ខេត្តកំពង់ចាម ៖ ស្រី្តម្នាក់បើកបរម៉ូតូមួយគ្រឿងធ្វើដំណើរក្នុងទិសដៅពីលិចទៅកើតឡើងមកលើស្ពានគីហ្ស៊ុណា ត្រូវរថយន្តម៉ាកហាយឡែនឌ័រមួយគ្រឿងបុក និងកិនបណ្តាលឱ្យស្លាប់នៅនឹងកន្លែង ហើយរថយន្តបានបើកគេចទៅខេត្តត្បូងឃ្មុំបាត់ ។
ហេតុការណ៍ដ៏រន្ធត់ខាងលើបានកើតឡើងកាលពីវេលាម៉ោង៦និង៤៥នាទីយប់ថ្ងៃទី១៦ មីនា ឆ្នាំ២០១៩ ស្ថិតនៅចំណុចលើស្ពានគីហ្ស៊ុណា ក្នុងភូមិទី៣ សង្កាត់វាលវង់ ក្រុងកំពង់ចាម ។
ស្ត្រីម្នាក់ដែលរងគ្រោះខាងលើ ដំបូងគេមិនស្គាល់អត្តសញ្ញាណនោះទេ តែដោយសារមានទូរស័ព្ទ១គ្រឿងនៅជាប់ខ្លួនស្ត្រីរងគ្រោះ លុះពេលចុចសួរនាំគេឯង ទើបដឹងថា ស្ត្រីរងគ្រោះដែលស្លាប់ឈ្មោះ ហុង សុភា អាយុ២៨ឆ្នាំ នៅភូមិព្រៃចក្រី ឃុំអូរស្វាយ ស្រុកកំពង់សៀម ជាអ្នកបើកបរម៉ូតូមួយគ្រឿងម៉ាកហុងដា ពណ៌ខ្មៅ ពាក់ស្លាកលេខ កំពង់ចាម ១T-១៥៣៧ ។
លោកវរសេនីយ៍ទោ ស៊ាម យូសេង អធិការងនគរបាលក្រុងកំពង់ចាម ទទួលផែនសណ្តាប់ធ្នាប់ប្រាប់
ឲ្យដឹងថា នៅពេលមុនកើតហេតុ គេឃើញស្ត្រីរងគ្រោះបើកបរម៉ូតូមួយគ្រឿងចេញពីទិសខាងលិចឆ្ពោះមកទិសខាងកើត ដោយបានមិនបានពាក់មួកសុវត្ថិភាពនោះទេ លុះមកដល់ត្រង់ចំណុចកណ្តាលស្ពា
ន ក៏ស្រាប់តែមានរថយន្តមួយគ្រឿងម៉ាកហាយឡែនឌ័របើកបរស្របទិសគ្នាមកពីខាងក្រោយ និងមិនបានប្រកាន់ស្តាំនោះទេ បានបុក និងកិនស្ត្រីរងគ្រោះ បណ្តាលឲ្យស្លាប់ភ្លាមៗនៅនឹងកន្លែងកើតហេតុ ។
លោកអធិការរងបានបន្តថា បន្ទាប់ពីកើតហេតុ រថយន្តបង្កមិនបានឈប់នោះទេ រឹតតែបន្ថែមយ៉ាងល្បឿនបើកចេញទៅទិសខាងកើតចូលទៅក្នុងឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំបាត់ស្រមោល រហូតមកដល់ព្រឹកថ្ងៃទី១៧ មីនា ក៏នៅមិនទាន់មានតម្រុយណាមួយពីរថយន្តបង្កនៅឡើយទេ ។ ទោះបីជាបែបណា សាក្សីគ្រាន់តែបានឃើញស្លាកលេខខាងមុខរបស់រថយន្តហាយឡែនឌ័រនោះគឺ ០២៤៥ ធ្វើឱ្យសមត្ថកិច្ចពិបាកក្នុងស្រាវជ្រាវតាមរកអ្នកបើកបររថយន្តបង្កខាងលើ ។
ក្រោយពេលកើតហេតុ សពជនរងគ្រោះត្រូវបានដឹកយកទៅតម្កល់ទុកនៅមន្ទីរពេទ្យ៧ដេ ស្រុកកំពង់ សៀម ហើយនៅយប់ថ្ងៃដដែលនោះផងដែរ សាច់ញាតិរបស់ជនរងគ្រោះបានមកទទួលយកសពទៅធ្វើបុណ្យតាមប្រពៃណី ហើយម៉ូតូត្រូវបានដឹកយកមករក្សាទុកបណ្តោះអាសន្ននៅអធិការដ្ឋាននគរបាលក្រុងកំពង់ចាម ដើម្បីធ្វើការស្រាវជ្រាវបន្តទៀត៕
ចែករំលែកព័តមាននេះ