រាជធានីភ្នំពេញ ៖ យុវជនម្នាក់ដែលជាកម្មករលើកដែកបានរងរបួសធ្ងន់ធ្ងរ ហើយត្រូវបានមិត្តភក្តិរួមការងារដឹកបញ្ជូនតាមម៉ូតូកង់បីឥណ្ឌាទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗ ខណៈ ជនរងគ្រោះខាងលើរួមនឹងមិត្តភក្តិកំពុងស្រាយខ្សែចងដែកដើម្បីស្ទូចចេញពីរថយន្តដាក់ចូលក្នុងឃ្លាំងដេប៉ូលក់ដែកយីហោ «សេង សុជាតិ» ជាអកុសលមិនទាន់បានស្ទូចផង ស្រាប់តែដែក១បាច់ធំបានរមៀលធ្លាក់ពីលើរថយន្តសង្កត់ពីលើយុវជនរងគ្រោះខាងលើ បណ្ដាលឲ្យរងរបួសធ្ងន់ធ្ងរតែម្ដង។ ភ្លាមៗនោះរថយន្តដឹកដែកបានព្យាយាមបើកគេច ក្នុងបំណងមិនទទួលខុសត្រូវចំពោះអ្វីដែលបានកើតឡើង ប៉ុន្តែរត់មិនរួចត្រូវបាននគរបាលខណ្ឌដង្កោដេញតាមចាប់បានទាំងរថយន្តនិងអ្នកបើកបរផងដែរ។
ហេតុការណ៍ខាងលើនោះបានបង្កឲ្យមានការភ្ញាក់ផ្អើលកាលពីវេលាម៉ោង១០ព្រឹកថ្ងៃទី១៨ ខែមីនា ឆ្នាំ២០១៩ នៅតាមបណ្តោយផ្លូវលេខ២១៧ ហៅផ្លូវចំការដូង ត្រង់ចំណុចមុខឃ្លាំងដែក យីហោ «សេង សុជាតិ» ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ប្រភពពីប្រជាពលរដ្ឋដែលឃើញហេតុការណ៍ផ្ទាល់បានឲ្យដឹងថា ពួកគាត់មិនបានស្គាល់អត្តសញ្ញាណជនរងគ្រោះទេ ហើយនៅមុនពេលកើតហេតុ មានរថយន្តស្ទូចធុនធំ១គ្រឿងដឹកដែកពេញទ្រុងបានបើកទៅឈប់នៅមុខឃ្លាំងលក់ដែកខាងលើ ដើម្បីស្ទូចដែកដាក់ចូលទៅក្នុងឃ្លាំងលក់ដែកយីហោសេង សុជាតិនោះ។
ប្រភពដដែលបានន្តថា បន្ទាប់មកមានកម្មករ៤ទៅ៥នាក់ ក្នុងនោះក៏មានជនរងគ្រោះម្នាក់ផងដែរ បាននាំគ្នាស្រាយខ្សែចងដែកចេញដើម្បីស្ទូចយកដែកចេញពីរថយន្ត ប៉ុន្តែដោយសារតែការដឹកហួសចំណុះផុតទ្រុង ទើបនៅពេលស្រាយខ្សែ ស្រាប់តែដែក១បាច់ធំបានរមៀលធ្លាក់ពីលើរថយន្តសង្កត់ទៅលើយុវជនរងគ្រោះ បណ្តាលឲ្យរងរបួសបែកក្បាលសន្លប់ស្ដូកស្ដឹងតែម្ដ។
ប្រភពដដែលបានបន្តទៀតថា ពេលនោះជនរងគ្រោះត្រូវបានមិត្តភក្តិរួមការងារដឹកតាមម៉ូតូកង់បីឥណ្ឌាបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗដែរ ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំង ហើយភ្លាមៗនោះទាំងម្ចាស់ឃ្លាំង ទាំងម្ចាស់រថយន្តដឹកដែកបាននាំគ្នាលាក់បាំងមិនរាយការណ៍ជូននគរបាលឡើយ មិនតែប៉ុណ្ណោះបានបើករថយន្តចេញគេចខ្លួនថែមទៀតផង ប៉ុន្តែគេចមិនរួច ត្រូវបាននគរបាលដេញតាមចាប់បានទាំងរថយន្តនិងអ្នកបើកបររួចបាននាំទៅធ្វើការសាកសួរដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ