងទៅនេះ អង្គការពិព័រណ៌វិទ្យាសាស្ត្រកម្ពុជា បានក្លាយជាដៃគូពេញសិទ្ធិរបស់សមាគមរ៉ូបូតអូឡាំព្យាដពិភពលោក និងបានរៀបចំព្រឹត្តិការណ៍ ការប្រកួតប្រជែងរ៉ូបូតអូឡាំព្យាដពិភពលោក ជាលើកដំបូងនៅក្នុងប្រទេសកម្ពុជា។ យើងមានមោទនភាពដែលក្រុមប្រកួតតំណាងប្រទេសកម្ពុជាចំនួនពីរក្រុមបានឡើងដល់វគ្គផ្ដាច់ព្រ័ត្រនៅប្រទេសថៃ កាលពីឆ្នាំទៅ។
រីឯនៅក្នុងឆ្នាំនេះដែរ ជុំប្រកួតនៅកម្ពុជានឹងអាចផ្ដល់ឱកាសប្រកួតនៅក្នុងវគ្គផ្ដាច់ព្រ័ត្រនៅប្រទេសហុងគ្រី ក្នុងខែវិច្ឆិកាខាងមុខនេះ ហើយយើងសង្ឃឹមថា យុវជនយើងនឹងអាចមានឱកាសតំណាងឱ្យប្រទេសកម្ពុជាលើឆាកអន្តរជាតិ។
សូមចុះឈ្មោះតាមរយៈវេបសាយរបស់យើងខ្ញុំ។ ចាប់ទទួលពាក្យពីថ្ងៃទី៣០ ខែមីនា ដល់១០ ខែឧសភា។បទបង្ហាញព័ត៌មានសាធារណៈនឹងធ្វើឡើងនៅថ្ងៃសៅរ៍ ទី០៦ ខែមេសា។ ដោយសហការ
ចែករំលែកព័តមាននេះ