រាជធានីភ្នំពេញ ៖ អ្នកជិតខាងបានធុំក្លិនស្អុយចេញមកពីក្នុងផ្ទះសង្ស័យក៏រាយការណ៍ទៅសមត្ថកិច្ច ហើយនាំគ្នាគាស់ទ្វារផ្ទះប៉ុន្តែជាប់សោ ក៏សុំផ្ទះអ្នកជិតខាងផ្លោះតាមរបងខាងមុខ ស្រាប់តែស្ត្រីម្នាក់វ័យ៤៩ឆ្នាំបានដេកស្លាប់នៅលើពូករហូតហើមស្អុយទៅហើយ បង្កឱ្យមានការភ្ញាក់ផ្អើលកាលពីម៉ោង11យប់ ថ្ងៃទី១៧ ខែមីនា ឆ្នាំ២០១៩ តាមបណ្តោយផ្លូវ១០៧ ក្នុងឌឿងហែម ស្ថិតនៅចំណុចផ្ទះ46E3Z ក្នុងសង្កាត់អូរឬស្សី១ ខណ្ឌ៧មករា ។
ស្ត្រីរងគ្រោះខាងលើឈ្មោះ ដួង ពុទ្ធា អាយុ49ឆ្នាំ ស្នាក់នៅផ្ទះជាន់ទី៣ លេខ46E3Z សង្កាត់អូរឬស្សី១ ខណ្ឌ៧មករា មានស្រុកកំណើតនៅអង្គរជ័យ ខេត្តកំពត ដេកស្លាប់នៅលើពូក។
តាមប្រភពព័ត៌មានពីជុំវិញកន្លែងកើតហេតុបានឱ្យដឹងថា មុនពេលកើតហេតុ ជនរងគ្រោះខាងលើនេះ មានកូនទាំងអស់៣នាក់ ក្នុងប្រុសម្នាក់ ហើយរាល់ថ្ងៃគឺគាត់នៅតែម្នាក់ឯងតែប៉ុណ្ណោះ រហូតដល់ម៉ោង6ល្ងាច អ្នកជិតខាងបានធុំក្លិនស្អុយចេញមកពីក្នុងផ្ទះកើតហេតុគួរឲ្យសង្ស័យក៏ទូរស័ព្ទរាយការណ៍ប្រាប់សមត្ថកិច្ចឱ្យចុះមកកន្លែងកើតហេតុ ។
ប្រភពដដែលបន្តថា ខណៈពេលចុះមកដល់ហើយ គាត់ក៏គាស់ទ្វារផ្ទះរបស់ជនរងគ្រោះ ប៉ុន្តែទ្វារក្រោយចាក់សោរ សមត្ថកិច្ចក៏សុំផ្ទះប្រជាពលរដ្ឋអ្នករស់នៅជិតខាងផ្លោះចូលខាងមុខ រួចបើកទ្វារទៅមើល ស្រាប់តែឃើញស្ត្រីរងគ្រោះបានដេកស្លាប់នៅលើពូក ដោយមានសភាពហើមស្អុយទៅហើយ ។
តាមសមត្ថកិច្ចចុះមកពិនិត្យបានសន្និដ្ឋានថា ជនរងគ្រោះពិតជាស្លាប់ដោយសារតែជំងឺគាំងបេះដូងពិតប្រាកដមែន ដោយស្លាប់៤ទៅ៥ថ្ងៃមកហើយ ។ ក្រោយពេលកើតហេតុ សពរបស់ស្ត្រីរងគ្រោះត្រូវបានក្រុមគ្រួសារដឹកយកទៅដំកល់នៅវត្តទួលសង្កែ ដើម្បីធ្វើបុណ្យទៅតាមប្រពៃណី ៕
ចែករំលែកព័តមាននេះ